Matthew 28
28
1ဥပုသ်နေ့လွန်ပြီးနောက် ရက်သတ္တပတ်ရဲ့ပထမနေ့၊ အရုဏ်တက်ချိန်မှာ မာဂဒလမြို့ဆူမာရိန တခြားသောမာရိတော့ဟ စုတ်စံဂူကော် ဆွားကြည့်ကြလေဟယ်။ 2ဟဲင်းချိန်မှာ အကြီးကျယ်ပြင်းထန်တဲ့ ငလျင်လှုပ်လေဟယ်။ စာလောက်ဟားဆိုခါ ဘုရားရှင်ရဲ့နတ်ဒေဝါတစ်ပါးဟ ရွှေမြို့တော်ဟနေ ဆင်းလာမောက် ကျောက်တုံးကော် လှိမ့်ဖယ်မောက် ကျောက်တုံးအပေါ်မှာ ထိုင်နေညောင်း ဖြစ်ဟယ်။ 3ဟဲင်းနတ်ဒေဝါရဲ့ အဆင်းသဏ္ဍာန်ဟ လျှပ်စီးလက်သလဲ ဖြစ်မောက် ဆူ့ရဲ့အဝတ်ဟ နှင်းပွင့်သလဲ ဖြူဟယ်။ 4အစောင့်တေဟ ဟဲင်းနတ်ဒေဝါကော် ကြောက်ရွံ့ညောင်း တုန်လှုပ်မောက် လူဆေသလဲ ဖြစ်ဟားကြဟယ်။ 5ဟဲင်းခါ နတ်ဒေဝါဟ အမျိုးဆမီးတေကော် "မကြောက်ကြပါနဲ့။ သင်တော့ဟ လက်ဝါးကပ်တိုင်ပေါ်မှာ တင်ခံရတဲ့ ကိုယ်တော်ယေရှုကော် ရှာနေကြဟာကော် ကျွန်ုပ်ဆိပါဟယ်။ 6ကိုယ်တော်ဟ ခုနေရာမှာ မရှိတော့ဘူး။ စာလောက်ဟားဆိုခါ ကိုယ်တော်မိန့်တော်မူခဲ့တဲ့အတိုင်း အဆက်ပ္လန်ရှင်ဟားလောက်ပဲဖြစ်ဟယ်။ ကိုယ်တော် လှိုင်းတော်မူခဲ့တဲ့ နေရာကော် လာကြည့်ကြပါ။ 7ခုပဲ မ္လန်မ္လန်ဆွားမောက် တပဲ့တော်တေကော် 'ကိုယ်တော်ဟ အဆက်ပ္လန်ရှင်မောက် ဂါလိလဲနယ်ကော် အရင်ကြွဟားနှင့်ဝေါက်။ သင်တော့ အဲအရပ်မှာ ကိုယ်တော်ကော် တွေ့ကြရလိမ့်မဲင်' လောက် ပြောပြကြပါ။ ခုငါပြောခဲ့ဟာတေကော် မှတ်ဟားကြပါ" လောက် ပြောလေဟယ်။ 8အမျိုးဆမီးတေဟ ကြောက်ရွံ့ကြလယ်ဝ အကြီးကျယ်ဝမ်းမြောက်မောက် စုတ်စံဂူဟနေ အမ္လန်ထွက်ဟားကြမောက် တပဲ့တော်တေကော် ပြောပြဖော့ ပ္လေးဟားကြလေဟယ်။ 9ရုတ်တရက် ကိုယ်တော်ယေရှုဟ ဆူ့တော့နတွေ့ဆုံမောက် နှုတ်ဆက်လေဟယ်။ ဆူ့တော့ဟ ကိုယ်တော်နားကော် ချဉ်းကပ်မောက် ကိုယ်တော်ရဲ့ခေတော်ကော် ကိုင်မောက် ရှိခိုးကြလေဟယ်။ 10ပြီးခါ ကိုယ်တော်ယေရှုဟ ဆူ့တော့ကော် "မကြောက်ကြပါနဲ့။ တပဲ့တော်တေကော် ဂါလိလဲနယ်ကော် ဆွားဖော့ ဆွားပြောကြပါ။ အဲမှာ ငါ့ကော် ဆူ့တော့ တွေ့ကြရလိမ့်မဲင်" လောက် မိန့်တော်မူဟယ်။ 11ဟဲင်းအမျိုးဆမီးတေဆွားကြချိန်မှာ အစောင့်တပ်ဆားတချို့ဟလဲ မြို့ထဲကော်လာမောက် ဖြစ်ပျက်ခဲ့ဆမျှတေကော် ဂျူးပုရောဟိတ်အကြီးအကဲတေနား ပြောပြကြလေဟယ်။ 12ဟဲင်းခါ ဂျူးပုရောဟိတ်အကြီးအကဲတေဟ လူမျိုးခေါင်းဆောင်တေန တိုင်ပင်ဆွေးနွေးကြမောက် စစ်ဆားတေကော် ပိုက်ဆံအများဟုန်းပေးမောက် 13"'ညတုန်းဟ ငါတော့အိပ်ပျော်နေချိန် ကိုယ်တော်ယေရှုရဲ့တပဲ့တော်တေဟ လာမောက် အလောင်းကော် ခိုးဟားကြဟယ်' လောက် ပြောကြပါ။ 14ဟဲင်းသတင်းဟ ဘုရင်ခံရဲ့နားထဲကော် ရောက်ဟားခါ ဘုရင်ခံကော် ငါတော့ဖျောင်းဖျပေးမဲင်၊ သင်တော့ ဖယ်ဟာမှပူစရာမလိုဘူး" လောက် ဆိုကြဟယ်။ 15ဟဲင်းခါ စစ်ဆားတေဟ ပိုက်ဆံကော် ယူမောက် ဆူ့တော့ကော် ညွှန်ကြားထားတဲ့အတိုင်း ဆောင်ရွက်ကြလေဟယ်။ ဟဲင်းလဲန ဟဲင်းသတင်းဟ ဂျူးလူမျိုးတေကြားမှာ ခုနေ့ထိ ပ္လန့်နှံ့နေဟယ်။ 16ပြီးခါ တပဲ့တော်ဆယ့်တစ်ပါးတော့ဟ ကိုယ်တော်ယေရှုဟ ဆူ့တော့ကော် ဆွားဖော့ မိန့်တော်မူခဲ့တဲ့ ဂါလိလဲဒေသရှိ တောင်ပေါ်ကော် တက်ဟားကြမောက် 17ကိုယ်တော်ကော် တွေ့မြင်ကြတဲ့အခါ ရှိခိုးကြလယ်ဝ တပဲ့တော်အချို့ဟတော့ သံသယဖြစ်ခဲ့ကြလေဟယ်။ 18ဟဲင်းခါ ကိုယ်တော်ယေရှုဟ ဆူ့တော့နားကော် ချဉ်းကပ်လာမောက် "ရွှေမြို့တော်န ကမ္ဘာမ္လေပေါ်မှာ ရှိဆမျှအခွင့်အာဏာတေ ငါတော့ကော် ပေးအပ်တော်မူဝေါက်။ 19ကမ္ဘာပေါ်မှာရှိတဲ့ နိုင်ငံအကုန်ဟုန်းကော် ဆွားမောက် လူမျိုးအပေါင်းတေကော် ငါ့ရဲ့နောက်လိုက်တပဲ့တေဖြစ်လာစေဖော့ လုပ်ကြပါ။ အဲလူတေကော် အဖဘုရားရှင်၊ ဆားတော်န ဉာဏ်အလင်းရဲ့နံမေမှာ ရေနှစ်မင်္ဂလာပေးမောက် 20သင်တော့ကော် ငါပညတ်ထားဆမျှ အရာအကုန်ဟုန်းတော့ကော် စောင့်ထိန်းဖော့ ဆူ့တော့ကော် သွန်သင်ပေးကြပါ။ ငါဟလဲ ကပ်ကမ္ဘာကုန်ဆုံးတဲ့အချိန်ထိ သင်တော့နအတူ အမြဲရှိတော်မူနေမဲင်" လောက် မိန့်တော်မူဟယ်။
Выбрано:
Matthew 28: INT
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
