Kor1 16
16
Dɔmalɛ ǹ màn boo
1 #
Rɔm 15.25-26
Ka bɛ́ dɔmalɛ ǹ màn mɛn boboe Zeruzalɛmu a Lawa a sɔmɔ minin lɛa, bɛa boon man ke ma á re diɛ ka nɛ. Má a yɔrɔ nyaa Galaasin Lawa a sɔmɔ minin ni lɔn, ka dɔn nə kɔ lɛ ka zɛnaa miɛ̃ sɔnbɔraanɛ. 2Didie tumaa bɛ́ wɔrɔ mɛn yii, a kɔnpɛ ka a din pàã yii ni, dimaasi gogoon tumaa li, á boe la a bɛ koa a din li, bɛ̀ ma baa die. Ka zɛnaa miɛ̃, màn mɛn bɛ́ toɛ, ka nyan nə n yii da maa daa la ka tɔn bobo wa. 3Bɛ̀ ma din daa ǹ mɛn waáraa, ka min mɛnɛn bɔ, ma á re bɛn diɛ, ka sɛ́wɔn nɛ ǹ gɔn, ǹ wo kaa dɔmalɛ ǹ màn lɛ koa Zeruzalɛmu. 4Bɛ̀ á kɔnboe ma dinmaa wo kunun ǹ ni, ǹ tá re zii tɔ we kun ka ma nɛ.
Pooli a zii tɔ wɔ yɔrɔ bɔ ǹ gɔn
5 #
NDS 19.21
Ma á re woe boe ka Masedoanɛ gána nɛ, ma tɔn da ka li. Sonbore, ma á re bɛa gána kɛ wɔsɛ kɔn. 6Kɔntan, ma á re laanpaan yii ka li, kɔntan dinin ma bɔ̀nɔn tumu zɛnaa ka li. Màn mɛn bɛ́ toɛ, ma bɛ́ zoɛ̃ máa ma wo bǎã mɛn tumaa nɛ, ka n dɔ ma lɛ ka bɛa zii tɔ sii ni. 7Ma bie zoɛ̃ li máa ma da bɔ ka li ma kiɛ̃ wa, a tá ma yiri-n máa ma á re biikoo kɔ́n doe ka li, bɛ̀ Dɛnaa lɛ kɔ.
8 #
LWS 23.15-21; TDP 16.9-11; NDS 19.8-10 Sɛnɛ kanna, ma á re goɛ̃ Efɛɛzi kiwi, yǎa *Pantikɔti pinaa doe. 9A giala, a laan maa zɔ́ɔn tá mɔnaa nɛ, bɛa biikoo kɛ lɛ lɛ n koo, maa dí a yɔrɔ yɛ ganaa walan.
10 #
Kor1 4.17
Bɛ̀ Timote daa ka li, ka toa ka kũ doɛ̃ taãnɛ, a giala, a n Dɛnaa a dí nyɛɛ ka masɛ dɔ bɛ́ lɔn. 11Min kɔ́n nyan toa a n yii wɔ la wa. Ka toa ka n dɔ lɛ, a wusoo a da ma li ka là nyantoro ne. A giala, ma nə n yii diɛ la kun ka wɔ dɔɔ̃nɔn nɛ.
12Má wɔ dɔɔ̃n Apolɔɔsi nyankɔ taãn-taãnɛ, máa a da bɔ ka li kun ka wɔ dɔɔ̃nɔn lɛn nɛ. Sɛnɛ, a lɛ kɔ daa ganaa sisia wa. Bɛ̀ á biikoo yɛ, á re die boe ka li.
Dí giala-nyɔmɔɔn laanka fòo-diɛn
13Ka n yii dɔraa, ka goã doa-n sɔnbɔraa nɛ goleemali gɔ́ɔ̃ nɛ. Ka toa ka goã min kakan lɛa, ka foo n tã. 14Ka sii tumaa zɛnaa ka kɔn-narɛɛ nɛ.
15 #
Kor1 1.16
Dí goon nə ke doo, ma dɔɔ̃nɔn lɛn: Ka á doɛ̃ mà Tefanaasi laanka a kion minin man nə́ golee Lawa li bibinaanɛ Grɛki gána nɛ. A kũ bɛ lɛ ganaa, ǹ nə́ n dinin kɔ, ǹ nə́ dí nyɛɛ Lawa a sɔmɔ minin manɛ. 16Bɛa min sonboren kɛn miãn laanka min mɛnɛn bɛ́ dí nyɛɛ kunun ǹ ni, ǹ nə́ ǹ nɔmaa gii kɔn, ka n doa ka bɛn lɛ si.
17Ma foo á kɔɔ̃nɛ Tefanaasi a lɛa, ka Fortunatusu ni, ka Akayikusu ni, ǹ da ma li kɛ taman yii. Ǹ nə́ ma dɔ̀ɔ̃ pii ka dòo. 18A giala, ma foo basã ǹ sii gɔ́ɔ̃ nɛ, ka ǹ bɛ́ ǹ nə́ ka dɔn foo basã lɔn. Bɛa minin kɛn miãn tá kɔnboe ka ǹ tɔ bǐɛ̃ pɛ.
19 #
NDS 18.2
Azii a Lawa a sɔmɔ minin tá fòo diɛ ka nɛ. Akilaasi laanka Prisili ni, ka minin mɛnɛn bɛ́ n soe kɔn Lawa a sɔmɔ lɛa ǹ kion, bɛn dɔn tá fòo diɛ ka nɛ Dɛnaa wɔ gɔ́ɔ̃ nɛ. 20Wɔ dɔɔ̃nɔn mɛnɛn tumaa bɛ́ kànaa, ǹ tá fòo diɛ ka nɛ.
Ka dinin nə tɔrɔbaa ǹ fòo da kɔn nɛ sɔnbɔraa nɛ.
21Ma din Pooli n má boo lɛ a kɛ kiɛ̃ ka ma gɔn nɛ: Ka fòo.
22Bɛ̀ Dɛnaa a kɔɔ̃n min mɛn ganaa wa, koe bɔ ǹ dɛnaa ganaa! Maranata! – bɛ giala mà «Wɔa Dɛnaa, daa!»
23Dɛnaa Yezu a bǐɛ̃ die a goã ka li. 24Man ka tumaa narɛ Yezu *Krita wɔbaa gɔ́ɔ̃ nɛ.
දැනට තෝරාගෙන ඇත:
Kor1 16: SBPE2011
සළකුණු කරන්න
පිටපත් කරන්න
සසඳන්න
බෙදාගන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
San Bible Protestant Edition © Bible Society of Burkina Faso, 2011.