Provebs 8
8
Tokhae abaotem Waes Toktok
1Waes Toktok hemi kolaot kam.
Ya, hemi olsem gudfala woman hu hemi talemaot bikfala fo evriwan.
2-3Hemi kolaot bikfala kam antap,
antap long hil an saet long rod.#Provebs 1:20-21.
Long ples olketa rod i joen an long evri geit long taon,
hemi stanap fo kolaot kam olsem,
4“!Olketa! Mi kolaot go long yufala man.
Mi talemaot tingting blong mi long evriwan long wol.
5Yufala hu i no save tingting stret, yufala kam,
bae mi stretem tingting blong yufala.
Yufala no garem save, yufala kam,
bae mi mekem yufala garem save.
6Lisin kam gudfala, bikos toktok blong mi hemi gud,
an evrisamting mi talem hemi stret.
7Evri toktok blong mi hemi tru,
mi les nomoa long laea.
8Evri toktok mi talem hemi stret,
mi nating save talem toktok wea i no stret.
9Man hemi garem gudfala save,
hemi save dat evri toktok blong mi i gud.
Man hemi stret,
hemi save dat toktok blong mi i stret nomoa.
10Siusim tising blong mi, no siusim silva.
Siusim save blong mi, no siusim gol.
11Waes hemi gud moa winim olketa pel an daemen,
no enisamting wea yu laekem tumas hemi save winim hem.
12“Mi nao mi Waes Toktok, an mi stap tugeta wetem stretfala tingting.
Mi garem save an gudfala tingting.
13Sapos yu tinghae long Yawe, yu nating laekem nogud wei.
Mi les long praod wei, an wei fo tingdaonem eniwan.
Mi les long ravis wei an ravis toktok.
14Oltaem mi save mekem gudfala plan an givim gudfala tingting.
Mi save minim evri had samting, an mi garem paoa.
15Mi helpem olketa lida fo rul,
an gavman tu fo mekem gudfala lo.
16Mi helpem sif an bikman tu fo lidim pipol gudfala.
17Lavem mi, bae mi lavem yu.
Lukaotem mi, bae yu faendem mi.
18Mi save mekem yu kamap ris, an garem biknem.
Mi save mekem yu garem plande gudfala samting, an pipol tu mekhae long yu.
19Olketa samting wea mi givim,
hemi gud moa winim nambawan silva an gol.
20Oltaem mi falom stretfala wei,
an duim wanem hemi stret nomoa.
21Eniwan hemi lavem mi, bae hemi ris,
bae hemi garem plande gud samting long haos blong hem.
22“Longtaem bifoa, Yawe hemi mekem mi kamap fastaem bifoa hemi mekem disfala wol.#Revelesin 3:14.
23Bifoa, bifoa kam, hemi mekem mi bifoa long stat blong evrisamting long wol.
24Taem wea dipsi hemi no stap yet, an no eni springwata hemi stap yet,
bat mi stap finis nao.
25-26Bifoa Yawe hemi mekem olketa maonten an olketa hil
an bifoa eni graon o eni lan hemi stap,
bat mi stap finis nao.
27Mi stap finis bifoa hemi putum skae long barava ples blong hem,
an hemi makem ples wea skae hemi kasem long solwata.
28Mi stap finis bifoa hemi putum olketa klaod long skae,
an bifoa hemi openem olketa springwata from andanit long graon.
29Mi stap finis bifoa hemi mekem solwata fo stap long barava ples blong hem,
an bifoa hemi putum mak long ples wea solwata hemi save kasem nomoa,
an bifoa hemi mekem faondesin blong disfala wol.
30Mi stap nomoa long saet long Yawe olsem
man hu hemi mekem plan wea hemi waka falom.
Evri de nomoa mi hapi, bikos mi stap wetem hem.
31Mi hapi tumas bikos mi lukim disfala wol blong hem,
an mi barava hapi tumas tu long olketa pipol.
32“Olketa pikinini, lisin kam long mi.
Falom toktok blong mi, an bae yu hapi.
33Fo kamap waes, lisingud long tising blong mi.
Les long hem, bae yu no waes.
34Man hu hemi lisin long mi, hemi kam long haos blong mi fo lane.
An eniwan hu hemi stap wetem mi, bae hemi hapi.
35Man hu hemi faendem mi, hemi faendem gudfala laef,
an Yawe hemi hapi long hem olowe.
36Bat man hu hemi no faendem mi, hemi spoelem hem seleva nomoa.
An eniwan hu hemi heitem mi, hemi laekem tumas fo dae.”
Solomon Islands Pijin Bible © Bible Society of the South Pacific, 2008.