John 14
14
1ပြီးခါ ကိုယ်တော်ယေရှုဟ တပဲ့တော်တေကော် "စိုးရိမ်ပူပန်ဟာတေ မရှိကြနဲ့။ ဘုရားရှင်ကော် ယုံကြည်ကြပါ။ ငါ့ကော်လဲ ယုံကြည်ကြပါ။ 2အဖဘုရားရှင်ရဲ့အိမ်မှာ နေဖော့ အများဟုန်းရှိဟယ်။ ဟဲင်းနေရာဟ ဟုတ်တည်းတည်း မရှိဝူးဆိုခါ သင်တော့အတွက် နေဖော့အများဟုန်း ပြင်ဆင်ပေးမဲင်လောက် ငါပြောခဲ့မဲင်မဟုတ်ဘူး။ 3ငါဟ သင်တော့အတွက် နေဖော့ကော် ပြင်ဆင်ဖော့ ဆွားမောက် နောက်တခါ ပ္လန်လာတဲ့အခါ သင်တော့ကော် ငါရှိတဲ့နေရာကော် ခေါ်ဆောင်မှာဖြစ်ဟယ် 4ငါဆွားမဲ့နေရာကော် ရောက်တဲ့လမ်းကော် သင်တော့ဆိကြဟယ်" လောက် မိန့်တော်မူဟယ်။ 5သောမ ဟ ကိုယ်တော်ကော် "ကိုယ်တော်၊ ကိုယ်တော်ဟ ဖယ်အရပ်ကော် ဆွားတော်မူမဟားဆိုဟာကော် ကျွန်ုပ်တော့မဆိပဲညောင်း ဟဲင်းလမ်းကော် ဖယ်လဲဆိနိုင်မဟား" လောက် လျှောက်တင်လေဟယ်။ 6ဟဲင်းခါ ကိုယ်တော်ယေရှုဟ "ငါဟ လမ်း၊ သမ္မာတရားန အဆက်လဲ ဖြစ်ဟယ်။ ငါ့ကော် အမှီမပြုပဲခါ မဆူ့မှ ဖခမည်းတော်နားကော် မရောက်နိုင်ဘူး။ 7သင်တော့ ငါ့ကော် ဟုတ်တည်းတည်းဆိခါ ငါ့ရဲ့ဖခမည်းတော်ကော်လဲ ဆိလိမ့်မဲင်။ ခုဟနေစမောက် သင်တော့ဟ ဆူ့ကော် ဆိမောက် မြင်ကြရဝေါက်" လောက် မိန့်တော်မူလေဟယ်။ 8ဖိလိပ္ပုဟ "ကိုယ်တော်၊ ဖခမည်းတော်ကော် ကျွန်ုပ်တော့ကော် ပြသတော်မူခါ ကျွန်ုပ်တော့အတွက် လုံလောက်ပါပြီ" လောက် လျှောက်တင်လေဟယ်။ 9ကိုယ်တော်ယေရှုဟလဲ "ဖိလိပ္ပု၊ ငါဟ တချိန်လုံး သင်နအတူရှိနေဟာတောင် သင်ဟ ငါ့ကော် မဆိဆေးဘူးလား။ ငါ့ကော် မြင်တဲ့လူဟ ဖခမည်းတော်ကော် မြင်မဲင်ဖြစ်ဟယ်။ ဟဲင်းကြောင့်လောက် "ကျွန်ုပ်တော့ကော် ဖခမည်းတော်ကော် ပြပါ" လောက် သင်ဖယ်လဲဆိုနိုင်ဟား။ 10ငါဟ ဖခမည်းတော်ထဲမှာ ရှိမောက် ဖခမည်းတော်ဟ ငါ့ထဲမှာ ရှိတော်မူဟာကော် သင်မယုံဟာလား။ ငါပြောတဲ့စကားတေဟ ငါပြောဟာမဟုတ်ပဲ ငါ့အထဲမှာရှိတော်မူတဲ့ ဖခမည်းတော်ဟ ဆူ့ရဲ့အမှုတော်တေကော် ဆူလုပ်တော်မူဟယ်။ 11ငါဟ ဖခမည်းတော်ထဲမှာ ရှိမောက် ဖခမည်းတော်ဟ ငါ့ထဲမှာ ရှိတော်မူဟာကော် ယုံကြပါ။ ဟဲင်းလဲမဟုတ်ပဲခါ သင်တော့ဟ ငါလုပ်တဲ့အမှုကိစ္စတေကော် ကြည့်မောက် ယုံကြည်ကြပါ။ 12သင်တော့ကော် ငါအမှန်ပြောရခါ ငါ့ကော် ယုံကြည်ဆမားဟ ငါလုပ်တဲ့အမှုကိစ္စတေကော် လုပ်လိမ့်မဲင်။ ငါဟ ဖခမည်းတော်နား ဆွားမဲင်ဖြစ်ညောင်း ဆူဟ ဟဲင်းအမှုကိစ္စတေထက်ပိုမောက် ကြီးမြတ်တဲ့အမှုကိစ္စတေကော် လုပ်ဆောင်လိမ့်မဲင်။ 13သင်တော့လိုချင်တဲ့ အရာကော် ငါ့နားမှာ တောင်းလျှောက်ကြပါ။ တောင်းဆမျှကော်လဲ ငါပေးတော်မူမဲင်။ ဟဲင်းနည်းန အဖဘုရားရဲ့ ဘုန်းတော်ကော် ဆားတော်အနေန ဖော်ပြမဲင်။ 14ငါ့ကော် အမှီပြုမောက် ဖယ်ဟာကော်မဆို သင်တော့ဆုတောင်းခါ ငါပေးတော်မူမဲင်။ 15သင်တော့ဟ ငါ့ကော် ချစ်ခင်ခါ ငါ့ရဲ့ပညတ်ချက်တေကော် စောင့်ထိန်းကြလိမ့်မဲင်ဖြစ်မောက် 16ငါဟလဲ ဖခမည်းတော်ကော် တောင်းလျှောက်မောက် ဖခမည်းတော်ဟ တခြားကူညီမဲ့လူတစ်ယောက်aကော် သင်တော့နအတူ အမြဲထာဝရရှိနေစေဖော့ သင်တော့ကော် ပေးတော်မူမဲင်။ 17ဟဲင်းလူဟ စစ်မှန်တဲ့ ဉာဏ်အလင်းတော်ဖြစ်ဟယ်။ ခုလောကဆားတေဟ မြင်လဲမမြင်၊ ဆိလဲမဆိပဲညောင်း ဟဲင်းလူကော် လက်မခံဘူး။ ဟဲင်းပေမဲ့ ဟဲင်းလူဟ သင်တော့န အတူနေမောက် သင်တော့အထဲမှာ ရှိတော်မူညောင်း သင်တော့ဟ ဟဲင်းလူကော် ဆိကြလိမ့်မဲင်။ 18ငါဟ သင်တော့ကော် မိဖမဲ့ ဆားဆမီးသလဲ တစ်ယောက်တည်း ခ္လန်ထားခဲ့မဲင်မဟုတ်ဘူး။ သင်တော့နားကော် ငါပ္လန်ကြွလာအုံးမဲင်။ 19နောက်ထပ်အချိန်တနားကြာပြီးခါ အဲလောကဆားတေဟ ငါ့ကော် မြင်ကြရတော့မဲင်မဟုတ်ဘူး။ ဟဲင်းပေမဲ့ သင်တော့ဟ ငါ့ကော် မြင်ကြရအုံးမဲင်။ ငါဟ အဆက်ရှင်ညောင်း သင်တော့ဟလဲ အဆက်ရှင်ကြလိမ့်မဲင်။ 20ဟဲင်းအချိန်ရောက်ခါ ငါဟ ဖခမည်းတော်န အတူရှိဟာကော်ရော၊ ငါဟ သင်တော့နားမှာ ရှိနေဟာကော်ရော၊ သင်တော့ဟ ငါ့နားမှာရှိဟာကော်ရော ဆိကြရလိမ့်မဲင်။ 21ါ့ရဲ့ပညတ်တော်b တေကော် လက်ခံမောက် လိုက်နာစောင့်ထိန်းဆမားဟ ငါ့ကော် ချစ်ခင်ဆမားဖြစ်ဟယ်။ ငါ့ကော် ချစ်ခင်ဆမားဟ ငါ့ရဲ့ဖခမည်းတော်ကော် ချစ်ခင်ဆမားဖြစ်မောက် ငါဟ ဟဲင်းလူကော် ချစ်ခင်မောက် ဆူ့နားမှာ ငါ့ကိုယ်ငါ ထင်ရှားပြသတော်မူမဲင်" လောက် မိန့်တော်မူဟယ်။ 22ဟဲင်းခါ ယုဒရှကာရုတ်မဟုတ်တဲ့ တခြားယုဒဟ "ကိုယ်တော်၊ ကိုယ်တော်ဟ ခုလောကန သက်ဆိုင်တဲ့ လောကဆားတေကော် ထင်ထင်ရှားရှား ပြသတော်မူခြင်းမရှိပဲ စာလောက် ကျွန်ုပ်တော့ကော် ထင်ထင်ရှားရှား ပြသတော်မူဟား" လောက် လျှောက်တင်လေဟယ်။ 23ကိုယ်တော်ယေရှုဟ ဆူ့ကော် "ငါ့ကော် ချစ်ခင်မြတ်နိုးဆမား မဆူ့ညင်းညင်း ငါ့ရဲ့သွန်သင်မှုတေကော် လိုက်နာစောင့်ထိန်းကြလိမ့်မဲင်။ ငါ့ရဲ့အဖဘုရားရှင်ဟလဲ ဟဲင်းလူတေကော် ချစ်တော်မူမောက် ငါတော့ဟ ဆူ့တော့နားကော် လာမောက် ဆူ့တော့နအတူ နေထိုင်မဲင်ဖြစ်လေဟယ်။ 24ငါ့ကော် ချစ်ခင်မြတ်နိုးခြင်းမရှိတဲ့လူတေဟ ငါ့ရဲ့သွန်သင်ချက်တေကော် လိုက်နာစောင့်ထိန်းဟာလဲရှိမဲင်မဟုတ်ဘူး။ သင်တော့ ကြားရတဲ့စကားတေဟ ငါ့ရဲ့စကားတေမဟုတ်ပဲ ငါ့ကော် စေလွှတ်တော်မူတဲ့ အဖဘုရားရှင်ရဲ့စကားတေပဲ ဖြစ်ဟယ်။ 25ငါဟ သင်တော့နအတူရှိနေချိန်မှာ ဟဲင်းအရာတေကော် ဟောပြောခဲ့ပြီးဖြစ်ဟယ်။ 26ဟဲင်းပေမဲ့ ငါ့အတွက်ကြောင့် အဖဘုရားရှင် စေလွှတ်တော်မူမောက် ကူညီမဲ့လူဆိုတဲ့ ဉာဏ်အလင်းတော်ဟ အရာအကုန်ဟုန်းကော် သင်တော့ကော် သွန်သင်တော်မူမောက် ငါပြောဆိုခဲ့ဆမျှအရာတေကော် သင်တော့ကော် ပ္လန်အမှတ်ရစေတော်မူလိမ့်မဲင်။ 27ငါဟ ငြိမ်းချမ်းခြင်းကော် သင်တော့နားမှာ ထားရှိခဲ့ဟယ်။ ငါ့ရဲ့ငြိမ်းချမ်းခြင်းကော် သင်တော့ကော် ပေးခဲ့ဟယ်။ ခုလောကဟနေ ပေးတဲ့ငြိမ်းချမ်းခြင်းအတိုင်း သင်တော့ကော် ငါပေးခဲ့ဟာမဟုတ်ဘူး။ သင်တော့စိုးရိမ်ပူပန်ခြင်းတေ ကြောက်ရွံ့ခြင်းတေ မရှိကြနဲ့။ 28ါဟ ထွက်ဟားတော့မဲင်ဖြစ်လယ်ဝ သင်တော့နားကော် ပ္လန်လာအုံးမဲင်လောက် ငါပြောခဲ့ဟာကော် သင်တော့ကြားခဲ့ရပြီးဖြစ်ဟယ်။ သင်တော့ဟ ငါ့ကော် ချစ်မြတ်နိုးကြခါ အဖဘုရားရှင်နားကော် ငါဆွားဟာဖြစ်ညောင်း ဝမ်းမြောက်ကြလိမ့်မဲင်။ စာလောက်ဟားဆိုခါ အဖဘုရားရှင်ဟ ငါ့ထက် ကြီးမြတ်တော်မူဟယ်။ 29ဟဲင်းအရာတေ ဖြစ်ပျက်လာတဲ့အခါ သင်တော့ယုံကြည်မှုရှိကြဖော့ မဖြစ်ပျက်ခင် ခုချိန်ခါစ သင်တော့ကော် ငါပြောထားဟာဖြစ်ဟယ်။ 30ငါဟ သင်တော့န စကားအများဟုန်းပြောတော့မဲင်မဟုတ်ဘူး။ စာလောက်ဟားဆိုခါ ခုလောကကော် အုပ်ချုပ်မဲ့ဆမားဟ ရောက်လာတော့မဲင်ဖြစ်မောက် ဆူဟ ငါ့အပေါ်မှာ ဖယ်အခွင့်အာဏာန အုပ်ချုပ်နိုင်လိမ့်မဲင်မဟုတ်ဘူး။ 31ဟဲင်းပေမဲ့ ငါဟ အဖဘုရားရှင်ကော် ချစ်မြတ်နိုးမောက် အဖဘုရားရှင် မိန့်မှာထားတော်မူတဲ့အတိုင်း လုပ်ဆောင်ခဲ့ဟာကော် ခုလောကန သက်ဆိုင်တဲ့လူတေကော် ဆိစေချင်ဟယ်။ ထကြတော့။ ဟဲင်းနေရာဟနေ ဆွားကြရအောင်" လောက် မိန့်တော်မူခဲ့လေဟယ်။
Выбрано:
John 14: INT
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
