Provebs 9
9
Wei blong Waes an wei blong Krangge
1Waes Toktok hemi olsem woman hu hemi wakem seleva
haos blong hem long sevenfala strong pos.
2Hemi kukim mit fo mekem fist, hemi redim waen,
an hem putum finis olketa kaikai long tebol.
3Hemi sendem go olketa wakamere blong hem,
olketa stanap long hae ples long taon an kolaot go long evriwan olsem,
4“!Yufala hu i no garem save, yufala kam!
!Yufala hu i no garem gudfala tingting, yufala kam!
5!Yufala kam kaikaim Save!
!Yufala kam dringim Gudfala Tingting!
6Lusim krangge wei blong yufala an falom wei blong mi,
bae yufala garem laef.”
7Stretem praod man bae hemi toknogud long yu,
tokstrong long nogud man bae hemi tokspoelem yu.
8No trae fo stretem man fo toknogud bae hemi heitem yu.
Stretem waes man bae hemi lavem yu.
9Tisim waes man bae hemi waes go moa,
tisim stret man bae hemi save go moa
10Stat blong waes nao, yu tinghae long Yawe.#Job 28:28; Sams 111:10; Provebs 1:7.
Fo save gudfala, yu mas save long Holi God nao.
11Waes toktok save mekem man laef fo longtaem.
12Sapos yu waes, bae yu hapi.
Sapos yu les long save, bae yu safa.
13Krangge hemi olsem woman hu hemi mekem tumas noes,
hemi nating save sem, an hemi nating garem save.
14Hemi sidaon long frant long haos blong hem wea hemi stap long hae ples long taon.
15Hemi kolem olketa hu i gopas nomoa.
16Hemi kol go long olketa olsem,
“Yufala hu i no garem save, yufala kam long haos blong mi.”
An hemi tok olsem long olketa hu i no garem gudfala tingting,
17“!Wata wea yu stilim, hemi suit moa!
!An kaikai wea yu kaikaim haed, hemi naes tumas!”#9:17 “Wata wea yu stilim... an kaikai wea yu kaikaim haed” tufala i tokpiksa long man hemi durong wetem woman. Lukim Provebs 5:15-20.
18Bat olketa nating save nomoa dat dae blong olketa hemi insaet long haos ya,
an olketa hu i go insaet i godaon finis insaet long grev.
Solomon Islands Pijin Bible © Bible Society of the South Pacific, 2008.