Zakariya 9
9
Ipanzyo pamyiko mipalamane
1Yaa amazwi ya Mfumu e Leza. Wuma imbila yakusunda awamunsi yakwe Hadiraki, nakaya kakwe Damasika. Awamwiko wakwe Israeli watupu pole, ukuwa insi yonsi pano yapakula aya Mfumu e Leza. 2E Hamati, wino vyapakana mumpaka nu Hadaraki nawenye awakwe, nutwaya twamwe Ture nu Sidoninye, nukuchenjela kwamana yawo yonsi avyakwe. 3Ture wayizenjela amalinga yakwe, swinya walundisile silivara nu golide—aviwa avyavye ngati aviswaswa! 4Ukuwa Imfumu e Leza alisenda apyele vyonsinye-pyu vmo ali navyo. Ayize akasumbile msawo yakwe mwesumbi nakaya kochwe kamongoke.
5Akaya kakwe Ashikeloni kalilola chonye-choo, kayizakazila. Akaya kakwe Gaza kalilola uwulumila wukulu. Nakaya kakwe Ekroninye—ukulolela kwakwe kuliwa akwavye. Gaza alisowelwa imfumu yamwenemo, nu Ashikeloni alisyala nanti wantu. 6Imyiko yawantu walekane-lekane waliwakwikala mwe Ashidodi. Imfumu akuti, ndiyichilizya pansi awa Filisitinye waa awatumbe. 7Watandi walange walandalila ukulya myama nuwazi mwenemo, nanti akulya ichakulya chinji chino chaleswa ukuluya. Wonsi wane wiza wapusuka waliwa awantu wane, wawe ngati awamwiko wawe Yuda. Nu Ekroninye aliwa achipya chawantu wane, ndivino awa Jebusi wawile awane. 8Ndichinjilila insi yane ndesye awalwani ukuti watize waputunsiania mwenemo. Ntalizumilizya wachiluchilu ukukwelengula awantu wane swmya, Mbweni vino awantu wane wakuyimba.
Imfumu yino ilipyana
9Zevyanji, zevyanji, mwe wantu wamwe Zioni!
Pongomokanji nichimwemwe mwe wantu wamwe Yerusalemu!
Lolani, imfumu yinu ikwiza kwemwemwe!
Akwiza namaka yonsi nukuchimvya,
ukuwa mbali nukuyichefya akwelezile pandokwe,
pamwana wandokwe, akana kandokwe.
10Imfumu e Leza akuti
Ndifumya amagereta’ yisumo mwe Israeli,
swinya mfumye wakavwalo mwe Yerusalemu
ndivuna amalapwa yano wawombelanga mwisumo.
Imfumu yinu ilileta umutende mumyiko yawantu;
atiwapanzya ukufumilila kwesumbi wee mpaka kwewinji
ukufumilila kuluzi Yufureti ukuyafika nakuno insi yapakula.
Ukunyosezwa ulongo kwawantu wakwe Leza
11Imfumu e Leza akuti,
Muno alilayano line twalayine swensi,
line lyalinji nichimanyilo chawazi wazyanzuwi,
Nditaya awantu wako ndeke wapite—
wafume muchinkalangwa chachifula chawuzya.
12Nyokani mwewantu mwachinsizwe kuchinyonga, muwalolela:
nyochelani kumasyo yinu ayamutende.
Kanonzi nkuwanena kuno, ndiwalambula impindi ziwili
ndiwapepa kukuyimba konsi kuno mwayimba.
13Ndileka Yuda awe ngati awulapwa wachita,
nawe Israeli awe ngati amivwi.
Ndileka awantu wamwe Zioni wawe ngati ampanga,
pakulwisya awantu wa mu Grisi.
14Imfumu e Leza aliloleka pawantu wakwe;
ayize awavwinta imivwi ngati akumesya.
Imfumu e Leza-leza alilizya inkangang’ombe;
awapita muvipunga vino vyafumilila lwakambazwa.
15Imfumu e Leza wamaka yonsi alichinjilila awantu wakwe
wize walovye awalwani wawo.
Mwisumo waliwapongomoka ngati awachakolwa,
wazwisya uwazi wawalwani wawo;
wuwatantala ngati awazi wanzuwi
wuno wukakwitilwa pakavuwa ukufuma mulweso.
16Ndi uwandanye wowo wiza-wiza
Imfumu e Leza alitula awantu wakwe,
ndivino umuchemi akatula uwufyo
wakwe kuwulwani.
Waliwazikimila munsi yakwe
ngati akamba kamawe malangalile.
17Ye, vino insinye yoyo ilizipa nukuyemba!
Awatichi wane wali mwenemo walikula nukuwoma
muno waliwalya ivizawalo nukung’wa ipala.
Selectat acum:
Zakariya 9: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.