Htû̌sò̌htò̌ 80
80
Ta̤kwicaba dǒ lǎ̤nǐ̤bǎ sô̌ shigǎ aya
Pha Asa ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ ikǒlǒkò dǒ ta̤lṳhtò̌hôkû nutôpwa̤ aya. Dě tôbǎ sǎwǐ sô̌sô̌kû̌ Pha Asa ata̤sǎwǐ dǒ ami̤ kû̌ ta̤olò̤ ata̤phôta̤gî̌ ta̤sǎwǐ nutôshǒ.
1Ǒ pwa̤kè̌pǒ̤ǐ Isôrě̤la khlilèphû̌, khòsǎdô ganǎ̤de mò̌ pa.
Na mî̌ pwa̤sûǐ Phayṳ̂tǎ akhlialè tokhlǒ sô̌sô̌kû̌ kòyò akè̌pǒ̤ǐ sû̌phû̌sî.
Na hǎnòò̌ dǒ na gògǒhtahtò̌yô̤̌lǒ dǒ ahtò̌yô̤̌khlo kû̌ mǒkhû̌tanaphû̌ dǒ kòyò kaǎ lû̌û kû̌ Kherǔbenu akhû̌.
Bè̌lṳ̌ htò̌mò̌ na ta̤lîta̤kakha.#Hǎplǎge 25:10-22; Shamuěla awǐlǒ tôbǎ 4:4; Shamuěla ginǐ̤bǎ tôbǎ 6:2; Khwǐ ginǐ̤bǎ tôbǎ 19:15
2Bè̌lṳ̌htò̌mò̌ na ta̤pô̤ta̤phǎ dǒ Epharǐ khlilè, Bijame khlilè, Ma̤nǎshe khlilè nutokhlǒ alô̤mô̤̌ dě ma̤hǎplǎ mò̌ pa nî̌꤮.
3Ǒ꤮ Cǒmaradû̌, ǐ tîkhî sô̌ pashipagǎ, gwèbǎǐ pa, dě pa hǎplǎ nô̌ pě.#Htû̌sò̌htò̌ 4:6, 31:16, 67:1; Dane̤ěla 9:17
4Ǒ Cǒmara tûjû̌pwa̤ dǒ a pǒ ta̤ lǒ̤bò, na glè̌ sǎphlǒdû̌ li̤pi̤sǐ pepe pa ta̤kwicaba tǒ̤htû̌ bǎkhòtè pě?
5Na no ǎ asî ta̤sǎplǎ̤.
Na no ô asî mǐ̤sǎshi balě dǒ abe kû̌ mǐ̤sǎshinu.
6Na nosǎphlǒdû̌ bò pa kû̌ shigǎ dǒ a ô̌ te̤we̤phǔ kû̌ pa.
Asî sǎyî̤̌ tukutakǎ bò pa.#Htû̌sò̌htò̌ 44:13, 79:4
7Ǒ Cǒmaradû̌ dǒ a pǒ ta̤ lǒ̤bò, ǐgesô̌ pashipagǎ, sǎyṳ̌klanǐ̤ pa, tǒ̤ dě pa hǎplǎ.
8Na kaǎhǎhtò̌genǐ̤ nakòyò dǒ Ijǐgǎ sô̌sô̌kû̌ na phǐgeǐ sîpî̌phò dě na geshǒǐ yǎnu.
Na wṳ̂̌hǎhtò̌gebò khlilèphû̌ ashǔshawa̤ ô̌nǎwǐ bǎ Khana̤gǎkû nutokhlǒ.
Na no ô̌ kû̌ na kòyò sô̌sô̌kû̌ na geshǒǐ sîpî̌mṳ̌.#Mǒhtûlû̌hǎhtûsa 49:22; Yashǎya 5:1-11, 27:2-6; Yṳ̂ha 15:1-6
9Na ma̤plîma̤bò bǎ asî lǎ̤shǒ sîpî̌mṳ̌ gûlǎ̤hǒ.
Na no shě lò̤yô̤̌ akhò̌wǐ̤ tôgǎlǎ̤.
10Isôrělaphû̌ amè̤̌kû̌ sîpî̌mṳ̌ nî̌, a yṳ̂cû̌ bǐ bò khôlôdû̌khôlôhtû sîtokhlǒ.
Aphò tokhlǒ dě a yṳ̂bǐ bò sǒmṳ̌dû̌ tôgǎlǎ̤.
11Asî yṳ̂cû̌peshe tǒ̤ bò dǒ gǎhtu.
Asî sahtò̌ ô̌ lô̌khô bǎ Mèdihtûreniya shidû̌shite̤we̤ tǒ̤htǔ Yǔbaretǐ shilô̤̌mǒ̤.
12Bǎbǎkǎlè khònò̤̌, na cû̌ma̤tě̤pò̌tě̤pro̤ bò Îsôrěla awe̤ tokhlǒ ma̤titè?
Khlilèphû̌ ashǔshawa̤ tokhlǒ hènṳ̌bò dǒ we̤kû dě nṳ̌bě ǎhǔbò sîpî̌sǎ.
13Khlilèphû̌ ashǔshawa̤ tokhlǒ sô̌sô̌ lô̌khô kû̌ htô̌mi̤, a hènṳ̌ yî̤̌pwî̌ bò asîgǎ.
Asô̌sô̌kû̌ ta̤mi̤ta̤mò̤̌ nṳ̌ǎbò asî hǔklakhû̌.
14Ǒ Cǒmaradû̌ dǒ a pǒ ta̤ lǒ̤bò, hèlò̤ sô̌mò̌ dǒ paô̌ bǒo, ô̌ dǒ mǒkhû̌ dě kè̌lò̤ mò̌, kè̌ǐ mò̌ sîpî̌mṳ̌ amè̤̌kû̌ na kòyònu.
15Kè̌pǒ̤ǐ mò̌ sîpî̌mṳ̌ amè̤̌kû̌ na kòyò dǒ na shǒǐ yǎnu.
Ma̤hǎplǎge mò̌ sîpî̌mṳ̌ dû̌htò̌sa dǒ na no dô̌wî̤dô̌wô̌ anu.
16Pwa̤sǎkhě pa tokhlǒ pě̤kèbò na sîpî̌mṳ̌bô, dě a shǔu kèbò lû̌û.
Na sǎhtǎdû̌da na kòyò tokhlǒ, dě apî̌alṳ̂̌ kèbò.
17Kè̌pǒ̤ takabǐǐ kòyò dǒ na rû̌htò̌ lû̌û, kòyò dǒ na ǐshû̌ǐshohtò̌ lû̌û kû̌ naya tûû̌ nutokhlǒ nî̌.
18Na kè̌ ma̤pô̤̌nudě pa cû̌tepheyî̤ kè kû̌ nô̌ na tô̤̌.
Ǐshû̌ǐshohtò̌ sô̌ pa.
Pa glè̌ cubucabahtò̌ na pě.
19Ǒ꤮ Běcǎ Cǒmara tûjû̌pwa̤ dǒ a pǒ ta̤ lǒ̤꤮ bò, ǐ tîkhî sô̌ pashipagǎ.
Gwèbǎǐ pa, tǒ̤꤮ dǒ pa hǎplǎ.
Selectat acum:
Htû̌sò̌htò̌ 80: KXF
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Wycliffe USA