Zakariya 10
10
Ilayilizyo lyikomolwa
1Lenganji imvula ku Mfumu e Leza pampindi yamilundo. A Mfumunye e Leza awino akatuma imvula namawingo nukusansa, namuvyalo amumela ivizawalo kuwantu wonsi. 2Awantu wakuyanga mukuvwambilizya ilango kumakolania, ukuwa itolelelo line wakatolelelwa likuwanga alyavye litupu ilyawufi wutupu. Wakazimbula wavilota wakasovya; ukusansamusya kuno wakawasansamusya kukuwanga akwavye. Achaleka awantu wakayumba awaya koo nakoko ngat’ang’onzi nsowe. Muno wasi nuwakuwatungulula, wakulanga wali muntazi.
3Imfumu e Leza akuti, Navitilwa wane wakapanzya awantu wane, nani nandi mbasunde. Amuno awantu wa mwe Yuda awane, achaleka fwandi nenenye, ne Mfumu e Leza wamaka yonsi, nandi ndawasayila. Wize wawe awakavwalo wane awakalambane awavita. 4Awamukwelengulo wonsi-wakapanzya, nawanankolelo, nawamusika walipawuka apaliponga wafume mwe Yuda. 5Awantu wamwe Yuda waliwa namaka yakuchimvizya ngati awavita wane wakalyatanjila awawalwani wawo mumatipa yamumisolo. Walilwisya amuno Imfumu e Leza ali nawo, wize wachimvye nawakakwelela wakwe wakavwalo wawalwani wawo.
6Ndipa awantu wamwe Yuda amaka;
njize ntule awa Israeli.
Ndiwafwila inkumbu
nyosye wonsinye kumwawo.
Wize wawe ngati nsitela mbakankamule.
Ne Mfumu e Leza, e Leza wawo;
ndipochelela amapepo yawo.
7Awa Israeli waliwa ngati awavita,
wasankana ngati awano watela wakung’wa.
Ikwata lyawo liliyizuka ukuchimvyanye koo,
wazewela, wazewela kwechino Imfumu e Leza wachita.
8Ndiyita awantu wane,
njize mbawunganike apaliponga.
Ndiwatula
ndeke wanyame ndivino walinji kali.
9Chingatenga nawasalanganizizya mumyiko,
naponye nakulyanye ukutali kuno wali walinjizuka.
Woliwonye apaliponga nawana wawo walipusuka,
wize wanyochele kumwawo apaliponga.
10Ndiwafumya mu Ijeputi na mu
Asiria mbawezye kumwawo,
mbawike munsi yakumwawo.
Mbawike mu Giliadi na mu Lebanoni;
ninsi yonsi iyize iyizule nawantu.
11Ndiwiza walamba esumbi wawo uwamatamyo,
nenenye, ne Mfumu e Leza ndiyuma amang’wimbi,
ndeke ukuzika kwaluzi Nayilo akalanguke.
Asiria aliyichilizwa pansi,
nu Ijeputi alipokwa amaka.
12Ndipa awantu wane amaka;
waliwampepa wantontela.
A Mfumu e Leza wavwanga.
Selectat acum:
Zakariya 10: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.