Mt 3
3
II. XTIKLAJIK LI XK'ANJEL LI JESUS (3,1—4,25)
Chetuqub'aq li xb'e li Qaawa'
(Mk 1,1-8; Lk 3,1-9, 15-17; Jn 1,19-28)
1Sa'eb' li kutan a'an kox'okaq laj Jwan aj kub'sihomha' chi ch'olob'ank sa' li chaqich'och' wank Judea. A'an a'in li esil kixpuktesi: 2“Cheyot' eech'ool chejal eek'a'uxl, xb'aan naq li xnimajwal wankilal li choxa ak nach' wank”, chan.
3Li propeet Isaías ki'aatinak junxil chirix laj Jwan naq kixye chi jo'ka'in:
“Xyaab' xkux li japjo re sa' li chaqich'och':
«Tuqub'omaq li xb'e li Qaawa',
tiikob'resihomaq li ruq' b'e chiru»”.#3,3 Is 40,3.
4Li raq' laj Jwan yiib'anb'il rik'in rix kameey, jun tz'uum-k'aam naxb'ak' wi' li xsa'; aj saak' naxtzeka rik'in xya'al saqk'aw. 5Ut neke'wulak laj Jerusalén rik'in, jo'wi' chixjunileb' laj Judea ut eb' li tenamit wankeb' chi xk'atq li nima' Jordán. 6Neke'xxooto li xmaakeb', ut laj Jwan naxkub'siheb' xha' sa' li nima' Jordán.
7Ab'an naq kiril naq naab'aleb' laj Pariseey ut laj Saduseey yookeb' chi chalk rik'in re raj naq te'kub'siiq xha', kixye reheb': “Ex ral q'anb'olay, ani xk'utuk cheru elelik chiru li josq'il chaalel sa' eeb'een?#3,7 Li josq'il chaalel a'an li xjosq'il li Yos sa' xkutankil li raqb'a aatin (cf. Am 5,18; 1 Ts 1,10). 8Chik'utunq b'i' sa' leeyu'am li naruuchin li yot'b'ach'oolej jalb'ak'a'uxl, 9ut meeb'alaq'i eerib' chi xyeeb'al sa' leech'ool: «A' laj Abrahán a'an qayuwa'». Xb'aan naq ninye eere naq li Yos taaruhanq chi risinkil sa'eb' li pek a'in ralal xk'ajol laj Abrahán. 10Ak wank li maal sa' xtoonaleb' li che'; ut chixjunil li che' ink'a' chaab'il li ru naxk'e, taayok'manq ut taakutmanq sa' xam. 11Laa'in ninkub'si eeha' yal rik'in ha', re naq teeyot' eech'ool teejal eek'a'uxl; ab'an li yo chi chalk chiwix a'an q'axal nim xwankil chiwu, ut laa'in ink'a' ink'ulub' xk'amb'al li xxaab'. A'an tixkub'si eeha' rik'in Santil Musiq'ej ut xam.#3,11 Li xam a'an reetalil li xk'anjel li Qaawa' Yos li nak'atok re chixjunil li maak sa' li qach'ool. 12Ak wan chaq xk'anjelob'aal sa' li ruq' ut tixyamtes li xch'oxleb'aal: tixk'uula li xtriiw sa' li xk'uuleb'aal, ab'an li xk'imal tixk'at sa' xam li maajoq'e taachupq”.
Xkub'ik xha' li Jesus
(Mk 1,9-11; Lk 3,21-22)
13Toja' naq kichalk chaq li Jesus Galilea ut kiwulak rik'in laj Jwan sa' li nima' Jordán re naq taakub'siiq xha'. 14A'ut laj Jwan ink'a' raj kiraj xkub'sinkil xha':
—Laa'in raj tento naq taakub'si inha' -chan-. Chan put ru naq nakatchal wik'in?
15Kichaq'ok li Jesus ut kixye re:
—Kanab' wan chi jo'kan anaqwan, xb'aan naq jo'ka'in taatz'aqloq ru qab'aan chixjunil li rajom li Yos.
Toja' naq kixk'ulub'an xch'ool laj Jwan. 16Ut naq ak xkub'siik xha' li Jesus, ki'elk chaq chi junpaat sa' li ha'; toja' naq kitehonk li choxa ut kiril li xMusiq' li Yos yo chaq chi kub'eek sa' xb'een kama' junaq mukuy. 17Ut ki'ab'iik jun xyaab' kuxej kichalk chaq sa' choxa, kixye: “A'an a'in li walal raaro inb'aan; rik'in a'in nasaho'k inch'ool”.
Выбрано:
Mt 3: QQC
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Q'eqchi DC Bible © Bible Society in Guatemala, 2005.