Isaías 52
52
Jerusalén laihwi yaknin yulni isningpakna
1Sahmuta, Sayan, sahmuta, parasma duta;
Jerusalén, tawan nuhni maisihnidis man kidika,#Rib 21:2,27.
asmana tanit yaksinh kidika awah,
kat Papang tatalwas muihni balna maisihni balna kidika
watwi man yakat aiwi kakawas karangki.
2Lawah Jerusalén,
sau yahamni mauhna kidika kalisihtah,
trunma yakat yalahda.
Sayan, silak muihni sirau man kidika,
arangmapana kau pan sitna kidika lakpamtah.
3Dawan yulwi:
“Yang sint as bik dutasyang dai
manna warau lani yakat manaduwi uina kat;
bahang waradika bik sint as bik diatas awaki
manalaihtik yaktayang kidika.
4Tatuna laih tawanki adika Egipto yakat kiuna dai,
bahang yakat muih kaltaldas muihni as likdai;
usnitkat Asiria yaklauwi taihna dai ban di as dis kaupak.
5Dawakat waralaih, ¿ais kidika talayang?
Di as dis kaupak tawan ki kidika Babilon yakat duwi uina.
Angdika muihni balna muih taihyang kidika, witingna manah kapat kaldakawi papāuhwi
bahang laihwatwas ban kaput yauhuswi.#Rom 2:24.
6Kaunah mani balna kaiwarang dawak tawanki kidika amanglawarang,
yang yulkalbaunayang, bahang yang laih Dawan yang.”
7¡Ais nuhni yaksihni yah asang ubulni yakat kaiwak talnin kidika,
yul wisam duaiwa muihni kidika,
kulnin aslah yulni duwi kaiwa kidika,#Nah 1:15; Rom 10:15; Ef 6:15.
laihwi yaknin yulni isningpakwa kidika
Sayan yakat kalyulwi: “Man Papangma kidika laih King”!
8¡Dakah! Makau kilwi maintalyang balna kidika parasni sararahwi
minit bayakna yulni,
kat witingna alas miniknapa kau tatalwi
amput Dawan nawatwi kaiwa kidika Sayan yakat.
9¡Minit bayakna kidika yulni sarahtanauh,
Jerusalén daukalna kidika,
kat Dawan kidika witing tawanni yakat minikun talna bahang,
Jerusalén kidika laihwi yakna!
10Dawan parasni nuhni kidika yakwi niningkana,
muih mahni miniknapa yakat.
Sau muihni balna bitik amanglalana karang
mayang Mapapangki kidika yaklauwi mailaihwi yakna.
11¡Alahwanauh, alahwanauh Babilon kaupak,
di maisihni mailaihwa balna kidika as bik lalaihwinih,#2 Kor 6:17.
Babilon kaupak mahka alahwanauh!
¡Maisihni dis awanauh,
Dawan di duwa dini balna trukta yawanama kidika!
12Kaunah sirihni ismangna abahl alahyawanamna laih awaski,
īra alahyawanamna laih awaski,
kat Israel Papangni Dawan kidika yaklauwi
nanitdakna karang bahang.
Papang warauni dutni wauhwi dawak minit bayakna kidika
13Yang warauki kidika warkni balna yamni manah karang,
dulauwi tanit maluih yakat ilna karang.
14Kaput laih muih manas taldas dini kidika tatalna witing kaupak,
witing muih kidika satuk kalna dai bahang,
dawak muih muihni kidika bitik laih disna dai satuk kalna dai,
15sihm kaput bik laih sau muihni balna di tatalwas dini kidika tatalwarang;
king balna kidika tatalwi yul as bik yulninna dis kalna karang,
kat talwi amanglalawarang,
kidika dini dakakawas palni dai kidika tapanina yakat.#Rom 15:21.
Atualmente Selecionado:
Isaías 52: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
