Htû̌sò̌htò̌ 79
79
Ta̤kwicaba dǒ ta̤ma̤hǎplǎge khlilèphû̌ aya
Pha Asa ata̤sǎwǐ htû̌sò̌htò̌.
1Ǒ Cǒmaradû̌, pwa̤sǎkhě pa khlilèphû̌ ashǔshawa̤ tokhlǒ hènṳ̌ shěpè̤̌kè bò shigǎ dǒ na ǐ pa nuhǒ.
Asî hèma̤ phû̌mò̌shî̌htô bòkè na ta̤lṳhtò̌hô plò̌shǐ nuhǒ.
Asî ma̤lò̤tě̤pro̤kè bòkè Wî̤̌yarǔshale nuhǒ.#Khwǐ ginǐ̤bǎ tôbǎ 25:8-10; Lî̤wě̤mǎnǎ ginǐ̤bǎ tôbǎ 36:17-19; Yeramǐya 52:12-14
2Asî bǔǎ kèbò na pwa̤ma̤ta̤phû̌ tokhlǒ alṳ̌tṳ̂̌ kû̌ htû̌patǐ dǒ mǒlǎ̤ nuhǒ.
Asî bǔǎ kèbò na kòyò dǒ acǒ kû̌ yô̤̌ tokhlǒ ayî̌ kû̌ ta̤mi̤ta̤mò̤̌.
3Asî ma̤si na kòyò dě asǐ lò̤ tewe̤bò bǎ Wî̤̌yarǔshale kòshî̌ asô̌sô̌kû̌ shi.
Pwa̤ lǔlò̤ lṳ̌tṳ̂̌ tokhlǒnu, a ô̌kèpe tôpwǎ̤ tô̤̌.
4Khlilèphû̌ dǒ a ô̌ te̤we̤bò kû̌ pa nutokhlǒ a hî̌jî̌hî̌jû̌, pòhò, pî̤jî̌ǐsho bòkè pa.#Htû̌sò̌htò̌ 44:13
5Ǒ Cǒmara tûjû̌pwa̤, na glè̌ sǎphlǒdû̌ yî̤ pa tǒ̤htû̌ bǎkhòtè pě? Mî̌ tûjû̌pwa̤ pěya?
Na glè̌ sǎphlǒdû̌ li̤pi̤sǐ pa sô̌sô̌kû̌ mî̌gè̌nṳ̌ tǒ̤htû̌ bǎkhò̌tè pěya?#Htû̌sò̌htò̌ 89:46
6Sǎphlǒdû̌ mò̌ khlilèphû̌ shǔshawa̤ dǒ a sî̌ganǎ̤ na tô̤̌ nutokhlǒ.
Sǎphlǒdû̌ li̤pisǐ mò̌ shigǎ shǔshawa̤ dǒ a caba na tô̤̌ nutokhlǒ.#Yeramǐya 10:25
7Asî ma̤si bòkè na kòyò Isôrělaphû̌ tokhlǒ hǒ.
Asî ma̤pî̌ma̤lṳ̂̌ kèbò pa shigǎ hǒ.
8Paphipaphu dǒ awǐnu tokhlǒ ata̤sǔta̤plě akhû̌akhî, no khòbǎ tǎ̤ pa mǎ̤ nî̌.
Pa sǎphlǒpî̌ kèbò akhû̌akhî, gwèbǎǐ mò̌ pa khònò̤̌ nî̌.
9Ǒ Cǒmaradû̌, pwa̤ma̤hǎplǎ pa.
Pô̤̌khô nami̤ glè̌ ta̤siwi̤dû̌sòwò̤htû ayanu, ma̤jè̌ mò̌ pa nî̌.
Pô̤̌khô kòyò glè̌ bè̌dubè̌nǎ̤ nami̤ ayanu, ma̤hǎplǎge mò̌ pa, plûkè pa ta̤sǔta̤plě tokhlǒ nî̌.
10Ǒ Cǒmaradû̌, dǐ hî̌ tǎ̤ khlilèphû̌ ashǔshawa̤ nutokhlǒ kû̌, “Sî Cǒmaradû̌ ô̌ bǎtè?”
Khlilèphû̌ ashǔshawa̤ tokhlǒ sî̌ganǎ̤ kû̌ a ma̤si na pwa̤ma̤ta̤phû̌ nutokhlǒ dě na ma̤ geshî̌shu asî nu, dǐkè̌shǐ pa nî̌.
11Ganǎ̤de mò̌ kòyò ô̌ dǒ apô̤kû nutokhlǒ ata̤kiǐkoo.
Ma̤hǎplǎ kòyò dǒ kòyò glè̌ cî̌htò̌si asî nutokhlǒ kû̌ na ta̤sîrîpô̤phǎ.
12Ǒ Běcǎdû̌, dǒ khlilèphû̌ shǔshawa̤ tokhlǒ hî̌jî̌hî̌jû̌ na akhû̌akhî, ma̤ geshî̌shu sô̌mò̌ asî susô̌tôplǎ.
13Htodě pa mî̌ na kòyò tokhlǒ dǒ asô̌sô̌kû̌ sû̌phû̌ dǒ na akè̌pǒ̤ǐ a dǒ lǎ̤ǎshǎkhû̌.
Pa glè̌ hî̌bwǐhî̌sîrîhtò̌ na tûjû̌pwa̤ talakhǎ pě.
Pa glè̌ htû̌sò̌htò̌ na tôhtu hto tôhtu pě.
Selectat acum:
Htû̌sò̌htò̌ 79: KXF
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Wycliffe USA