मत्ती 3
3
बप्तिस्मा याछ यूहन्नौ प्रचार
(मर्कूस १:१-८; लूका ३:१-१८; यूहन्ना १:१९-२८)
1वास्टै वर्ष न्हुइङ बप्तिस्मा याछ यूहन्ना यहूदियुङ उजाड ठावाङ राहा, र इट डेचै प्रचार जाट्की ठाला, 2“पश्चात्ताप जाट्नी, हीजैडेनाङ स्वर्गौ राज्य खेरेप राम्हने।” 3यशैया अगमवक्तै र इसे न यूहन्नौ बारेयाङ अघि लकीङ न इट डेमन्या:
“उजाड ठावाङ काट जना च्याक्चओ स्वर,
‘परमप्रभुओ लाम तयार जाट्नी,
र होसकुङ लाम सोझो खास्नी।’#यशैया ४०:३”
4यूहन्नै उँटौ भुत्लौ जाछ बढीन बील्न्हन्या, र कम्मराङ छालौ पेटी छ्याक्ङन्या अनि सलह र जङ्गलुङ मह ज्यामन्या। 5यरूशलेम सहर, यहूदिया र यर्दन नदी वरिपरियुङ पट्ट न भर्मीको यूहन्ना लेठाङ राहा। 6होटै लाहा लहो पापको स्वीकार जाट्चै यर्दन नदीयाङ यूहन्ना लकीङ बप्तिस्मा ला।
7तर फरिसी र सदुकीको मध्याङ वास्टै जना बप्तिस्मा लाकी राछै जाट्च डाङा र यूहन्नै होखुरीककी डेया, “ए विषालु बुलौ मीजाको, परमेश्वर लकीङ राखी पाच क्रोध लकीङ भोग्डीस्की नाखुरीककी सुये चेतावनी याहा? 8साँच्ची न नाखुरीकै पश्चात्ताप जाट्च हो डेनाङ होसे अनुसार काम जाटार टान्हाक्नी। 9‘कान अब्राहामौ सन्तान हो’ डेनाङ न नाखुरीक परमेश्वर लकीङ राछ दण्ड लकीङ भीस्की डीन्ल्हे डेम माआर्मीट्नी। साँच्ची न ङा नाखुरीककी डेले, परमेश्वरै इसे ल्हुङ्को लकीङ र अब्राहामौ लागि सन्तान खास्की ह्योक्ले। 10सीङौ म्यार्टुङकी फुस्कीयो लागि चाहाँ न होच्यो जराङ आउरा पर्न भ्यामने। होटबाटै सेछ मीस्या मास्याटाक्च पट्ट न म्यार्टुङकी फुसार म्हेयाङ लोम्होकाले।
11“नाखुरीकै पश्चात्ताप जाटा डेच कुरा टान्हाक्कीयो लागि ङा चहिँ नाखुरीककी डीयो बप्तिस्मा याल्हे, तर ङा डेनाङ न्हुइङ राछ काट जना ले, होसको ङा डेनाङ शक्तिशाली ले, होसकुङ जुत्ता बुच योग्यौ र ङा माले। होसकै नाखुरीककी पवित्र आत्मा र म्हेये बप्तिस्मा याल्हे। 12होसकुङ टाप्च न्हाङ्ल्या होसकुङ न मीहुटाङ ले र लहो खलाकी सफा जाट्ले, अनि गहुँ ढुकुटीयाङ जम्मा जाट्ले तर भुस चहिँ सेन र मासीच म्हेयाङ सीकाक्ङ याल्हे।”
येशूओ बप्तिस्मा
(मर्कूस १:९-११; लूका ३:२१-२२; यूहन्ना १:३२-३४)
13होडीक बेला यूहन्ना लकीङ बप्तिस्मा लाकी डेम येशू गालील लकीङ यर्दन नदीयाङ राहा। 14तर यूहन्नै होसकोकी इट डेयार रोकडीकी पा, “बरु ङाकी टी नाको लकीङ बप्तिस्मा लाकी आवश्यक ले। हीजै नाको टी ङा लेठाङ राहा ट?” 15येशूये होसकी डेया, “चँहुङ लागि याङ्च न छान्की यान्ही। हीजैडेनाङ इटजाट्न न कानै परमेश्वरौ पट्ट न इच्छाकी पूरा जाट्की पर्ले।” तब इसे कुरा सेयार यूहन्ना मन्डीया।
16येशू बप्तिस्मा लार तुरुन्तै डी लकीङ ख्योहा, होडीक न बेला स्वर्ग उघारीसा र होसकै परमेश्वरौ आत्मा ढुकुरौ रुपाङ म्हाका राहार लाहा मीटाक बाछ डाङा। 17अनि होडीक न बेला स्वर्ग लकीङ याङ्च आवाज सेया, “इसे ङौ जाक्ङ सेच मीजा हो, ङा इसेखाटा साप्फी माह्राङ्ने।”
Выбрано:
मत्ती 3: EMGP
Выделить
Поделиться
Сравнить
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2025 by Mother Tongue Translators Society and Wycliffe Bible Translators, Inc.
