مَتّا 4
4
شئیتان ایسّایا چَکّاسیت
(مَرکاس 1:12–13؛ لوکا 4:1–13)
1رَندا، چه پاکێن روهئے رهشۆنیا ایسّا گیابانا شت تان شئیتان آییا بچَکّاسیت.#4:1 چَکّاسگ، بزان آزمائِش کنگ، اِمتهان گِرگ. 2چِلّ شپ و چِلّ رۆچ رۆچگ دارگا رند ایسّا شدیگ بوت. 3گڑا شئیتان په آییئے چَکّاسگا آتک و گوَشتی: ”اگن تئو هُدائے چُکّ ائے، اے سِنگان بگوَش نگن ببنت.“ 4ایسّایا پَسّئو دات: ”پاکێن کتابا نبیسگ بوتگ:
’مردم تهنا په نان زندگَ نبیت،
چه هُدائے زبانئے سجّهێن هبرانی مَنّگا زندگَ بیت.‘“ #4:4 موسّائے واز 8:3.
5پدا شئیتانا ایسّا پاکێن شهرا برت و مزنێن پرستشگاهئے دیوالئے بُرزترێن جاگها اۆشتارێنت و 6گوَشتی: ”اگن تئو هُدائے چُکّ ائے گڑا وتا چه اِدا جَهلاد دئور بدئے چێا که نبیسگ بوتگ:
هُدا په تئیی نِگهپانیا وتی پرێشتگان هُکمَ کنت و
آ، ترا وتی دَستانی دلا دارنت
تان تئیی پاد ڈۆکێا ملگّیت.“#4:6 زَبور 91:11–12.
7ایسّایا گوَشت: ”هئو، بله چُش هم نبیسگ بوتگ: وتی هُداوندێن هُدایا مچَکّاس و آزمائِش مکن.“#4:7 موسّائے واز 6:16.
8نون شئیتانا یکّ سکّێن بُرزێن کۆهێئے سرا برت و چه اۆدا دنیائے سجّهێن بادشاهی و آیانی شان و شئوکتی پێش داشتنت و 9گوَشتی: ”اگن تئو منی دێما کۆنڈان بکپئے و منا پرستش بکنئے، من اے سجّهێنان ترا دئیان.“ 10گڑا ایسّایا گوَشت: ”او شئیتان! چه منی دێما گُم بئے! پاکێن کتابا نبیسگ بوتگ: وتی هُداوندێن هُدایا پرستش بکن و تهنا هماییئے هِزمتا بکن.“#4:10 موسّائے واز 6:13. 11نون شئیتانا آ یله دات و شت. پرێشتگ آتکنت و ایسّائے هِزمتِش کرت.
ایسّائے هِزمتکاریئے بُنگێج
(مَرکاس 1:14–15؛ لوکا 4:14–15؛ یوهَنّا 4:43–45)
12وهدے ایسّا سَهیگ بوت که یَهیا دَزگیر کنگ بوتگ، گڑا جَلیلا شت. 13ناسِرَهئے شهری یله دات و کَپَرناهومئے شهرا جَهمنند بوت. کَپَرناهوم، جَلیلئے مَزَن‌گوَرمئے#4:13 مَزَن‌گوَرم، بزان دریاچه. کِرّا، زِبولون و نَپْتالیئے کَبیلهانی سرڈگارا اِنت. 14پمێشکا اے ڈئول بوت که اِشئیا نبیئے گوَشتن سَرجم ببیت:
15 زِبولون و نَپْتالیئے سرڈگار، گوَرمئے مزن‌راهئے سرا،
اُردُنئے کئورئے آ دستا، جَلیلئے هما هَند و هنکێن که درکئوم جَهمنند اَنت،
16 هما کئوما که زِندی تهاریا گوَستگ‌اَت،
مزنێن رُژنے دیست و
هما مُلک و ڈگار که اۆدا مَرک ساهێل اَت،
اۆدئے جَهمنندانی سرا رُژناییا سر جت. # 4:16 اِشئیا نبیئے کتاب 9:1–2.
17چه هما وهدا، ایسّایا اے کُلئو و پئیگامئے رسێنگ بُنگێج#4:17 بُنگێج، بزان بِندات، شُرو. کرت. گوَشتی: ”چه وتی گناهان پشۆمان ببێت و تئوبه بکنێت، چێا که آسمانی بادشاهی نزّیکّ اِنت.“
ایسّائے ائولی چارێن مرید
(مَرکاس 1:16–20؛ لوکا 5:2–11؛ یوهَنّا 1:35–42)
18وهدے ایسّا جَلیلئے مَزَن‌گوَرمئے لَمبا#4:18 لمب، بزان دامن، کِرّ. گام جنَگا اَت، دو براتی دیست، یکّے شَمون اَت که پَنّامی پِتْرُس اَت و دومی آییئے برات اَنْدْریاس اَت. آیانی کار ماهیگیری اَت و آ وهدا په ماهیگیریا وتی دام و ماهۆران گوَرما چێر گێجگا اَتنت. 19ایسّایا گۆن آیان گوَشت: ”بیاێت، منی رَندگیریا بکنێت و من شمارا اَنچُشَ کنان که ماهیگ گِرگئے بدلا، مردمانی دلا شکار بکنێت.“#4:19 دلئے شکار کنگئے مکسد مردمان هُدائے راها آرگ اِنت. 20آیان هما دمانا وتی دام یله دات و آییئے همراه بوتنت. 21وهدے کمّے دێما شت، دگه دو برات، آکوب و یوهَنّایی دیستنت که زِبْدیئے چُکّ اَتنت. بۆجیگئے#4:21 بۆجیگ، بزان لانچ، کَشتی. تها گۆن وتی پت زِبْدیا نِشتگ‌اَتنت و وتی ماهۆران سْراچگ و شَرّ کنگا اَتنت. ایسّایا آ لۆٹتنت. 22آیان هم وتی پت گۆن بۆجیگا یله دات و آییئے همراه بوتنت.
جَلیلئے دَمگا، ایسّائے هِزمتکاری
(مَرکاس 1:35–39؛ لوکا 4:42–44)
23ایسّایا سجّهێن جَلیلا تَرّ و گردَ کرت. آییا کَنیسَهانی#4:23 کَنیسَه، بزان یَهودیانی پرستشگاه. تها مردم درس و سَبکَّ دات، هُدائے بادشاهیئے مِستاگَ#4:23 مِستاگ، بزان وشّێن هال، بشارت. رسێنت و مردم چه ناجۆڑی و نادْراهیان جۆڑ و دْراهَ کرتنت. 24سجّهێن سوریَها آییئے نام و تئوار پْرشت و مردمان هر ڈئولێن ناجۆڑ و نادْراه، جِنّی، مِرْگیئے نادْراه،#4:24 مِرْگی اَنچێن نادْراهیے که مردما بێهۆش و کپ و گَجَّ کنت. اَربی و پارسیا ”صرعَ“. لَنگ و مُنڈ ایسّائے کِرّا آورتنت و آییا دْراهَ کرتنت. 25جَلیل، دِکاپولیس، اورشَلیم، یَهودیَه و اُردُنئے کئورئے آ دستئے هَند و دَمگانی بازێن مردمے آتک و ایسّائے همراه بوت.
Выбрано:
مَتّا 4: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2016-22 Wycliffe Bible Translators, Inc.