Matthew 3
3
1နှစ်နည်းနည်းကြာပြီးနောက်မှာ ရေနှစ်မင်္ဂလာဆရာယောဟန်ဟ ပေါ်ထွန်းလာမောက် ယုဒပ္လေရှိ တောကန္တာရaထဲမှာ တရားဟောနေလေဟယ်။ 2ယောဟန်ဟ "ရွှေမြို့တော်b ရဲ့ဆာဆနာတော်c ပေါ်ထွန်းလုနီးဟာဖြစ်ညောင်း နောင်တသံဝေဂရကြလော့" လောက် ဟောပြောလေဟယ်။ 3ယောဟန်ရဲ့အကြောင်းကော် အရိယာဆူတော်စင်ဟေရှာယဟ "တစ်ယောက်ယောက်ရဲ့အဆံဟ တောကန္တာရထဲမှာ အဆံအက္လယ်ဟုန်းန 'ဘုရားရှင်ရဲ့လမ်းကော် ပြင်ဆင်ကြလော့။ ဘုရားရှင်ရဲ့လမ်းကော် ညီညာဖြောင့်တန်းစေကြလော့' လောက် အော်ဟစ်နေလိမ့်မဲင်" ဆိုမောက် မိန့်ဆိုခဲ့လေဟယ်။ 4ယောဟန်ဟ ကုလားအုပ်မွေးနလုပ်ဟားတဲ့ အဝတ်ကော် ဝတ်ဆင်မောက် ခါးမှာ ဆရေကြိုးန ပတ်စည်းထားဟယ်။ ဆူဟ ပျားရည်နကျိုင်းကောင်d တော့ကော် အစားအဆောက်အဖြစ် စားဟယ်။ 5ပြီးခါ ဂျေရုဆလင်မြို့၊ ယုဒဒေသန ဂျော်ဒန်မြစ်ဝှမ်းတစ်လျှောက်လုံးဟ လူထုပရိတ်ဆတ်အကုန်ဟုန်းဟ ယောဟန်နားကော် ဆွားရောက်မောက် 6မိမိတော့ရဲ့ဒုစရိုက်အပြစ်တေကော် ဝန်ခံမောက် ဂျော်ဒန်မြစ်မှာ ယောဟန်နား ရေနှစ်မင်္ဂလာခံယူကြလေဟယ်။ 7ဟဲင်းပေမဲ့ အကြီးကျယ်များတဲ့ ဖာရိရှဲe တေန ဇဒ္ဒုကဲf တေဟ ရေနှစ်မင်္ဂလာခံယူဖော့ ဆူ့နားကော် လာကြဟာကော်မြင်ခါ ဆူ့တော့ကော် "မြွေဆိုးg တေသလဲ လူတေ၊ က္လရောက်လာတော့မဲ့ ဘုရားရှင်ရဲ့အပြစ်တရားစီရင်ခြင်းဟနေ ရှောင်ပ္လေးဖော့ သင်တော့ကော် မဆူ့ဟ သတိပေးခဲ့ဟား။ 8သင်တော့ရဲ့ အပြစ်ဒုစရိုက်တေကော် နောင်တသံဝေဂရကြောင်း ဆက်ဆေပြကြလော့။ 9အာဗြဟံဟ သင်တော့ရဲ့ ဖိုးဖေးဖြစ်ဟာဆိုရုံန အပြစ်တရားစီရင်ခြင်းဟနေ သင်တော့ လွတ်မြောက်နိုင်လောက် တွေးတောမနေကြနဲ့။ သင်တော့ကော် ငါပြောမဲင်၊ ဘုရားရှင်ဟ ဟဲင်းကျောက်တုံးတေကော် ယူမောက် အာဗြဟံရဲ့ မျိုးဆက်တေအဖြစ် ဖန်ဆင်းနိုင်ဟယ်။ 10ပုဆိန်တစ်လက်ကော် ဆစ်ပင်တေရဲ့ အမြစ်ပင်စည်နားမှာ အသင့်ထားဟားမောက် အဆီးကောင်း မဆီးတဲ့အပင်တိုင်းဟ ခုတ်လှဲခံရမောက် မီးထဲကော် ပစ်ခ္လခံရလိမ့်မဲင်။ 11ငါဟ သင်တော့ရဲ့နောင်တသံဝေဂရခြင်းအတွက် ရေနရေနှစ်မင်္ဂလာလုပ်ပေးဟယ်။ ဟဲင်းပေမဲ့ ငါ့နောက်မှာ ကြွရောက်လာမဲ့လူဟ ငါ့ထက်ကြီးမြတ်တဲ့လူ ဖြစ်မောက် ငါဟ ဆူ့ရဲ့ဖိနပ်ကော် ယူသယ်ပေးဖော့တောင် မထိုက်တန်ပေ။ ဆူဟ သင်တော့ကော် ဉာဏ်အလင်းတော်နရော၊ မီးနရော ရေနှစ်မင်္ဂလာပေးတော်မူလိမ့်မဲင်ဖြစ်ဟယ်။ 12ဆူ့လက်ထဲမှာ ကောက်သလင်းနယ်တဲ့ခက်ရင်းခွကော် ကိုင်ဟားမောက် စပါးအစေ့န အခွံ တေကော်ခွဲဖော့ အဆင်သင့်ရှိနေပြီးဖြစ်ဟယ်။ ဆူဟ စပါးစေ့တေကော် စပါးယိန်ထဲမှာ ထေ့ဆိမ်းဟားမောက် အခွံတေကော်ခါ ဖယ်ခါမှငြိမ်းလောက်မရတဲ့ မီးထဲမှာ လောင်ကျွမ်းစေလိမ့်မဲင်" လောက် မိန့်တော်မူဟယ်။ 13ဟဲင်းကာလမှာ ကိုယ်တော်ယေရှုဟ ဂါလိလဲပ္လေဟနေ ဂျော်ဒန်မြစ်နားရှိ ယောဟန်နားကော် ရေနှစ်မင်္ဂလာခံယူဖော့ ကြွရောက်လာလေဟယ်။ 14ဟဲင်းပေမဲ့ ယောဟန်ဟ ငြင်းလိုမောက် ကိုယ်တော်ကော် "ကျွန်ုပ်ဟပဲ ကိုယ်တော်နားမှာ ရေနှစ်မင်္ဂလာခံယူရမှာဖြစ်မောက် စာလောက် ကိုယ်တော်ဟ ကျွန်ုပ်နားကော် ရေနှစ်မင်္ဂလာခံယူဖော့ ကြွလာရဟား" လောက် ဆိုညောင်း 15ကိုယ်တော်ဟ "ဘုရားရှင်ရဲ့အလိုတော်အတိုင်းဖြစ်ညောင်း ခု ငါ့ကော် ခွင့်ပြုလော့" လောက် မိန့်တော်မူဟယ်။ ဟဲင်းခါ ယောဟန်ဟ ဆဖောတူမောက် ကိုယ်တော့်ကော် ရေနှစ်မင်္ဂလာလုပ်ပေးလေဟယ်။ 16ကိုယ်တော်ယေရှုဟ ရေနှစ်မင်္ဂလာခံယူမောက် ရေထဲဟနေပေါ်လာဟာန ကောင်းကင်ပြင်ကြီး ဟင်းလင်းပွင့်ဟားမောက် ဘုရားရှင်ရဲ့ ဉာဏ်အလင်းတော်ဟ ချိုးငှက်အသွင်န ဆင်းဆက်လာမောက် ဆူ့အပေါ်ကော် လာနားဟာကော် မြင်လေဟယ်။ 17ကောင်းကင်ပြင်မှလဲ "အဲလူဟ ငါချစ်မြတ်နိုးတော်မူတဲ့ ငါရဲ့ဆားဖြစ်ဟယ်။ ငါဟ ဆူ့ကော် အကြီးကျယ် နှစ်သက်အားရတော်မူဟယ်" ဆိုတဲ့ အဆံတော်ဟလဲ ထွက်ပေါ်လာလေဟယ်။
Выбрано:
Matthew 3: INT
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
