Rano'a 10
10
Salomo lira nnio'oni-wawa niatnu
1Hadi ed maka Salomo na nano'a-na'atga a'nani. Nano'a-na'at pua niwra:
La' upa-a'na mak katu kwarora-kwalai samomuou de hota hare er maka khi'a inni-amni pa ralamni rahepru.
Mere la upa-a'na mak kpodku-kpadku de hota rhi' inni-amni pa ralamni rmayo'a.
2Re'a-tniaru maka it tlernana la yahuri-yawo'ora onde matmera-wulkgaulu, de hota edon nal untu
mere nwaldioinia la de ploi-ple'era ed maka kodia mormiori-lewlewna.
3 Itmatromlawanni Makdenrer die, edonna Nolin limni la riy samomuou rler la rehka-lara,
mere E' ed maka khi'a orguli-agewta la riy yatyata totpena edonna nlernana hya' maka ha nwaror nana.
4Riy pamalsa de hota rler la rehka-lara.
Mere riy mak kape'ela de hota rlernana re'a-tniaru.
5La'a tuwarwiari mak ktaru kirkira-ralma rior samomuou de la'awa rieiki-wnio'ora de hota nwaho'a-nwatiernia ya'ana-yemnu.
Mere la'a mak kanin lawna de nmai lia rieiki-wnio'ora de hihi'ini-yapyapni de nodia molmola-mama'a.
6Hota riy mak kden rer lia plollolli rlernana yara'a-yapalu la Itmatromlawanni.
Mere riy yatyata de namtie'el nohora kapliahanni mak hota niwra nhi' nana.
7It ralamni nahepuepru la'pa itsoratreria riy samomuou re nhiolli-lietni mai ita.
Mere la'pa riy yatyata de pleta-plet pa itsoratdoinia wa. 8La' riy mak katu de sukni ratlina lira nnio'a-wawa niatu,
mere riy mak kpodku-kpadku yaltierni-yaltiani narieiniande orgahani rler la klieratni.
9La'a riy mak kwehwa-klakta plele'era de hota mormiorni namtiertiernu.
Mere riy mak kputra-kpalka ka'ohpa-kalahara de la' emkameni ho'mana hota riy rat niohora ir nhiolli-lietni.
10La'pa he' ed maka kawunum targa yatyatni la ihranu-ralamni de hota nhi' rira pa rler la susa ralamni.
Me riy mak kpodku-kpadku yaltierni-yaltiani narieiniande orgahani rler la klieratni.#10:10 La' yawala Yunani de ayat di nnia'eratni de emkadi: “La'pa he' ed maka kawunum targa ha plollola de hota nhi' rira pa rler la susa ralamni. Mere la'pa he' ed maka nparan pia npolliohora rira de hade ed maka kodia rimormiori la kalwiedni-paitiotni.”
11Riy mak kden la plollolli wawannu, lirni-tunnu de rodia untu emeknekama ger ormata mak kodi mormiori-dardiari.
Mere la'pa riy yatyata raltier die, rade' targa wniarora-wnialai yatyatni-halalli maklekla-makdiaini.
12Gai pietna de nodgiota yahuri-yawo'ora.
Mere riy mak ksukni ktulla-ksayni rimormiori wialli de edonna nwahla taru rira lir yatni
me edon nwahla rira wniehwani-liakatni maka kameru ati-kamhan ralma.
13Riy maka ralma-riorni plokra naltier die nnairia lira-tun samomuou.
Mere makpodku-kpadku naltier die lirni-tunnu edon naplola pede nlernana liwliwra-kakaklu.
14Riy mak katu de nhi'targa lira-yatu.
Mere la'pa mak kpodku raltier wia de hade e na'ail to'a kropna-krieutu.
15Mak ktaru re'a-tniaru emeknekama keliau-halwa'ana maka irayahew lia.
Mere riy kleleha rler la kropna-krieutu ralamni yoma rakleh hadomdoma.
16He' maka khi'a-kyapia la plol wawannu, de ha wniahlani de nler la mormiori-dardiari,
mere mak khi' do'a-kyap hiala de nlernana do'oni-halli wniahlani.#10:16 Riy dom de rwarora ayat di nnia'eratni emkadina: “mere mak khi' do'a-kyap hiala de do'oni-halli na'ititar rer lia liawanni.”
17La'pa he' ed mak kta'wa tlinni la lira pniolliohora, de hota nlernan mormiori-dardiari,
mere la'pa he' edon natlina lira pniolliohora de hota nler la klieratni.
18He' ed maka kwehwa-klakat samomuou mere nade' targa yawunu-yawenna la ihranu ralamni de putra-palka olek hadewa.
Me riy maka kapupu-kaheri rimormior wialli de riy podku olek hadewa.
19La'pa italtieri harahu rehia de hota tler la do'a-hala.
La'pa he' ed mak katu kodia namni wnialawarni de riy mak katga de.
20Riy kalwiedweda rhar lirni de hade emeknekama mah wawahra ida.
Mere riy yatyata wniarorni-wnialaini edonna nal untu.
21Riy samomuou lirni-tunnu nodia ra'a-pal lia'a rimormior wialli.
Mak kpodku lira podaknu nwenan nana orgahani.
22Yoma Itmatromlawanni Makdenrer die ra'ani-pallu pede rimormiori rler la re'a-tniaru.
Kniar werwerta edonna na'itar la tniaru.#10:22 Riy dom de rwarora ayat di nnia'eratni emkadina: “Yoma Itmatromlawanni Makdenrer die ra'ani-pallu pede rimormiori rler la re'a-tniaru. Ne re'a-tniaru mak kwatiawua Itmatromlawanni de edon nodi ralam mawla.”
23Riy mak kpodku sukni rhi'a yatyatni-halalli.
Riy mak katu sukni rahaka kirkira-ralma riora me lira-yatu samomuou.
24Riy maka kaplele'era re rlernana hya' to' maka ha rahaka.
Mere riy yatyata re rlernana hya' maka ha ramta'ata.
25La'pa anin lawna kakmoranni ntai tiemna de hota riy yatyata rram nana nhiakarni.
Mere riy kalwiedweda de hota ntutrieri apit lia genni pa nodi liarni.
26Yana mhiopna-mli'irga riy pamalmalsa, hota nhi' to' pa riy ralamni ramehra sidu pa nhi' it nihini pa nmilu,
onde emekwalima ai miokla la it matni pa nmakriarni.
27Mhiu'ru-mhielma mitlina-mitailla Orgahi-Orha'a totpena mmiormiori plalahwa.
Mere riy yatyata tuwnu edona naplahwa.
28Riy mak kden la plol wawna de rha'ar reri aranni la Uplerlawna ne hota rler la ralam yaheparnu.
Mere hya' maka riy yatyata ha rwahaka re hota ha molga.
29 Orgahi-Orha'a Nruwun reria riy maka kaplele'er la do'a-hala.
Mere Orgahi-Orha'a Nweyata-nwaniaga riy yatyata pa rmati-rmolu.
30Riy maka kden la ploini-ple'erni de hota namtemteman samomuou.
Riy yatyata-halala de edonna nmor niana liawanni la'a noha-rai miaka ha ndella de.
31Riy plele'era rwahaur de rnairia kirkira-ralma rior samomuou,
mere la'pa riy yatyata rwahaur de Uplerlawna Nkukum nurnu.
32Riy mak kden la plola wawannu rwahaur de rlol talla pede riy ratlin nande ralamni rahepru,
mere riy yatyata nhi'inde rpudi-rakla, ra'ohpa-ralahara.
Atualmente Selecionado:
Rano'a 10: LEX
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2025, Wycliffe Bible Translators, Inc. All rights reserved.