Versete biblice populare din Tiaku 4

Împărtășește

Tupana tikyꞌesat aiꞌe hap -Tupana atikyꞌesat emiit sese wo waku watoꞌe aiperupꞌi popuo e. Uiꞌywot uimoesaika kahato uiminug saꞌag koꞌi akit hamo waku watoꞌe. Tupana etiꞌakit o ahiag uiꞌokpe totiat watoꞌe waku. Uimoesaika epaꞌãu wo ahiag sopo hamo ehay wo -Motoro uiꞌyatypepyi ahiag me e hamo waku wahẽtup Tupana pe. Miꞌi hawyi waku watoꞌe -Tupana etisopo ro ahiag uhãꞌãg hat mesuwe waku watoꞌe. Miꞌi hawyi ahiag topopy raꞌyn meremo aiꞌyatypepyi Tupana pupi.

Pyno karãpe watikyꞌesat watukupteꞌen Tupana wywo miꞌi pote waku watuwat Tupana kape aimikyꞌesat ẽtup hamo. Aiwanetup hap kaipyi aipyꞌa pyi ahehay hawyi tuut ahowawi aimikyꞌesat ewy. Miꞌi hawyi aikotã watuwei aipit pit potiat hap ewy raꞌyn yꞌy pe waku miꞌi hap ewy waku watoꞌe Tupana pe -Uiꞌywot uikoho Esaꞌyru suu wo uimiꞌaparap saꞌag koꞌi waku watoꞌe. Uipo ti iminug yt naku i hap koꞌi pote uipo ipit pit hap ewy. Miꞌi pote etikoho uipo yt naku i nug hap hep hamo waku watoꞌe. Uiꞌywot atipy piat pe uiwanetup hap uipyꞌa piat typy sehay potiat uipiit yt naku i topyhuꞌat. Miꞌi pote etikoho kahato uhepiat iꞌaparap hap koꞌi yne waku watoꞌe Tupana pe.

-Ehamo Tupana aremoti kahato uipyꞌa pe paa e hap wywo watoꞌe. Pywo pe pote Tupana mimotypot sese koꞌi watopyhuꞌat wuatꞌi eꞌat pe wuatꞌi ehamo.

-Atiꞌatumoesaika kahato waure wuat gupteꞌen haria pe. Miꞌiria pe atum neꞌen kahato wakuap miꞌiria pe maꞌato iraniaꞌin me -Uito poꞌog e haria ewanikap wo areineꞌen e Tupana ahepe. Uhegyiꞌat hap poꞌog atum paa e haria pe e Tupana ahepe.

Uimimuꞌeria karãpe watikuap kat som waku Tupana tikyꞌesat watunug hap hawyi maꞌato yt watunug i imikyꞌesat ewy hawyi watiꞌaparap kahato Tupana pe yt watunug i imikyꞌesat pote. Yt nakuaria i wo watopyhuꞌat yt kat i hin i watunug pykai. Miꞌi tã hap atikyꞌesat eweikuap taꞌyn uiwyriaꞌin are.

Miꞌi hawyi aimikyꞌesat Tupana pe wahẽtup tuereto wen maꞌato yt tutum i aimiẽtup katupono yt tomikyꞌesat ewy i wahẽtup pote. Aimikyꞌesat ewy saꞌag neꞌi wywo yn wahẽtup wote aimowepiit hamuat kape yn wahẽtup pote yt tutum kuap i aimiẽtup.

Aikotã aheharyꞌi ete aipohari hap ewy yt ikahu hin i miꞌi hap ewy kahato yt ikahu hin i typy ahetupana pote. Yt naku i typy ok mikyꞌesat ewy watunug Tupana mikyꞌesat wakuat iꞌewyte mesuwarotiaria mikyꞌesat ewywuat yt naku i nug haria mikyꞌesat ewywuat pote. Yt ikahu hin i miꞌi tã watoineꞌen are. Tupana ewanikaptia mikyꞌesat ewy watunug mote Tupana ewanikaptia wo watoineꞌen. Uwe uwe mesuwarotiat yt naku i nug haria seko saꞌag wo tuwewyꞌinug miꞌi hat Tupana ewanikap mo topyhuꞌat.

Katupono yt watikuap hin i aikotã mukiꞌite aiporeꞌihotꞌok hap pykai i aikotã aru watoineꞌen sio are. Tupana yn miꞌi tã kuap hat iꞌewyte yt watikuap hin i karania eꞌat rẽ aheineꞌen hamuat hap koꞌi. Taꞌi aikotã hunete yꞌy heꞌyhig am hawyi atposake hawyi yt kat i raꞌyn toineꞌen itote. Miꞌi hap ewy kahato aheineꞌen hap topyhuꞌat mesuwarote. Taꞌi aheineꞌen porap i hawyi aikuꞌuro raꞌyn meremo hap ewy watoineꞌen mesuwat yi tote uiwyriaꞌin.