मत्ती 1
1
येशूओ वंशावली
(लूका ३:२३-३८)
1अब्राहाम, दाऊदौ मीजा र येशू ख्रीष्टौ वंशावली: 2अब्राहामौ मीजा इसहाक लेया, इसहाकौ मीजा याकूब, याकूबौ मीजाको यहूदा र मेन डाजेभाइको लेया। 3यहूदौ तामार पटीयुङ मीजा फारेस र जाहेर, जाहेरौ मीजा हेस्रोन, हेस्रोनौ मीजा आराम, 4आरामौ मीजा अम्मीनादाब, अम्मीनादाबौ मीजा नहशोन, नहशोनौ मीजा सल्मोन, 5सल्मोनौ राहाब पटीयुङ मीजा बोअज, बोअजौ रुथ पटीयुङ मीजा ओबेद, ओबेदौ मीजा यिशै हो, 6र यिशैयो मीजा दाऊद लेया।
दाऊदौ मीजा सोलोमन लेया। सोलोमनौ मोइ चहिँ उरियाहौ मास्टो लेया। 7सोलोमनौ मीजा रहबाम, रहबामौ मीजा अबिया हो, अबियो मीजा आसा, 8आसौ मीजा यहोशापात हो, यहोशापातौ मीजा यहोराम, यहोरामौ मीजा उज्जियाह हो, 9उज्जियाहौ मीजा योताम, योतामौ मीजा आहाज हो, आहाजौ मीजा हिजकिया, 10हिजकियो मीजा मनश्शे हो, मनश्शेओ मीजा आमोन र आमोनौ मीजा योशियाह लेया। 11बेबिलोनाङ यहूदीकोलाक बन्दी खासार आल्छ बेलाङ योशियाहौ मीजा यकोनियास र मेन भाइको जन्मडीसा।
12होटै न्हुइङ बेबिलोनाङ बन्दी खासार आल्ह्रखीङ यकोनियासौ मीजा शालतिएल जन्मडीसा, शालतिएलौ मीजा यरुबाबेल हो, 13यरुबाबेलौ मीजा अबिउद, अबिउदौ मीजा एल्याकीम, एल्याकीमौ मीजा आजोर हो, 14आजोरौ मीजा सादोक, सादोकौ मीजा आखिम, आखिमौ मीजा एलिउद हो, 15एलिउदौ मीजा एलाजार, एलाजारौ मीजा मत्तान हो, मत्तानौ मीजा याकूब, 16र याकूबौ मीजा योसेफ हो। योसेफौ मास्टो चहिँ मरियम लेया र इसे न मरियमौ कोखीङ मुक्ति याछ ख्रीष्ट डेच येशूओ जन्म छाना।
17इटजाट्न अब्राहाम लकीङ दाऊदसम्म चौध पुस्ता छाना, र दाऊद लकीङ इस्राएलीको बेबिलोनाङ बन्दी खासार आल्छ बेलासम्म चौध पुस्ता न छाना। अनि होडीक बेला लकीङ मुक्ति याछ ख्रीष्ट जन्मडीस्च बेलासम्म फेरि चौध पुस्ता न छाना।
येशू ख्रीष्टौ जन्म
(लूका २:१-७)
18अब येशू ख्रीष्टौ जन्म इसे किसिमै छाना: होसकुङ मोइ मरियमौ योसेफखाटा ब्याहा जाट्की ङेम्ह भ्यामन्या, तर होखुरीकुङ ब्याहा छान्की डेनाङ अगाडि न मरियम पवित्र आत्मा लकीङ गर्भवती छान्नन्या। 19योसेफ धर्मी भर्मी लेया। होटबाटै होचे भर्मीकुङ म्याहासाङ मरियमकी अप्ठ्यारोवाङ मापार्च मीमन जाटार सुटुक्क डास्च निर्णय जाटा। 20तर याङ्च विचार जाट्न ङुनाङ परमप्रभुओ काट स्वर्गदूतै योसेफकी माङ्नामाङ डेया, “ए दाऊदौ मीजा योसेफ, मरियमकी मास्टोओ रुपाङ स्वीकार जाट्की नाको माबीह्रीनी, हीजैडेनाङ होच्यो गर्भाङ लेच मीजा चहिँ पवित्र आत्मा लकीङ ङुच हो। 21होचे काट लेन्जा मीजा जन्मडीले, र नाकै होसे बालकौ म्यार्मीन येशू#१:२१ येशू: येशू म्यार्मीन चहिँ हिब्रू शब्द “यहोशू” लकीङ राछ हो इच्यौ अर्थ “परमप्रभुये जीवाटाक्ले” डेच हो। डाकी। हीजैडेनाङ होसकै लहो भर्मीकोलाक होखुरीकुङ पाप लकीङ छुटकारा याल्हे।”
22परमप्रभुये अगमवक्ता लकीङ ङाक्च वचन पूरा छान्की डेम इसे छान्च हो: 23“ङोस्नी, कन्या मास्टो जजा गर्भवती छान्ने र होचे काट लेन्जा मीजा डीन्ल्हे। होटै भर्मीकै होसकोकी इम्मानुएल डेले।#यशैया ७:१४” इम्मानुएलौ अर्थ चहिँ “परमेश्वर काल्हाकोखाटा ले।”
24योसेफ रीङ्हा, र परमेश्वरौ स्वर्गदूतै माङ्नामाङ मेल्हाकी डेच कुरा मन्डीयार मरियमकी लहो मास्टोओ रुपाङ स्वीकार जाटा। 25तर मरियमै मीजा माजन्मडीठर योसेफै होसेखाटा सहवास माजाटा। अनि मरियमै मीजा डीन्रखीङ योसेफै होसे बालकौ म्यार्मीन येशू डा।
Выбрано:
मत्ती 1: EMGP
Выделить
Поделиться
Сравнить
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2025 by Mother Tongue Translators Society and Wycliffe Bible Translators, Inc.
