Kor2 1
1
1 #
NDS 18.1
Masɛ Pooli n Yezu *Krita a dia dí-a wole lɛa, á kɔnpɛ ka Lawa foo sii ni. Ma laanka ma dɔɔ̃n Timote ne, wɔ n sɛ́wɔ kɛ diɛ Korɛntin Lawa a sɔmɔ minin la, ka Lawa a minin mɛnɛn tumaa bɛ́ Grɛki gána tumu ni. 2Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la.
Foo basiɛ̃ wole bɛ́ foo basiɛ̃ koe lɔn
3Ma á fòo diɛ Lawa nɛ, asɛ mɛn bɛ́ wɔa Dɛnaa Yezu Krita ǹ Di lɛa. A din nə Díi lɛa wɔ makara doɛ̃. A din nə Lawa lɛa ma foo taɛ̃ sii tumaa gɔ́ɔ̃ nɛ. 4Lawa din nə ma foo taɛ̃ maa fuu-yɛ tumaa gɔ́ɔ̃ nɛ. Ma foo tãbaa mɛn yɛ a din li, a n mà ma boo la ma fuu-yɛlen tumaa foo taã ka bɛ lɛ nɛ.
5Sonbore, Krita a fuun lɛn bɛ́ ma yii gigiã lɔn, man foo tãbaa gole dɔ yii miɛ Krita pàã ganaa. 6Ma bɛ́ fuu lɛ yii ke, ka dinin bǐɛ̃ kɔ a lɛa nɛ. Man máa ka foo tãbaa yɛ. Ma foo bɛ́ tã ke, ka dinin foo tãbaa a lɛa nɛ. Ma dɔ fuun mɛnɛn kuubaa si ma ganaa, bɛa foo tãbaa lɛ n toɛ ka dɔn tá bɛa fuun lɛn miãn sii ka ganaa. 7Man waa-n kɛ la taãn-taãnɛ kaa wɔ paǹ li: Ma á doɛ̃ máa ka bɛ́ kaa wɔ gii yii maa fuun lɛn nɛ ke, ka n die kaa wɔ gii yii maa foo tãbaa lɛ dɔ-n miɛ̃.
8 #
Kor1 15.32
Ma dɔɔ̃nɔn lɛn, taãn nɛ, man giɛ li, máa ma fuu mɛn yɛ Azii gána nɛ, máa ka bɛ dɔ̃. Fuu lɛ la ma yii ni, á kiɛ̃ ma pàã yii la, ka ma daa ma pɛ, máa man die giɛ̃. 9Ma yiri ni, fuu kɛ na á dɔ gɛ̀ wɔ gɔn la. Bɛ lɛ-n ke, ma a n foo doɛ ma din ganaa doo wa, Lawa ke geren yii kiɛ, man doɛ bɛ ganaa. 10A din na á ma kirisibaa bɛ miã gɛ̀ kɛ lɛ ganaa. Á re ma kirisibiɛ doo dinin. Hiĩ, man má n foo doa a din lɛ ganaa, á tɔn die ma kirisibiɛ doo. 11Ka dɔn tá re n doe ma lɛ ka kaa Lawa nyankɔ nɛ. Lawa á re min gigiã a nyankɔ sii, a bɛa bǐɛ̃ kɛ zɛnaa ma nɛ, bɛa yɔrɔ kɛ la, min gigiã á re barka diɛ Lawa nɛ maa lɛa.
Pooli a zii tɔ-wɔ yɔrɔ bɔyaa boo
12Ma á boe la man din laakalaa ka màn kɔ́n nɛ. Bɛa màn lɛ á ke: Ma gɔ́ɔ̃gɔ́ɔ̃ ǹ taasiɛ ǹ nyɛɛ ma nɛ, mà má tɔ wɔ kanaa kɛ nɛ, sanparɛ kasɛn wɔ paǹ li, ka gɔ́ɔ̃ fubaa nɛ, ka Lawa a *yoreenbaa nɛ. Ma bie má zɛnaa ka minbuiinin sii-doɛ̃-n wa. Man má zɛnaa ka Lawa a bǐɛ̃baa barka nɛ. 13Ma bɛ́ sɛ́wɔn mɛnɛn diɛ ka la, ma bie màn kɔsɔ kiɛ̃ ǹ nɛ wa. Ka bɛ́ boe la, ka á màn mɛn pii ka tá a giala miɛ, man bɛ lɛ kiɛ̃ ǹ nɛ. Sɛnɛ, a tá ma yiri ni, máa ka á re boe la ka kɛ giala ma foaãnɛ. 14A giala sisia, ka ba a tumaa giala miɛ bɔrɔ wa. Sɛnɛ, Dɛnaa Yezu a wusoo a daa pinaa, ka á re n dinin kalɛɛ maa lɛa, ma dɔ á re n din kalɛɛ ka dɔn lɛa.
15-16 #
NDS 19.21
Man má n foo doa ka ganaa taãn-taãnɛ. Bɛ lɛ-n má tɔ́n lɛ kɔ, máa bɛ̀ ma á woe Masedoanɛ gána nɛ, máa ma á re boe ka li, bɛ̀ má n bɔyaa doo, ma da golee ka li. Bɛ̀ a na á n baa miɛ̃, bɛ̀ a n die foo kɔɔ̃n kɔ biɛ ka ganaa gunyin paa. Ka bɛ nɛ, bɛ̀ ka n die n doe ma lɛ, ka maa Zudee zii tɔ-wɔ kɛ nɛ. 17Bɛ a pɛ miɛ̃ kɛ a boe la a toa ka pɛ, mà ma a boo goon dali lɛa wa? Ma bɛ́ maa siin yɔrɔn boe lɔn, minbuiinbaa a bǐɛ̃ kɔ dinsɔɔ̃-n ma á giɛ li, a n boe la a toa ma pɛ mà «hiĩ, hiĩ», a da yaa «haayii, haayii» ni ma gɔ́ɔ̃ nɛ? 18Lawa n maa siére lɛa, ma boo mɛn da ka nɛ, a bie «Hiĩ, hiĩ» laanka «Haayii, haayii» lɛa wa koe. 19#NDS 18.5 A giala masɛ nɛ, ka Silaasi laanka Timote ne, wɔ Lawa a Nɛ Yezu Krita mɛn boo laakalaa kaa piɛ, a bie á goã pii mà «Hiĩ», a da yaa «Haayii» na a gɔ́ɔ̃-n wa. Ka bɛ-n dinin, a na á goã Lawa a «Hiĩ» lɛa. 20Sonbore ne, a din nə Lawa a lɛ-kɔ ǹ sii tumaa a «Hiĩ» diɛ lɛ piɛ̃. Yezu Krita a lɛa nɛ, wɔ á pii wáa «a n miɛ̃», wɔ n Lawa tɔ gole koe ne. 21Lawa na á toa ma gòãn nə́ doa, kun ka ka dɔn nɛ, Krita wɔbaa gɔ́ɔ̃ nɛ. A din Lawa lɛ na á wɔ bɔ á wɔ baa a din wɔn lɛa. 22A din na á ná a wɔbaa ǹ nyaǹ kiɛ̃ wɔ ganaa, a ná a Yiri Fu dɔ da wɔ foon ne. Bɛ n nyɛɛ mà a bǐɛ̃n mɛnɛn koa wɔ nɛ, mà wɔ á re bɛn yii.
23Lawa n maa siére lɛa; bɛ̀ má soɛ bɔ, a ma nyin papaã. Man máa ma a die ka yii wɛ̃ wa, bɛ lɛ-n má pɛ máa ma a die Korɛnti bɔrɔ wa. 24Goleemali wɔ paǹ li, wɔ ba li wáa wɔ sii kɔ́n da ka mìi-n wa. A giala, mà ka gòã doa parsiini goleemali gɔ́ɔ̃ nɛ. Sɛnɛ, wɔ ǹ taasɛ wáa wɔ dí nya kun ka nɛ kaa yii-nyɛɛ a lɛa.
දැනට තෝරාගෙන ඇත:
Kor2 1: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.