Apakuki 2
2
Ko le tui makeke a Apakuki
1Na kau nofo i loku nofoaga,
Ti na kau tuu i aluga o le tule ;
Na kau alaala, ke tio ki le nea leia e fakasa mai loa kiate au e le Eteleno,
Ti mo le nea leia e kau tali loa i le oki o laku tagi.
2Na masau mai loa le Eteleno kiate au, o pati :
Tosi le folafola fakakikite :
Togi a ia i ni laupapa,
O tupu ke lau tuumau a ia.
3Talie ko se folafola kikite leia kua oki lona temi i le fakatuutuu,
E saele a ia ki lona fakasoko, ti e leaise loi loa a ia ;
Kapau e tuvai a ia, talitali ki ai,
Talie e soko loa a ia,
E soko maoki loa a ia.
4Ko leinei, na makita lona laumalie, e leaise sako a ia iate ia ;
Kae e mauli loa le tagata agatonu i lana tui.
Tupuaga o le fakamaau o le tagata fakaveliveli
5Tatau mo leia e kona mo matasoka,
E leaise mafai ke fimalie le tagata fia nealasi ;
E fakamavaa laulasi e ia lona gutu ofaipe le nofoaga o le kau mate,
E leaise makona a ia i se temi ofaipe le mate,
E aumai e ia kiate ia atu puleaga fuli,
E fakatasi e ia ki ona tafa a kakai fuli.
6Pe leaise liliu loa a ia ki kakai fuli ko ni nea fakakatai,
Mo se nea fakagologolo mo se nea fakaofolele ?
E pati loa :
Malaia ki le tagata leia e fakatuuga ia a nea ala e leaise ko ni ana nea !
E kaku loa ki afea ?…
Malaia ki le tagata leia e fakatuuga ia ona maua !
7Pe leaise malaga fakapunamauli ake loa latou ala e ke tuu maua ki ai ?
Pe leaise alaala ake loa latou ala na ke popula ki ai ?
Io, e ke liliu loa ko lalatou nea kai.
8O tupu na ke kaia ni puleaga mauke ai,
E kaia loa a koe e le toetoega fuli o kakai ;
Talie na ke liligi le toto o ni tagata,
Na ke fai ni agamakeke i le fenua,
Ki le kolo mo lona kakai katoa.
9Malaia ki leia e tanaki ia ki lona fale ni totogi kaia,
O tupu ke fakatuu lona ofaga i se ganea taualuga,
Ke sao ai i le lima o le malaia !
10Ko le matagafua lena o lou fale totonu lena kua ke fakatuutuu ia,
I lau maumaui ni kakai toka api,
Ti ko koe totonu leia kua ke agasala ki ai.
11Talie e kalaga le fatu i loto malie o le kaua,
Ti e tali ki ai le laakau leia e fakafesoko ia le fatafataafale.
12Malaia ki leia e fakatuu ia se kolo ki le toto,
Leia e fakatuu ia se kolo ki le agaveli !
13Ko leinei, kua fakapapau le Eteleno o kau tau :
E gaoi a kakai ki le afi,
E pakia noa a atu puleaga.
14Talie e apele loa le malama nei i le iloa o le kololia o le Eteleno,
Ofaipe le takele o le moana leia e apele i le vai leia e uufi ia a ia.
15Malaia ki leia e fakainu ia lona oloi,
Kiate koe leia e liligi ia lau fagu vino ke fakainu ai a ia ke kona,
O tupu ke tio ki lona telefua !
16E ke makona loa i le luma o lasi ake i le kololia ;
Ke ke inu foki mo koe totonu, ti ke ke nofo telefua !
E maliu loa kiate koe le ipu o le lima atamai o le Eteleno,
Ti e fakakelekele loa lou kololia e le luma.
17Talie e vilo loa kiate koe a agamakeke na fai ki Lipane,
Ti e fakaii loa a koe e maumau a manu,
O tupu na ke liligi le toto o ni tagata,
Ti na ke fai ni agamakeke i le fenua,
Ki le kolo mo lona kakai fuli.
18Kolea le aoga o se fakatata ta, ke tupu ai lona ta e se tagata tufuga ? Kolea le aoga o le fakatata ukamea saka leia e ako ia le loi,
Ke tupu ai le tuku e le tagata lana fanaki kiate ia,
Kae ko le maoki e lolotoga fau e ia ni taulaatua gutu mate ?
19Malaia ki leia e pati ki le laakau : Tuu ki aluga !
Ki se fa fatu gutu mate : Alaala !
Pe fakasa loa e ia se nea ?
Ko leinei, e teuteui a ia ki le aulo mo le siliva,
Kae e leaise maua iate ia se laumalie leia e fakamauli ia a ia.
20E nofo le Eteleno i lona fale tapu maokioki.
Ke fakalologo le malama nei katoa i ona mua !
Selectat acum:
Apakuki 2: FB2000
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
© Société Biblique de Genève, 2000-2020