Kakpiʔiligele 26

Pɔli wi 'wi juumɔ juu bè kùlofɔli Agiripa yiʔɛ mɛ́ gè

1A kùlofɔli Agiripa wi sí Pɔli yɛ wè: «Larigɛ yē muɔ mɛ́, ma muɔ juumɔ juu bè.»

A Pɔli wi 'kɔli yɛ̀gɛ gè nɛ́ siɛnrɛ líɛ dè bè wi wori juu dè. A wi 'jo: 2«Kùlofɔli Agiripa, ki 'mi dɛ́ni bɛ̀ ki 'nyaa pàngɛ gè m'bé gbɛ̀ mi juumɔ juu bè muɔ yiʔɛ mɛ́ gè bè nìɛ yige kele gílì ke mìɛni nī Zuufulo pe 'mi pari bèle, 3nɛ́ ki cɛ́n muɔ 'Zuufulo pe kaliʔɛlɛ ke mìɛni cɛ́n gèle nɛ́ pe kacinʔɛmɛ ní bè. Kire nɛ̄, mi nɛ muɔ fiɛn wī, ma fungo nyígi gè má lúʔu m'mɛ́.

4«Bà ki 'líɛ baa mi nàgapunmɔ lɛ̀lɛ nī lè, Zuufulo pe mìɛni nyɛ́nì kàa cɛ́n mi sìi wi tánʔagɛnmɛ nī bè, mɛni mi 'puu nɛ̀ síɛ mi kùlo wuulo pe sunʔɔmɔ nī bè Zerizalɛmi kàʔa nī gè. 5Pe 'kire cɛ́n a ki 'mɔgɔ, nɛ̀ pínɛ a pe je yéri ki nɛ̄ bè ki juu gè, pe 'ki cɛ́n Fariziɛnnɛ koligo kire nī mi 'puu, kire gī weli Kulocɛliɛ caagoligo kogbɛngɛ gè. 6Pàngɛ gè pe sí mi yeri fànʔa tiʔɛ nī gè bɛ̀ ki 'nyaa mi 'mi sɔ̀ngirɔ taʔa dè Kulocɛliɛ wi nyafɛnigɛ ki siɛnrɛ nɛ̄ dè, dàa wi cé juu weli tuuliɛlɛ mɛ́ bèle. 7Kire nyafɛnigɛ gáà kire nɛ̄ weli kùlo wuulo pe saaya tùluyo kiɛ nɛ́ siin yi 'yi sɔ̀ngirɔ taʔa dè, nɛ́ sí gbɛ̀nmɛ le nɛ Kulocɛliɛ gbùʔɔrɔ́ wè pìlige nɛ́ cɛnvugo, nɛ ki siri wi nyafɛnigɛ siɛnrɛ ti- ga fori. Tire sí dī, Kùlofɔli, mi parigɛ nyùgo kire gī mmɛ gè Zuufulo mɛ́ bèle. 8Gíi nɛ̄ yeli nɛ ki sɔ̀ngí nɛ́ jo kiǐ gbɛ̀ kpíʔile wèʔ, Kulocɛliɛ wi- kúbilo nyɛ́ bèle wè ?

9«Mi tíimɛ ŋáà wè, mi cé puu nɛ ki sɔ̀ngí mi 'yɛli bè kɛnmɛ pi mìɛni kpíʔile bèri Zezi míʔɛ túngu gè, Zezi wè Nazarɛtiyé kàʔa wuu wè. 10Kire sí mi 'kpíʔile mi wè, Zerizalɛmi kàʔa mɛ́ gè. Nɛ̀ yɛli nɛ́ fànʔa gíì kacuɔnrilɔ kàfɔlilɔ pe yé kɛn mi mɛ́ gè, a mi 'tɛ́ngɛfɔlilɔ nìʔɛnɛ cò nɛ̀ tɔ́n kasuu nī, nɛ̀ pínɛ a pe cé kàyuʔu juu nɛ̀ cáan siɛn ŋíì nɛ̄ bè wi kpúu wè mi nɛ̂ cé wúɔ nɛ́ pe ní. 11Nɛ̀ kire liɛlɛ yige baa, lɛ̀gɛlɛ sáa nī, mi 'puu nɛ tòrí tɛnmɛzaaya yi mìɛni nī yè nɛ tɛ́ngɛfɔlilɔ kanʔa bèle pe nɛ pe wuʔɔ, níɛ pe cɔ̀rí fànʔa pe- yiri Zezi koligo nī gè. Bɛ̀ mi fungo ki cé yɛ̀ nɛ̀ nɔ̀ larigɛ gíì nī tɛ́ngɛfɔlilɔ kúrugu bèle, mi nɛ̂ cé yɛ̀ nɛ̀ kɛ́ pe kúrugu kàaya yáà mɛ́ kùlogolo kálì kiyeyɛ nī pe wuʔɔdiʔɛ nī gè.»

Mɛni Pɔli wi 'kò tɛ́ngɛfɔli wè

(Kakpi 9.1-19; 22.6-16)

12A Pɔli wi ń'nɛ̀ jo: «Tire nɛ̄ mi 'puu, a ki kɛ́nì nyaa làa nɛ̄ mi 'puu nɛ waa Damasi kàʔa mɛ́, nɛ́ sí kacuɔnrilɔ kàfɔlilɔ pe nyasiɛnrɛ taa cɛ̀ngɛ, a pe 'ki fànʔa kɛn gè m'mɛ́. 13N'dɛ mi nɛ nyu muɔ mɛ́ dɛ, kùlofɔli, koligo kire nɛ̄ mi 'puu, cɛngɛ ní gè nɛ̀ yéri nyùgo nī, a mi kɛ́nì kpìɛnmɛ páà nyaa pi 'kɔ́n baa nyìʔɛnɛ nī lè, pi 'puu nɛ càanná kpuʔɔ nɛ̀ tóri cɛngɛ nɛ̄ gè. A pi pɛ́nì mi màʔa nɛ̀ suʔu mi nɛ́ mi kobinɛnyɛninɛ ní bèle. 14We mìɛni bèle a we 'tìgi nɛ̀ tuu dàala nɛ̄ lè, a mi 'yékpoli juumɔ páà lúʔu eburu siɛnrɛ nī, a pi 'jo: ‹Sɔli, Sɔli, gáa nɛ̄ muɔ nɛ mi wuʔɔ ? Ki bé gbɛ̀n nɛ́ muɔ ní díɛ bà muɔ nɛ Kàfɔli kpìile tɛngi lè#26.14 Girɛki siɛnrɛ nī dè, kàsiile láà Kàfɔli Zezi wi 'wáa nɛ̀ kɛn Sɔli mɛ́ wè, bè ki tìɛ a nɛ̀faliwɛ wi 'cíi nɛ cáanri nɛ́ wi kàfɔli ní wè, wi nɛ̂ kpuɔnniʔɛrɛ suɔ. !›

15«A mi sí jo: ‹Kàfɔli, ŋáasiɛn wī ?›

«A wi 'jo: ‹Mi wī, Zezi wè, mi muɔ nɛ wuʔɔ wè. 16Ma sí yɛ̀ ma yéri. Gìi nɛ̄ mi 'mìɛ tìɛ muɔ nɛ̄ wè, n'gɛ: mi 'muɔ líɛ ma puu mi baakuɔwɔ, nɛ̀ pínɛ mari mi wori nyu dè siɛnnɛ mɛ́ bèle, gìi muɔ 'nyaa gàa gè nɛ́ gìi ní m'bé ní ga tìɛ muɔ nɛ̄ gè. 17M'bé muɔ suɔ muɔ kùlo wuulo pe kiyɛ nī yè, Zuufulo bèle, bè muɔ suɔ bínɛ kùlogolo kálì siɛnnɛ kiyɛ nī yè, bàli mɛ́ mi je muɔ tun wè. 18Ma sa pe yiɛyɛ múgolo yè, pe- kàduʔu wáa yebilige mɛ́ gè, pé sí jíin kpìɛnmɛ nī bè, pe- kàduʔu wáa Setɛni fànʔa mɛ́ gè, pé sí taʔa Kulocɛliɛ nɛ̄, gìi ki bé tí Kulocɛliɛ wi- pe kapiʔile láʔa gèle, dí pe sí pe liɛlɛ taa lè bè pínɛ nɛ́ Kulocɛliɛ wuulo ní bèle, bàli pe 'tɛ́ngɛ mi nɛ̄ bèle.›

19«Kire tiʔɛ gáà nī gè, kùlofɔli Agiripa, nɛ̀ yɛli nɛ́ fìɛ ŋáà mi 'nyaa nyìʔɛnɛ nī lè, mi sì gbɛ̀ nɛ̀ jáa nɛ̀ cíi kaala náà Kàfɔli wi 'tìɛ mi nɛ̄ nɛ́ ki tunduro kɛn dè mi mɛ́ dèʔ. 20A mi sí ki séli gbínʔɛnɛ Damasi kàʔa nī, nɛ̀ sɛ́nì fali Zerizalɛmi kàʔa mɛ́, nɛ́ Zude tɛ́nimɛ tiɛrɛ ti mìɛni ní dè, nɛ̀ sɛ́nì fali kùlogolo kálì mɛ́. Mi 'puu nɛ ki nyu siɛnnɛ mɛ́ bèle dí pe- pe funyɔ yiʔɛ yè pé láʔa pe kapiʔile nɛ̄ gèle, pe- taʔa Kulocɛliɛ nɛ̄, péri kakpiʔiligele kúu, kakpiʔiligele gílì ke bé ki tìɛ dí pe nyɛ́nì làa yiʔɛ pe funyɔ nī yè. 21Kire siɛnrɛ dáà ti juʔu kire kɛnmɛ nɛ̄ Zuufulo pe sɛ́nì mi cò baa Kulocɛliɛ Gbùʔɔrɔsaʔa mɛ́ gè nɛ̀ mi wuʔɔ nɛ waa bè mi sìi kúɔ wè.

22«Nɛ̀ sí ki taa bɛ̀ Kulocɛliɛ wi 'mi sáʔa wè, kire ki 'tí mi yē nɛ tíin bile pàngɛ gè, nɛ tàa nyaʔa nɛ nyu nɛ tìí fànʔafunvɔlilɔ mɛ́ bèle nɛ́ kpolilo ní bèle. Dìi sí Kulocɛliɛ siɛnjuuliɛlɛ pe 'juu nɛ̀ kúɔ dè, peli nɛ́ Misa ní wè, nɛ́ jo ki bé kpíʔile gè, mi wè nɛ tàa nyu tiiyɛʔ. 23Kire siɛnrɛ tire dī dàa dè: Kulocɛliɛ Siɛnnyiɛnɛgɔnwɔ wi cî ga wuʔɔgɔ suɔ, bága nyɛ́ bè yiri péliwe wè kúbilo nī bèle, nɛ̀ pínɛ, wi 'yɛli bè kpìɛnmɛ pi wori juu dè weli kùlo wuulo mɛ́ bèle nɛ́ kùlogolo kálì siɛnnɛ mɛ́ bèle bè pínɛ.»

Pɔli wi 'Agiripa yɛ wè wi- tɛ́ngɛ Zezi nɛ̄

24Tire Pɔli wi 'puu nɛ nyu nɛ tíin bè wi juumɔ juu bè, a Fɛsitusi wi 'fali nɛ̀ kɛ́nì juu nɛ̀ jɛnmɛ sɛni, nɛ́ jo: «Kàala ke yɛ̀gí muɔ nī lé, Pɔli ! Mi 'ki nyaa majo muɔ sɛbɛcɛ́ngɛ ki caa bè nyùgo yɛ̀gɛ muɔ nī !»

25A Pɔli wi sí jo: «Fɛsitusi, kpuʔɔrɔ ti 'yɛli muɔ nɛ̄, kàala yafiɛn wè mi nīʔ. Kányiʔɛ fìige kire mi nɛ nyu muɔ mɛ́. 26Mi nyɛ́nì tɛ́ngɛ ki nɛ̄ nɛ̀ pínɛ, kùlofɔli ŋáà mɛ́ mi nɛ mi siɛnrɛ nyu dè, wi nyɛ́nì ki kele gálì cɛ́n gèle, làa fáala wè wi dìire nīʔ. Nɛ̀ taʔa gíi nɛ̄, mi 'tire juu dè, ki kele gálì kiyè kpíʔile tiʔɛ káà nī làrimɛ nī wīʔ. 27Weli kùlofɔli Agiripa, mi 'ki cɛ́n muɔ nyɛ́nì tɛ́ngɛ Kulocɛliɛ siɛnjuuliɛlɛ pe siɛnrɛ nɛ̄ dè, dùʔɔ mi sí finɛ ?»

28A Agiripa wi 'Pɔli yɛ wè o: «Ki cé kò cɛ̀ri dí muɔ sí mi yiʔɛ mi- kò Kirecɛnwɛ.»

29A Pɔli wi 'jo: «A ki yē ki 'kò cɛ̀ri wī yo, ki tíin kpuʔɔ wī yo, mi sí nɛ Kulocɛliɛ náari wè, ki fǎga nyaa muɔ nigbeʔ. Mi nɛ ki caa nɛ pínɛ yeli bálì mìɛni pe nyɛ́ni mi siɛnrɛ dáà lúru dè pàngɛ gè, ye- kò bɛ̀ mi tíɛlɛ, nɛ̀ kire liɛlɛ yige baa nɛ̀gɛjɔliyɔ nyáà yire liɛlɛ yige baa.»

30A kùlofɔli wè, nɛ́ fànʔafɔli ní wè, nɛ̀ fàri Bereniisi nɛ̄ wè nɛ́ bìli pe 'puu baa tɛ́ninɛ nɛ́ pe ní bèle, a pe 'yɛ̀ nɛ̀ yéri. 31Bà pe kɛ́nì yiri nɛ waa bèle, a pe 'yɛ̀ nɛ nyu nɛ tìí pìye nɛ̄ nɛ́ jo: «Nàguɔ ŋáà wiì yafiɛn kpíʔileʔ gìi ki 'yɛli pe- wi le kasuu nī wèʔ, bé nɛ́ cɛ ga jo bè wi kpúu wèʔ.»

32A Agiripa wi 'Fɛsitusi yɛ wè: «A kiì cé nyaa nàguɔ ŋáà wi 'jo dí kùlofɔgbuɔwɔ Sezari wi 'yɛli bè juu wire kàyuʔu juu gèʔ, we cî wi yaʔa wiri waa yanyige nɛ̄.»

Selectat acum:

Kakpiʔiligele 26: sev

Evidențiere

Copiază

Compară

Împărtășește