Mateo 16

Ebꞌ Jix Skꞌan Yil Junoj Milagro Tet Jesús

(Marcos 8:11-13; Lucas 12:54-56)

1Ey ebꞌ Fariseo* cꞌal ebꞌ Saduceo* jix apni scꞌatan Jesús, yet chi ijbꞌale Naj yin spenail yu ebꞌ. Jix skꞌan ebꞌ yil junoj milagro* chi tit bꞌey Dios. 2Jix yalon Jesús tet ebꞌ jaxca tiꞌ:

—Jaex tiꞌ, jelan jex che naꞌ, jaꞌ yet yeycꞌualil che yal jaxca tiꞌ: “Man oj yakꞌ nabꞌ, ilaꞌ lalan stzꞌaꞌ asun,” je chi. 3Ey bꞌey xin, jaꞌ yet skꞌinibꞌalil che yal jaxca tiꞌ: “Yoc xa nabꞌ tiꞌ, ilaꞌ tol moyan, kꞌej jolinaj xacꞌal,” je chi. Jelan jex ton je yiloni, ta oj yakꞌ nabꞌ ma cꞌamaj. Caw cꞌam chi naꞌcha el je yu wan yechel chi txꞌoxon tzet yeoc jun tiempoal tinaniꞌ. Yuxan caabꞌ sat jex ton xin. 4Jaꞌ ánima yet jun tiempoal tiꞌ, caw pena ebꞌ, manaj yin Dios chi yaoc snaꞌbꞌal ebꞌ, yuxan tucꞌal chi skꞌan junoj milagro ebꞌ yilaꞌ, junoj tzet chi txꞌoxon yipal Dios. Asanxane jun milagro oj txꞌoxle tet ebꞌ, jaꞌton jun jaxca jun txꞌoxbꞌil yin naj Jonás yu Dios yet peyxa, ẍi Jesús tet ebꞌ. Jix lawi tuꞌ xin, jix el scꞌatan ebꞌ, catuꞌ jix toi.

Wan Scuybꞌanil Ebꞌ Fariseo

(Marcos 8:14-21)

5Jaꞌ yet jix ecꞌtoj Jesús yetoj ebꞌ scuywom bꞌey junxa skꞌaxepal jaꞌ mar, ma cꞌal snaꞌ ebꞌ yiꞌtoj sloꞌbꞌe. 6Catuꞌ jix yalon Jesús tuꞌ tet ebꞌ jaxca tiꞌ:

—Abꞌwej xin. Che yil cꞌal je bꞌa yu yich span ebꞌ Fariseo cꞌal yu yich span ebꞌ Saduceo, caw ey smey chex etex el yu, ẍi naj tet ebꞌ. 7Jix cꞌoli yalon ebꞌ cuywom tuꞌ xol ebꞌ jaxca tiꞌ:

—¿Yu mi cꞌam cu loꞌbꞌe iꞌbꞌil ku, yuxan queytuꞌ yaloni? ẍi ebꞌ. 8Jix yotajne el Jesús tzet chi yal ebꞌ, yuxan jix yal tet ebꞌ jaxca tiꞌ:

—¿Tzet yuxan miman che yaloꞌtane yu cꞌam je loꞌbꞌe iꞌbꞌil je yu? Caw cꞌam che yaoc Dios yin je cꞌul. 9¿Tumi cꞌam tocꞌal chi naꞌcha el je yu? ¿Tumi cꞌamxa che naꞌtej ixim joebꞌ pan jix sloꞌ ebꞌ joebꞌ mil winaj, yetoj jayebꞌ xa xuc ixim sobra jix ecꞌ je yambꞌa can aoj? 10Yetoj pax ixim jujebꞌ pan jix wakꞌ sloꞌ ebꞌ canebꞌ mil winaj. ¿Tumi cꞌamxa che naꞌtej jayebꞌto xuc ixim sobra jix ecꞌ je yambꞌa aoj? 11Jaꞌ yet jix wakꞌon bꞌina yich span ebꞌ Fariseo cꞌal ebꞌ Saduceo ey jex, ma naꞌcha el je yu tzet chi yal yeloc apnoj. Jaꞌ jix je yute je naꞌoni tol jaꞌ ixim jaꞌcaw pan chi wal an, ẍi Jesús tet ebꞌ. 12Jaꞌ yet jix yalon Jesús jaxca tuꞌ tet ebꞌ, catuꞌ jix naꞌcha el yu ebꞌ tol manaj jaꞌcaw yich pan chi yalaꞌ, jaꞌton scuybꞌanil ebꞌ Fariseo cꞌal ebꞌ Saduceo jix yal Naj yich panil.

Albꞌil Yu Naj Pedro Tol Jaꞌ Jesús, Jaꞌton Naj Cristo*

(Marcos 8:27-30; Lucas 9:18-21)

13Jaꞌ yet jix apni Jesús yetoj ebꞌ scuywom bꞌey conobꞌ Cesarea yul yet Filipo, jix skꞌanlen tet ebꞌ jaxca tiꞌ:

—Jain Akꞌbꞌil Wopiso yu Dios xol ebꞌ ket animail, ¿mac jin txequel yalon ebꞌ ánima che yabꞌe?

14—Ey ebꞌ chi aloni, jaach abꞌ Juan Bautista jaach. Ey ebꞌ xin, jaach abꞌ Elías jaach yalon ebꞌ. Ey ebꞌ xin, jaach abꞌ Jeremías jaach, ma xin junojxa ẍejabꞌ Dios ecꞌnaj peyxa, ẍi wanojxa, ẍi ebꞌ tet Jesús.

15—Jal jex pax oj, ¿mac jin txequel je yaloni? ẍi Jesús tet ebꞌ. 16Jix takꞌwi naj Pedro tet Jesús jaxca tiꞌ:

—Jaach tiꞌ, jaach ton Mesías*#16:16 Ma Cristo; Il tzet chi yal yul Diccionario yu “Cristo” cꞌal “Mesías”. jaach, Scꞌaal jaach Dios iquis, ẍi naj Pedro tet Jesús. 17Yuxan jix yal pax Jesús tet naj Pedro tuꞌ jaxca tiꞌ:

—Simón, scꞌaal naj Jonás, watxꞌ ja wet, yutol jaꞌ tzet jix ja wal tiꞌ man ánima oj jix alon ey jaach. Jaꞌton cu Mam eyecꞌ satcan jix akꞌon ja wotajne eloj. 18Jain chi wakꞌcan ja wij Pedro. (Pedro chi yal yeloc apnoj chꞌen). Jaꞌ yibꞌan jun miman chꞌen tiꞌ oj jin waꞌne atoj ebꞌ wiglesia. Jaꞌ jun wiglesia tuꞌ, cꞌam bꞌakꞌin oj akꞌle lawoj yu camich. 19Jaꞌ ey jaach oj wakꞌ slaweal yet chi oc Dios Yaawiloj ebꞌ ánima. Jaꞌ tzet oj ja wakꞌ sleyal yul yibꞌankꞌinal tiꞌ, eyxa cꞌaltaꞌ sleyal yu Naj a satcan. Jaꞌ tzet cꞌam cha wakꞌ sleyal yul yibꞌankꞌinal tiꞌ, cꞌam cꞌaltaꞌ sleyal yu Naj a satcan, ẍi Jesús tet naj. 20Jix lawi tuꞌ xin, catuꞌ jix yalon tet ebꞌ scuywom, tol manche cꞌal yalel ebꞌ ta tol Cristo ton Naj.

Yin Eyojto Cꞌal Jix Yalon El Jesús Tol Oj Camoj

(Marcos 8:31—9:1; Lucas 9:22-27)

21Jaꞌ yet tax jun tiempoal tuꞌ jix cꞌoli yalon Jesús tet ebꞌ scuywom, yin tzet oj jul yibꞌan Naj. Jix yalon jaxca tiꞌ:

—Sowalil oj jin toj bꞌey Jerusalén. Jaꞌ taꞌ tituꞌ oj toj wil syaꞌilal yu ebꞌ icham winaj yeoc yul conobꞌ, cꞌal yu ebꞌ yaawil ebꞌ yakꞌomal xaambꞌal tet Dios, cꞌal yu ebꞌ cuywam yin sley Moisés.* Oj jin yakꞌ cam ebꞌ an, jaxa yet yox cꞌual tuꞌ oj jin pitzcꞌu aoj, ẍi Jesús tet ebꞌ. 22Catuꞌ jix iꞌle el Naj xꞌojli yu naj Pedro tuꞌ, jix tenchanele Naj yu. Jix yalon tet jaxca tiꞌ:

—Mamin, caw man jaxca tuꞌ snaꞌon Dios. Jaꞌ wan tzet jix ja wal tiꞌ, ma skeꞌ sjul ja wibꞌan bꞌian, ẍi naj Pedro tuꞌ tet Jesús. 23Catuꞌ jix oc tꞌanan Jesús tuꞌ yin naj, jix yalon tet jaxca tiꞌ:

—Jaach Satanás, elan jin sattaj, yutol cha woche chi somcha el jin naꞌbꞌal. Manaj tzet chi snaꞌ Dios cha naꞌ. Asan yin yet ánima eyoc ja naꞌbꞌal, ẍi Jesús tet naj. 24Jix lawi tuꞌ xin, catuꞌ jix yalon tet ebꞌ scuywom jaxca tiꞌ:

—Ta ey mac chi yoche chi ecꞌ cꞌal cuywoj wintaj an, sowalil ojabꞌ manxa yetoj sbꞌa yul yet. Yabꞌ ojabꞌ syaꞌil ebꞌ jin yaꞌiloj, jaxca tol chi locbꞌale a ebꞌ yin culus. Ta bꞌejan scꞌul ebꞌ jaxca tuꞌ, ecꞌ ojabꞌ ebꞌ cuywoj wintaj an. 25Yutol jaꞌ ebꞌ cꞌam chi yoche chi cam bꞌey yul yibꞌankꞌinal tiꞌ, chi sbꞌejel ebꞌ jun kꞌinale tol ey cꞌal yin tobꞌalkꞌinal. Jal pax ebꞌ bꞌejan scꞌul scam jin yaꞌiloj an xin, jaꞌton ebꞌ tuꞌ oj chaꞌon kꞌinale tol ey cꞌal yin tobꞌalkꞌinal. 26Kꞌinaloj ta chi kakꞌ tzꞌajna kiꞌon masanil tzet ey yul yibꞌankꞌinal tiꞌ, jaꞌ ta cꞌam pax scolbꞌanil cu pixan, chi cu toocan bꞌey syaꞌtajilal yin junelne. ¿Tzet wal yopiso ku jaxca tuꞌ che naꞌ? ¿Tzet wal oj kakꞌ stooloj smanbꞌanil cu pixan? 27Jaꞌ jain Akꞌbꞌil Wopiso yu Dios xol ebꞌ ket animail tuxa oj jin jul yetoj swatxꞌilal cꞌal stzejejial jin Mam an. Oj jin jul yetoj ebꞌ wángel an. Catuꞌ oj wakꞌon spajtzebꞌal tet junjun ánima tuꞌ yin jatacꞌalaꞌ tzet jix el yuneni. 28Caw yel chi wal ey jex, ey jaywan je xol tiꞌ, cꞌamto chi cami, catuꞌ oj yilon ebꞌ jin juli, Jain Akꞌbꞌil Wopiso yu Dios xol ebꞌ ket animail tiꞌ, catuꞌ oj jin oc Yaawilal an, ẍi Jesús tet ebꞌ.

Selectat acum:

Mateo 16: knj

Evidențiere

Împărtășește

Compară

Copiază