Rano'a 9
9
Kirkira-ralma rior samomuou die emeknekama patke' ida mak kpolg awoka riy podku-padku totpena rma rwatut lia mormiori-dardiari mak kaplollola
1Kirkira-ralma rior samomuou die nariri oleka romni mak karuri me mak ksamomuou,
yoma riri wo'itu erla rom de ralamni.
2La' noma nwunu-nwenan nhiuri-wnia'ana pa nwerna mei totpena riy rma ra'ana-remun la.
Ntiha-nwalia tgo'a-arka pa na nhoi-ntani.
3Patke'a maka khoi-ktani re, nhopan pa rla rwapol lia la'a leta ralamni
me loi liawna-talan lawna totpena plet pa riy ratlin nana pa rmai.
4Rwapol pua rakot nohora e lirni mak kiwra: “He' mak kakleha o'ta-kriahlu de miai ee!
De mak kakleha ma'ta wniarora-wnialai kirkira-ralma rior samomuou,
5mmiai pia mi'ina-miemun la a me'yu maka kawniern olek di, ne miemun doinia tgo'-arak maka aghoi-tiani oleka re wa.
6Yana mdien rer niek la podku-padku ralamni, yoma la'pa emkade de hota miy edon mliernana mormiori-dardiari.
Mmiai pia mliernohora mak ktaru kirkira-ralma riora re loini-talanni.”
Riy mak klernohora kirkira-ralma riora samomuou die, nhiolli-lietni me ra'ani-pallu
7La'pa riy maka katullu-kapetna, maka kahmena kwatutu-kwaye'a,
de la'pa he'-he'a rpolliohora de hota nwaldioinia pa nahe'i-namalia re.
Ne la'pa omuwenan la riy yatyata-halala
hota e nwahoiti-nwarennu.
8Yana mpiale'era riy maka kahmena kwatutu-kwaye'a.
Hota sukni tia'ala miy.
Mere la'pa omukota riy mak khi'inde klernohora kirkira-ralma rior samomuou die halli,
de hota nhu'ru-nhelam la miy.
9Me la'pa omuno'a-munatga riy mak katu,
de hota yatnu yeher to'a napie'era.
Ne la'pa ompuatutga riy mak kden rer niek la plollolli,
de hota lirni-yatnu yeher to'a pa na'itar la.
10La'pa riy ida niwra natu, de la'a mulaliaini de riy de natu na'unni-namta'ata natlina-natailla Orgahi-Orha'a.
La'pa o' e muat niohora Orgahi-Orha'a mak edonna khi' do'a-kyapi hala, de hota omliernana kirkira-ralma rior samomuou.
11La'pa mliernohora kirkira-ralma rior samomuou de
hota muor nian tupmu-mliawan nana liawanmu.
12La'pa mtiaru kirkira-ralma rior samomuou orgahamu mu'untu.
Mere la'pa ompuayotlia kirkira-ralma rior samomuou de orgahamu ed mak kruki.
Nhioli-lieta podku-padku de emeknekama patke' ida mak kpol lia riy mak kaplinu-kaplo'a totpena rmai pia ralira-raliai me rkamnelu-rkamna'a
13Podku-padku de emeknekama patke' maka nurnu kpoka-kpetga la yaltieri
mere naplin niohora hadomdoma me edonan nmola-nma' eti.
14Ndella' romni gaini
eradonde nla'awa loi liawna-talan lawna ralamni totpa plet pa riy ratlin nana.
15Ndella hande totpena npol lia riy maka kla'a-kmai lia hande.
Riy mak ralamni ndawar reria kniarni mak hota riwra rhi'a, de edonna rtailla e lirni.
16Noka npol lia totpena nora raliai, niwra:
“He' mak kaplinu-kaplo'a la talan mak kaplola,
mak kakleha ma'ta wniarora-wnialai kirkira-ralma rior samomuou de mmiai nar miy re!
17Gera kniamna'a maka woliamanni minmi'na,
me yamanna yade'a, ya'anni wokliamanni ne eee!”
18Mere hameni maka kwaloha-kwalakat la ha romni pa ra'ana-remnu, raplin niekla hota hewewra la hande!
Riy dodo'ona re raplin niekla ir rler olek la'a matmiati-molmuol liawna ralamni.
Atualmente Selecionado:
Rano'a 9: LEX
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2025, Wycliffe Bible Translators, Inc. All rights reserved.