Kakpiʔiligele 25

Pɔli wi 'jo Sezari wi 'bé wire kàyuʔu juu gè

1Bà Fɛsitusi wi tɛ́ni fànʔa nɛ̄ gè Zude tɛ́nimɛ nī bè, cɛnyɛ taanri 'tóri kire kàduʔumɛ gè, a wi 'yiri Sezare kàʔa nī gè nɛ̀ kɛ́ Zerizalɛmi kàʔa mɛ́. 2A kacuɔnrilɔ kàfɔlilɔ bèle nɛ́ Zuufulo pe liɛlɛ ní bèle, a pe 'pìye pínɛ nɛ̀ sɛ́ni siɛnrɛ kíri nɛ tari Pɔli nɛ̄ wè. 3A pe 'Fɛsitusi yɛ wè wi- nyuɔ peli nɛ̄ wi- Pɔli tórigo wè baa peli mɛ́ Zerizalɛmi kàʔa mɛ́ gè peli sa wi kàyuʔu juu gè. Ki 'nyaa pe 'puu nɛ caa bè sa Pɔli kpúu wè koligo nɛ̄ wī.

4A Fɛsitusi wi sí pe yɛ dí Pɔli wiī baa kasuu nī Sezare kàʔa mɛ́, dí wire sì je mɔgɔʔ, wire tíimɛ nɛ waa baa. 5Nɛ́ sí pe yɛ: «Bìli bīɛlɛ yeli nī yiɛgininɛ bèle, yeri báan we- kɛ́ ye sa yeli wori juu dè nàguɔ ŋáà nɛ̄ wè, kaala níì yeli nyaa wi 'kpíʔile niì sìɛn lèʔ.»

6A Fɛsitusi wi 'kò baa nɛ́ pe ní kiì tóri cɛnyɛ kataanri nɛ̄ʔ, a kire 'laa cɛnyɛ kiɛ, nɛ́ kúɔ nɛ́ kɛ́ Sezare kàʔa mɛ́ gè. Ki kpìɛnduu gè a wi 'sɛ́nì tɛ́ni kàyuʔujuuwo kácunʔɔ nɛ̄ gè, nɛ́ jo peri báan nɛ́ Pɔli ní wè. 7Bà Pɔli wi sɛ́nì yiri wè, Zuufulo bílì pe cé kɔ́n Zerizalɛmi kàʔa mɛ́ gè nɛ̀ pɛn bèle, a peli 'yéri nɛ̀ wi màʔa nɛ̀ suʔu níɛ kele nìʔɛgɛlɛ sìpiʔile nyu nɛ tari wi nɛ̄, nɛ̀ sí ki taa piyè yé je gbɛ̀ ki siɛnrɛ cɛ́n dè bè ti juu bè fíligeʔ.

8A Pɔli wi sí wi juumɔ juu bè, nɛ̀ ki tìɛ dí wire sì kapuunninɔ kpíʔile Zuufulo pe Fànʔa Siɛnrɛ nī dèʔ, nɛ̀ pínɛ wire sì yakaa kpíʔile sìpiʔi Kulocɛliɛ Gbùʔɔrɔsaʔa nɛ̄ gèʔ, wire sì kakoligo kpíʔile kùlofɔgbuɔwɔ Sezari nɛ̄ wèʔ.

9Fɛsitusi wi sí puu nɛ ki caa bè Zuufulo pe kanɛdaanna kpíʔile, a wi sí Pɔli yɛ wè o: «Muɔ bé fɔ̀li lé bè kɛ́ Zerizalɛmi kàʔa mɛ́ gè lé, mi sa muɔ kàyuʔu juu gè baa kire tiʔɛ nī lé ?»

10A Pɔli wi sí wi yɛ: «Mi yē náʔa yériwe nɛ̀ kúɔ kàyuʔujuudiʔɛ nī gè kùlofɔgbuɔwɔ Sezari wi yiʔɛ mɛ́ gè, bile mi kàyuʔu ki bé juu. Mi sì tánʔa nɛ̀ jíin Zuufulo mɛ́ bèle kaala láà fáala nīʔ, muɔ tíimɛ muɔ nyɛ́nì kire cɛ́n cɛ̀ngɛ. 11A ki yē mi nyɛ́nì kaala kpíʔile niì sìɛn lèʔ, a ni 'yɛli nɛ́ kpúumɔ ní wè, mi sì cíiʔ pe- mi kpúu wèʔ. A ki sí nyaa dìi pe nyu nɛ tari mi nɛ̄ dè, ti wè kányiʔɛʔ wè, siɛn fǎga mi le pe kiyɛ nī yè nyùgofunʔ. Mi nɛ ki caa mi kàyuʔu ki- sa juu kùlofɔgbuɔwɔ Sezari tiʔɛ nī#25.11 Ki 'nyaa a siɛn cé puu Wurɔmiyé kùlo wuu wè, a pe 'kàyuʔu juu siɛn nɛ̄ wè, á siɛn wi 'ki nyaa kàyuʔu kiì juu nɛ̀ wi fungo nyígi gè, larigɛ 'puu siɛn mɛ́ wè wi- ki juu bé jo pe sa wire kàyuʔu juu gè Wurɔmiyé kùlofɔgbuɔwɔ Sezari tiʔɛ nī gè..»

12A Fɛsitusi wi 'kɛ́ nɛ̀ sɛ́nì wi yɛrifɔlilɔ nyaa bèle a pe 'juu; píra ŋáà nī wè á wi pɛ́nì Pɔli yɛ wè: «Muɔ túʔu jo kùlofɔgbuɔwɔ Sezari wi 'yɛli bè muɔ kàyuʔu juu gè lé ? Ao, baa muɔ bé kɛ́ sî !»

Pe 'kɛ́ nɛ́ Pɔli ní wè kùlofɔli Agiripa tiʔɛ nī

13Cɛnyɛ yáà kɛ́nì tóri yè, a kùlofɔli Agiripa wi 'kɛ́ wire nɛ́ Bereniisi, bàa Fɛsitusi síɛri wè baa Sezare kàʔa mɛ́ gè.

14Bɛ̀ ki 'nyaa pe cé kò baa nɛ̀ mɔgɔ wè, a Fɛsitusi wi sí Pɔli wori juu dè nɛ̀ tìɛ kùlofɔli nɛ̄ wè, nɛ́ wi yɛ: «Nàguɔ wáà yē bile, Feliisi wi cé wi tɔ́n nɛ̀ yaʔa náʔa kasuu nī. 15Lɛ̀lɛ níì nī mi 'puu baa Zerizalɛmi kàʔa mɛ́ gè, a kacuɔnrilɔ kàfɔlilɔ nɛ́ Zuufulo pe liɛlɛ pe sɛ́nì yiri nɛ́ ki nàguɔ wi siɛnrɛ ní dè. A pe 'jo dí fúɔ ki 'yɛli kàyuʔu ki- tuu wi nɛ̄ wī. 16Mi sí cé pe yɛ dí weli Wurɔmiyé wuulo mɛ́ bèle, ki wè kpínʔiniʔ, bè kàyuʔu juu siɛn nɛ̄ círacira wèʔ, dí ki sí nyaa siɛn wiì wi juumɔ juu bè wi parifɔlilɔ pe yiʔɛ mɛ́ gè wèʔ, bè ki tìɛ a ki yē wi yirimɛ yē baa siɛnrɛ nī dèʔ.

17«A pàli sí pɛn nɛ́ mi ní náʔa Sezare kàʔa mɛ́ gè. Mi sì kele yaʔa gèle a ke mɔgɔʔ; ki kpìɛnduu gè, a mi sí fali nɛ̀ sɛ́nì tɛ́ni kàyuʔujuuwo kácunʔɔ nɛ̄ gè, nɛ́ tí a pe 'pɛn nɛ́ nàguɔ ní wè. 18Wi parifɔlilɔ piyè kɛ́nì siɛnsinre juuʔ dìi ti gbɛ̀ nɛ̀ nyaa kapiile wori dèʔ, majo mɛni mi 'puu nɛ ki sɔ̀ngí gèʔ. 19Gìi yákuɔ nɛ̄ pe cé wi pari wè, kire 'nyaa peli tíimɛ Kulocɛliɛ caagoligo siɛnrɛ ti 'puu, nɛ́ siɛn wáà wori ní, pe wi ye Zezi; wi 'kùu á Pɔli wire sí jo dí wiī sìi nɛ̄. 20A mi 'cɔ̀ri kire tiɛlɛ náà nī lè, miì ń'nɛ̀ ki cɛ́n gìi m'bé juu gèʔ. A mi sí Pɔli yúgo wè a ki yē wi bé fɔ̀li bè kɛ́ Zerizalɛmi kàʔa mɛ́ gè kàyuʔu ki- sa juu baa kire tiʔɛ nī. 21Pɔli wi sí cé cíi nɛ́ jo wire kàyuʔu ki 'yɛli bè sa juu kùlofɔgbuɔwɔ Sezari tiʔɛ nī. Kire nɛ̄ a mi sí tí a pe 'wi tɔ́n nɛ̀ yaʔa baa kasuu nī wè, sɛ́ni nɛ́ mi ga wi tórigo kùlofɔgbuɔwɔ Sezari tiʔɛ nī gè.»

22A Agiripa wi 'Fɛsitusi yɛ wè o: «Mi míɛni wè, mi nɛ caa bè lúʔu nàguɔ ŋáà mɛ́ wè !»

A Fɛsitusi wi 'wi yɛ: «Mbànʔa gè muɔ bé lúʔu wi mɛ́.»

23Ki kpìɛnduu gè, a Agiripa wè, nɛ́ Bereniisi ní wè, a pe sɛ́nì jíin kàyuʔujuudiʔɛ nī gè nɛ́ pe nàbuɔrɔ yɛrɛ ní dè; kapiɛngbuɔnnɔ pe kàfɔlikpolilo pe 'puu nɛ́ pe ní, nɛ̀ fàri kàʔa ki yiʔɛmɛ siɛnnɛ nɛ̄ bèle. A Fɛsitusi wi 'tunduro tórigo a pe sɛ́nì Pɔli cò wè nɛ̀ pɛn.

24A Fɛsitusi wi pɛ́nì siɛnrɛ líɛ dè nɛ́ jo: «Agiripa, muɔ wī kùlofɔli wè, nɛ́ yeli ye mìɛni bèle náʔa nɛ́ weli ní bèle, nàguɔ ŋáà yeli nɛ nyaʔa ŋàa wè: Zuufulo pe mìɛni bèle Zerizalɛmi kàʔa nī gè, pe 'kɛ́ mi kúrugu nɛ̀ sɛ́nì mi fiɛn, níɛ yékpuʔulo wáari nɛ́ jo dí nàguɔ ŋáà wiì yɛli bè kò sìi nɛ̄ʔ. Ale pàngɛ, ki siɛnnuro tire nɛ̄ pe tíin. 25Mi wè, miì sí tiɛlɛ nyaa wi nɛ̄ʔ, gàa wi 'kpíʔile kakpuu wuʔu gèʔ. Bɛ̀ sí wi 'jo wire nɛ ki caa wire kàyuʔu ki- sa juu kùlofɔgbuɔwɔ tiʔɛ nī gè, baa mi nɛ caa m'bé wi tórigo. 26Mi sì sí ki cɛ́nʔ, gìi mi 'yɛli bè sɛbɛ bè tórigo kùlofɔgbuɔwɔ mɛ́ wè wi wori nɛ̄ dèʔ. Kire nɛ̄ mi 'tí a pe 'wi yige náʔa ye mìɛni yiʔɛ mɛ́ gè. Muɔ míɛni pa kàa juu ki nī muɔ wè, Agiripa, muɔ wī kùlofɔli wè, dí mi sí siɛnrɛ táà cɛ́n bè sɛbɛ wi wori nɛ̄ dè, a we kɛ́nì wi yúgo nɛ̀ kúɔ wè. 27A kire 'laa wè, mi tɔ̀ni nɛ̀ ki 'nyaa nyùgo wè ki nɛ̄ʔ, bè kasuulewe tórigo baa kùlofɔgbuɔwɔ Sezari mɛ́ wè, dí ki sí nyaa gìi nɛ̄ pe 'wi pari wè ki siɛnrɛ ti fǎga puu cìilide dèʔ.»

Selectat acum:

Kakpiʔiligele 25: sev

Evidențiere

Copiază

Compară

Împărtășește