Mateo 15

Jaꞌ Wan Tzetyetal Chi Akꞌon Etex El Cu Naꞌbꞌal

(Marcos 7:1-23)

1Ey ebꞌ Fariseo yetoj ebꞌ cuywam yin sley Moisés jix tit bꞌey Jerusalén. Jix apni ebꞌ scꞌatan Jesús, catuꞌ jix skꞌanlen ebꞌ tet Naj jaxca tiꞌ:

2—¿Tzet yuxan cꞌam chi sbꞌeybꞌalne sbꞌeybꞌal ebꞌ kichmam ebꞌ ja cuywom tiꞌ? Ilaꞌ, cꞌam chi xꞌaꞌ skꞌabꞌ ebꞌ yet chi low ebꞌ,#15:2 Il tzet chi yal bꞌey diccionario yu Txꞌabꞌanil kꞌabꞌe. jaxca taꞌ sley ebꞌ kichmam tuꞌ, ẍi ebꞌ tet Jesús. 3Jix takꞌwi Jesús tet ebꞌ jaxca tiꞌ:

—Jal jex pax oj, ¿tzet yuxan cꞌam che jije pax wan chejbꞌanile jix yakꞌ can Dios? ¿Tzet yuxan asan wan scuybꞌanil ebꞌ je yichmam che bꞌeybꞌalne? 4Yutol albꞌilcan yu Dios jaxca tiꞌ: “Ey ojabꞌ yeloc apnoj je mam cꞌal je txutx yul je sat.”#Éxodo 20:12; Deuteronomio 5:16. “Jaꞌ mac chi bꞌuchon smam ma xutx, cam ojabꞌi,” ẍi Dios.#Éxodo 21:17; Levítico 20:9. 5Jal jex, jaex tiꞌ, che yalaꞌ, tol man sowalil oj chi colwa junoj mactxequel tet smam xutx, ta chi yal tet smam xutx jaxca tiꞌ: “Cꞌam niꞌoj tzet chi skeꞌ wakꞌon ey jex, yutol masanil tzet ey, ey jin an, yet xa Dios yei,” ta ẍi, caw watxꞌ che yabꞌe. 6Catuꞌ manxa sowalil oj chi colwa tet smam ma xutx je yaloni. Ilaꞌ ton che yute je yintajnen el chejbꞌanile ey can yu Dios, yu cꞌal scuybꞌanil je yichmam che bꞌeybꞌalne tuꞌ. 7Caabꞌ sat jex. Yel ton taꞌ tzet albꞌilcan yu naj Isaías je yin yet jix yalon jaxca tiꞌ:

8Jaꞌ wan ánima tiꞌ, yin cꞌal chꞌan stiꞌ ebꞌ, eyoc swatxꞌ kꞌane chi yal ey jin an. Jal snaꞌbꞌal ebꞌ, caw naat eel win an.

9Naꞌbꞌacꞌal chi tzꞌaj yiꞌey sbꞌa ebꞌ ey jin an. Asan wan ẍejbꞌanil ebꞌ ánima chi yakꞌ ebꞌ cuyle oj, ẍi Dios yul An Juun Tzꞌibꞌebꞌilcanoj, ẍi Jesús tet ebꞌ.#Isaías 29:13.

10Catuꞌ jix awteletej ebꞌ ánima scꞌatan yu Jesús, catuꞌ jix yalon tet ebꞌ jaxca tiꞌ:

—Jacbꞌawej je txiquin yin tzet oj walaꞌ, catuꞌ naꞌcha ojabꞌ el je yu. 11Manaj tzet chi octoj yul cu tiꞌ chi cu etnen el sattaj Dios. Jaꞌton tzet chi atej yul cu tiꞌ, jaꞌ chi cu etnen el yul sat Dios, ẍi Jesús tet ebꞌ. 12Yuxan, jix apni ebꞌ scuywom scꞌatan catuꞌ jix yalon ebꞌ tet Naj jaxca tiꞌ:

—¿Ja wotaj mi tol caw jix tit sjowal ebꞌ naj Fariseo ja win yu tzet jix ja wal tuꞌ? ẍi ebꞌ tet Jesús. 13Jix takꞌwi Jesús tet ebꞌ jaxca tiꞌ:

—Masanil awo tol manaj cu Mam Dios a satcan jix awoni, oj tokꞌle a yetoj cꞌal xeꞌ, yuxan queyton tuꞌ oj yun ebꞌ. 14Yuxan yilxa ebꞌ. Laan ebꞌ jaxca junoj mactxequel cꞌam chi skeꞌ yilwi, chi stzꞌaj squetz junojxa mac cꞌam chi skeꞌ yilwi. Kꞌinaloj ta ey junoj mac cꞌam chi skeꞌ yilwi, chi stzꞌaj squetz junojxa mac cꞌam chi skeꞌ pax yilwi, chi stokꞌletoj sbꞌa ebꞌ scawanil sat pacꞌan, ẍi Jesús tet ebꞌ. 15Catuꞌ jix yalon naj Pedro tet Jesús jaxca tiꞌ:

—Watxꞌ ta cha wal ey jon tzet chi yal yeloc apnoj jun txꞌoxbꞌanil kꞌaneal jix ja wal tet ebꞌ Fariseo tuꞌ, ẍi naj Pedro tet Jesús. 16Yuxan jix yal Jesús jaxca tiꞌ:

—¿Tumi jaex tiꞌ, cꞌam chi naꞌcha pax el je yu? 17¿Tumi man je yotaj oj tol jaꞌ tzet chi octoj yul cu tiꞌ, yul cu cꞌul chi ey apnoj, catuꞌ chi eli? 18Jal pax tzet chi atej yul cu tiꞌ, jaꞌ bꞌey cu naꞌbꞌal chi pitzcꞌu aoj. Jaꞌton wan tuꞌ chi cu etnen el yul sat Dios. 19Yuxan jaꞌ bꞌey snaꞌbꞌal ánima chi pitzcꞌu a masanil spenail. Jaxca makꞌo cam ánima. Jaxca mul yul skꞌabꞌ naj ichamile ma ix istile. Jaxca mul yet cꞌamto ketbꞌi. Jaxca elkꞌan. Jaxca naꞌo a kꞌane. Jaxca bꞌuchwal kꞌane. 20Jaꞌton wan tiꞌ chi etnen el ebꞌ ánima yul sat Dios ta chi yun ebꞌ. Jal ta cꞌam pax chi cu txꞌael cu kꞌabꞌ yet chi cu low tuꞌ xin, cꞌam chi cu etex el yul sat Dios, ẍi Jesucristo.

Ey Jun Ix Ix Man Israel Oj, Jix Yaoc Jesús Yin Scꞌul

(Marcos 7:24-30)

21Jix lawi tuꞌ xin, catuꞌ jix el Jesús bꞌey tituꞌ. Jix too bꞌey jun lugar bꞌey ey wan conobꞌ chi yij Tiro cꞌal Sidón. 22Eyecꞌ jun ix ix man Israeloj tituꞌ, a Canaán ix. Jix apni ix yintaj Jesús catuꞌ jix el yaw ix, jix yalon ix tet Naj jaxca tiꞌ:

—Mamin, jaach yicꞌaal naj David,* toloj wal chi okꞌ ja cꞌul win an. Ey jun ix wuneꞌ an, eyoc pena espíritu yin ix. Caw chi yabꞌ syaꞌil ix yu, ẍi ix tet Jesús. 23Ma cꞌal takꞌwoj Jesús tet ix. Catuꞌ jix apni ebꞌ scuywom scꞌatan Naj, jix yalon ebꞌ tet Naj jaxca tiꞌ:

—Watxꞌ ta cha chejcan meltzo ix, yutol caw chi awi ix kintaj, ẍi ebꞌ tet Jesús. 24Catuꞌ jix takꞌwi Jesús tuꞌ jaxca tiꞌ:

—Asan tet ebꞌ ket Israelal chejbꞌil jintej yu Dios. Yutol jaxca noꞌ meꞌ chi qꞌueyecꞌoj, queytuꞌ ebꞌ, ẍi Jesús. 25Jal ix ix tuꞌ, caw jix sjitztej sbꞌa ix scꞌatan ebꞌ. Jix sbꞌejey kaan sbꞌa ix sattaj Jesús. Jix yalon ix jaxca tiꞌ:

—Mamin, colwaan ey jin an, ẍi ix tet Jesús.

26—Caw man watxꞌoj ta chi tokꞌle ecꞌ sloꞌbꞌe ebꞌ uninale catuꞌ chi akꞌle tet noꞌ txꞌiꞌ,#15:26 Jaꞌ Jesús chejbꞌiltej tet ebꞌ Israel, ebꞌ sconobꞌ Dios. Jaꞌ ebꞌ a Sirofenicia, cꞌal ebꞌ a Canaán, man Israeloj ebꞌ. Jaꞌ ebꞌ Israel chi yal yin ebꞌ man Israeloj, tol txꞌiꞌ ebꞌ. Yuxan chi yal Jesús jaxca tiꞌ, yu yakꞌon porobꞌal ix, caxcꞌal yul sat Jesús laan yeloc apnoj ánima masanil. ẍi Jesús tet ix. 27Catuꞌ jix yalon ix tuꞌ tet Jesús jaxca tiꞌ:

—Yel ton Mamin, jaꞌton noꞌ txꞌiꞌ tuꞌ, chi sicꞌon a scꞌail sloꞌbꞌe ebꞌ unin chi eyqꞌuey yalan smeẍa naj ey sna tuꞌ, ẍi ix tet Jesús. 28Yuxan jix yal naj tet ix jaxca tiꞌ:

—Jaach tiꞌ chi wilaꞌ, tol yelcꞌulal cha waoc ja cꞌul yin Dios. Yuxan skeꞌ ojabꞌ ja wochwan, ẍi Jesús tet ix. Eyman jix waꞌxi scꞌul ix yuneꞌ ix tuꞌ.

Ecꞌal Ebꞌ Yaꞌey Jix Waꞌxi Can Scꞌul Yu Jesús

29Jix el Jesús bꞌey tituꞌ xin, catuꞌ jix too stiꞌlaj jaꞌ mar bꞌey Galilea. Jix atoj Naj bꞌey jun wonan, catuꞌ jix ey chotan Naj tituꞌ. 30Ecꞌal ebꞌ ánima jix apni scꞌatan Naj, bꞌey eyecꞌ Naj tituꞌ. Jix yiꞌon apnoj ebꞌ, ebꞌ cꞌam chi skeꞌ sbꞌeyi, ebꞌ cꞌam chi skeꞌ yilwi, ebꞌ cꞌam chi skeꞌ skꞌanabꞌi, ebꞌ man tzꞌajanoj smimanil, cꞌal wanxa ebꞌ yaꞌey yu yal cꞌal tzet syaꞌilal. Jix iꞌletej ebꞌ bꞌey yajantaj Jesús, catuꞌ jix waꞌxi can scꞌul ebꞌ yu Naj. 31Jix kꞌanabꞌ can a ebꞌ cꞌam cꞌaltaꞌ chi skeꞌ skꞌanabꞌi. Ebꞌ man cꞌaltaꞌ tzꞌajanoj smimanil, jix waꞌxi can ebꞌ. Ebꞌ cꞌam chi skeꞌ sbꞌeyi, jix bꞌey can a ebꞌ. Cꞌal ebꞌ cꞌam cꞌaltaꞌ chi skeꞌ yilwi, jix ilwi can a ebꞌ. Jaꞌ yet jix yilon masanil wan tiꞌ ebꞌ ánima tuꞌ, jix qꞌueya scꞌul ebꞌ. Catuꞌ jix yalon watxꞌ kꞌane ebꞌ tet cu Diosal jaon Israel jon tiꞌ.

Jix Low Ebꞌ Canebꞌ Mil Winaj Yu Jesús

(Marcos 8:1-10)

32Jix yawtetej ebꞌ scuywom Jesús, catuꞌ jix yalon tet ebꞌ jaxca tiꞌ:

—Caw chi okꞌ jin cꞌul yin wan ánima tiꞌ an, yutol oxebꞌxa cꞌual ey cꞌal ecꞌ ebꞌ ketoj titiꞌ. Jaꞌ tinaniꞌ, cꞌamxa tzet chi sloꞌ ebꞌ. Cꞌam chi woche chin chej pax ebꞌ bꞌey sna ta cꞌam chi low ebꞌ chi too ebꞌ. Ey smey chi pax yip ebꞌ yul-laj bꞌe, ẍi Jesús tet ebꞌ.

33—Caw ecꞌal ebꞌ, ¿tzet wal oj kakꞌ sloꞌ ebꞌ bꞌey jun cusiltaj txꞌotxꞌ tiꞌ? ẍi ebꞌ tet Naj.

34—¿Jayebꞌ ixim pan iꞌbꞌil oc je yu? ẍi Jesús tet ebꞌ.

—Jujebꞌ ixim pan yetoj jaycꞌon noꞌ pescado, ẍi ebꞌ tet Naj. 35Catuꞌ jix yalon Jesús tet ebꞌ ánima tuꞌ tol chi ey chotan ebꞌ sat txꞌotxꞌ. 36Catuꞌ jix yiꞌon a ixim pan tuꞌ, cꞌal jaycꞌon noꞌ pescado tuꞌ, catuꞌ jix yalon yu diosalil tet Dios yu. Catuꞌ jix spoꞌon eyoj, jix yakꞌon tet ebꞌ scuywom, jaꞌ ebꞌ cuywom tuꞌ, jix poꞌontoj xol ánima tuꞌ. 37Jix low ebꞌ masanil. Watxꞌ jix yun sno scꞌul ebꞌ. Jaꞌ yet jix lawi slow ebꞌ tuꞌ, jujebꞌ to xuc ixim sobra jix cancanoj. 38Canebꞌ mil winaj jix lowi, cꞌam chi oc ebꞌ ix cꞌal ebꞌ unin sbꞌisiloj. 39Jix lawi tuꞌ xin, jix yalontoj sbꞌa Jesús tet ebꞌ ánima tuꞌ, jix octoj yul jun barco catuꞌ jix too bꞌey jun lugar chi yij Magadán.

Selectat acum:

Mateo 15: knj

Evidențiere

Împărtășește

Compară

Copiază