- नहेम्याह 6
6
नहेम्याह के बिरुद्ध साजिश
1जब सम्बल्लत, तोबियाह और अरबी गेशेम और हमाए और दुस्मनन हों जौ समाचार मिलो, कि मैं सहरपनाह हों बनवा चुको; लेकिन ऊ बेरा लौ मैं फाटकन में पल्ले नें लगा पाओ हतो, फिन भी सहरपनाह में कौनऊं दरार नें रै गई हती। 2तब सम्बल्लत और गेशेम ने मोरे लिगां ऐसो संदेसो पठैओ, “आ, हम ओनो के मेंदना के केफिरीम गांव में एक दूसरे सें भेंट करें।” परन्त बे मोरी हानि करबे की मन्सा रखत हते। 3परन्त मैंने उनके लिगां दूतों सें ऐसो संदेसो पठै दओ, “मैं तौ भौत काम में लगो आंव, उतै नईं आ सकत; ई काम हों छोड़कें तुमाए लिगां आबे सें जौ काम बंद काय रए?” 4फिन उनोंरन ने चार बेर मोरे लिगां बैसई संदेसो पठैओ, और मैंने उनहों बैसई जवाब दओ। 5तब पांचवीं बेर सम्बल्लत ने अपने सेवक हों खुली भई चिठिया देकें मोरे लिगां पठैओ, 6जीमें ऐसो लिखो हतो, “जात जात के लोगन में ऐसो कओ जात आय, और गेशेम सोई जाई बात कैत आय, कि तुमाई और यहूदियन की मनसा बलवा करबे की आय, और ई कारन तें ऊ सहरपनाह हों बनवा रओ आय; और तें इन बातन के अनसार उनकौ राजा बनबो चाहत आय। 7तेंने यरूशलेम में आगमवक्ता ठैराए आंय, जो एैसो कहकें तोरे बारे में परचार करें, कि ‘यहूदा में एक राजा आय’। अब ऐसोई समाचार राजा हों दओ जैहै। ई लाने अब आ, हम एक संगै सम्मति करें।” 8तब मैंने ऊके लिगां कहला पठैओ, “जैसो तें कैत आय, ऊंसो कछु भी नईं भओ, तें जे बातें अपने हिया सें गढ़त आय।” 9बे सब जनें जौ सोचकें हमें डराओ चाहत हते, “उनके हाथ ढीले पड़ैं, और काम बन्द हो जाबै।” परन्त अब हे यहोवा परमेसुर तें मोहों हिम्मत दे।
10फिन मैं शमायाह के घर में गओ, जो दलायाह कौ मोंड़ा और महेतबेल कौ पोता हतो, ऊ तौ घरई में रैत हतो; ऊने कई, “आ, हम यहोवा परमेसुर के भवन के भीतर आपस में भेंट करें और भवन के किवाड़ बन्द करें; कायसे बे लोग तोहों मारबे हों आहें, रातई हों बे तोहों मारबे हों आहें।” 11परन्त मैंने कई, “का मोरे जैसो मान्स भगै? और मोय जैसो को आय जो अपनो प्रान बचाबे के लाने भवन में पिड़ै? मैं नईं जाबे कौ।” 12फिन मैंने जान लओ कि ऊ यहोवा परमेसुर कौ भेजो मान्स नईंयां परन्त ऊने हर बात ईसुर कौ बचन कहकें मोरी हानि के लाने कई, कायसे तोबियाह और सम्बल्लत ने ऊहों रुपईया दे रखे हते। 13उनोंरन ने ऊहोें ई कारन रुपईया दे रखे हते कि मैं डर जाओं, और डरकें पापी ठैरों, और उनहों दोस लगाबे कौ मौका मिलै और बे मोरी नामधराई कर सकें। 14हे मोरे यहोवा परमेसुर! तोबियाह, सम्बल्लत, और नबिया नोअद्याह और जितेक आगमवक्ता मोहों डराओ चाहत हते, उन सबके ऐसे ऐसे कामन की याद धर।
सहरपनाह कौ काम पूरो होबो
15एलूल मईना के पच्चीसवें दिन हों मतलब बावन दिना के भीतरें सहरपनाह बन चुकी। 16जब हमाए सब दुस्मनन ने जा बात सुनी, तब हमाए चारऊं कोद रैबेवारे सब अन्यजाति डरा गए, और मुलक सरमिंदा भए; कायसे उनोंरन ने जान लओ कि जौ काम हमाए यहोवा परमेसुर की कोद सें भओ। 17उन दिना में सोई यहूदी रईसन और तोबियाह के मजारें चिठिया बिलात आत जात हथीं। 18कायसे ऊ आरह के मोंड़ा शकम्याह कौ दामाद हतो, और ऊके मोंड़ा यहोहानान ने बेरेक्याह के मोंड़ा मशुल्लाम की बिटिया हों ब्याह लओ हतो; ई कारन मुतके यहूदा के मान्सन ऊकी तरफदारी करबे हों बेवस हते। 19बे मोरी सुनतई ऊके भले कामन की चरचा करन लगत हते, और मोरी बातन सोई ऊहों सुनाओं करत हते। और तोबियाह मोहों डराबे के लाने चिठियां भेजत हतो।
Выбрано:
- नहेम्याह 6: BHB
Выделить
Копировать
Сравнить
Поделиться
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators