संत.जोहन 14
14
परमेसर जगुत सोदोरोअ रअः होरा
1“आपे आला मन आलु घबराव कोओ।” “परमेसर रे बिसवासेआपे ईङ रे होः बिसवासेपे। 2बाबा तिंग ओड़ाअ रे ताहिनोअ लःअय ढेर ठाँव एदनाआ, जदि एरे ताहिकोआ होले आपे के कंहड़ी गुल ताकेईंग, एता लःअय ची ईङ आपे लःअय ठाँव तेतेयार तोराइङा। 3आउर जदि ईङ सेन केते ठाँव तेयारेईंग, दो फिन हीःग केते, ईङ आपे के अपन दुबाःड़े इदीपेईंङ, ची जे एड़े ताहिनुईंग होनाःड़े आपे होः ताहिनपे। 4ईङ जे एड़े तोराइङा होनाःड़े रेनअः होरा के आपे पड़ीआपे।”
5थोमस हुनी के बेता लियाय “हे परभु आले नोःआँ होः काले पाड़ीआ ची आम ओकाते तोरामेंआ, दो होंड़े रेनअः होरा एता लकान पाड़ी केआले?”
6ईसु हुनी के बेता लियाय “होरा सचाई आउर जिनगी ईङ हेके। ईङ तरअः बेगार सेन कोअते, जाहें बाबा दुबाःड़े एरकु हीःग दड़ीआ। 7जदि आपे ईङ के पड़ीआपे, दो बाबातिङ के होः पाड़ी कियापे। नहाअः दो आपे परम बाबा के चिनहा होः चिनहा तदियापे आउर नेल होः नेल तदियापे।” 8फिलिप्पी हुनी के बेता लियाय “हे परभु आले के बाबा के देखाव ओले-मे नोःआँ आले लःअय ढेर एदनाआ।” 9ईसु हुनी के बेता लियाय। “हे फिलिप्पुस ईङ नुमिन दिन जगुत आपे लोः ताही निनिंग, सेरे होः आम ईङ के काम पड़ीआ? जे ईङ के नेल तदिङाय हुनी बाबा के होः नेल तदियाय, फिन आम एता लःअय बाबा के देखाव ओले-मे कंहड़ीयाम? 10एतान आम काम बिसवासेआ ची ईङ बाबा रे एदानिङा, आउर बाबा ईङ रे एदानिङा! नोःआँ सिख जे ईङ आपे के एमा पेईंङ अपन पखा तरअः काईंग कंहड़ीया बकिर बाबा ईङ रे ताही कोअते कमीयाय।” 11ईङ आला बिसवासेपे ची ईङ आपा रे एदानिङा आउर आपा ईङ रे एदानिया, कोवान दो ईङ आला काम रअः चलते गी बिसवासेपे। 12“ईङ आपे के सचे कंहड़ीओ दिपीईङ ची जे ईङ रे बिसवासेआय, नोःआँ काम जे ईङ कामीयींग हुनी होः कामी केआय, आउर नोःआँ तरअः होः जादे सेंड़ा काम कामी केआय, एता लःअय ची ईङ आपा दुबाःड़े तोराइङा। 13जे होः आपे ईङ आला नुमू रे कोयापे, ईङ आपे के हिना एमा केपेईंग, जेकर से होपोन तरअः आपा आला महिमा हुयाअः। 14जदि आपे ईङ आला नुमू ईदी केते ईङ तरअः जहान होः कोयापे, दो ईङ आपे के हिना एमा केपेईंग।
ईसु पबितर आतमा ए-एम रअः करार
15“जदि आपे ईङ के दुलारीङा पे दो ईङ आला हुकूम के मनाव कोआपे। 16ईङ आपा तरअः गोहराईङ, आउर हुनी आपे के मियांड एटाअ मा-मदाईती एम कियाय, जे जुग-जुग आपे लोः ताही कोआय। 17होना सचाई रेनअः आतमा हेके, जेके दुनिया एरे अपनाव दड़ीआ, एता लःअय ची हुनी, ना हुनी के निलीयाय आउर ना हुनी के पड़ीआय, आपे हुनी के पड़ीआपे, एता लःअय ची हुनी आपे लोः ताहिनोआय आउर हुनी आपे रे ताहिनोआय। 18ईङ आपे के टुरा इरिंग बाईःग तु पेआ, ईङ आपे दुबाःड़े हिजोईंग। 19थोड़ेक बेरा तयोम दुनिया ईङ के फिन एरे नेलिङा बकिर आपे ईङ के नेल किङापे, एता लःअय ची ईङ जिवीःड ताही कुईंग, आपे होः जिवीःड ताहिकोआपे। 20हेन हिला आपे पाड़ी केआपे ची ईङ आपा रे एदानिङा आउर आपे ईङ रे, आउर ईङ आपे रे। 21जे ईङ आला हुकूम पड़ीआकु, आउर होना के मनाआकु हिनी ईङ के दुलारिङाय, आउर जे ईङ के दुलारिङाय, हुनी के बाबातिङ दुलार कियाय, आउर हुनी के ईङ होः दुलार कियीङ आउर अपने के हुनी रे दिसतारोईङ।”
22जहुदा जे इसकारयोती काय ताही नेना हुनी के बेता लियाय, “हे परभु आम आले रे अपन के दिसतार केलेआम, दुनिया रे कोवान, नोःआँ रअः एतान मतलोब एदनाआ?”
23ईसु हुनी के कंहड़ी रूवाड़ोः लियाय, “जदि जाहें ईङ लोः पेरेम दोहोयाय, दो हुनी ईङ आला सिखाव के मनाव कोआय, आउर बाबातिङ हुनी के दुलार कियाय, आउर आलिंग हुनी दुबाःड़े हीःग केते हुनी लोः डेरा केआलिङ। 24जे ईङ लोः दुलार काकु दोहोया, हुंकू ईङ आला सिखाव के काकु मनाआ, आउर जे सिखाव आपे आयुमेआपे होना ईङ आला कोवान बकिर आपा आला हेके, जे ईङ के कुलगोःड तदिङाय।
25“नोःआँ बात आपे लोः ताहिनोअ बेरा ईङ आपे के निआँ उदूः ताडपेईङ। 26बकिर मा-मदाईती हुनी पबितर आतमा, जेके आपा ईङ आला नुमू रे कुलगोःड कियाय, हुनी आपे के जामा बात सिखाव केपेआय, आउर जे ईङ आपे के बेता ताडपेईङ होना जामा के उईहार चिकेपेआय। 27ईङ आपे लःअय सानती बाईःग तु ओ-दिपीईङ, ईङ आला सानती आपे के एमाअ दिपीईङ जे लकान दुनिया एमेआय होना लकान कनोआँ, आपे आला मन आलु घबराव कोओ आउर आलपे बोर 28आपे ईङ के नोकान कंहड़ी यअते आयुम तदिङापे, ची ईङ तोराईङा आउर फिन आपे दुबाःड़े हीःग कुईंग, जदि आपे ईङ लोः दुलार दोहो केआपे, दो ईङ आपा दुबाःड़े तोराईङा नोःआँ बात रे खुस कोआपे, एता लःअय ची बाबा ईङ तरअः सेंड़ा-आय। 29ईङ पहिल रेगी आपे के नोःआँ उदूः लेपेईंग, जेकर से नोकान हुयाव जुनोः रे आपे बिसवासेपे।
30“नहाअः दो ईङ आपे लोः जादे इरिंग बातेआ, एता लःअय ची नोःआँ दुनिया रिनी सरदार दराईया, हुनी के ईङ रे एतान हाक कनोआँ। 31बकिर जे लकान आपा हुकूम एम तदाय हिना लकानेईंग, जेकर से ची दुनिया पाड़ी गुल तआय, ची ईङ आपा के दुलारीयीङ।
“बिरिःड पे नोआँड़े तरअः सेनाबु।
Выбрано:
संत.जोहन 14: ASR
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2023 NLCI CC BY-NC-ND 4.0
