Rano'a 8
8
Kirkira-ralma rior samomuou die emeknekama patke' ida mak khar lirni pa npolga rimormior wialli totpena rlernohora
1Mitlina! Lir nnio'a-wawa niatu mak kodia wniarora-wnialai samomuou de
emolmolan nekama patke' ida maka polpuolu-hawaunia.
Kirkira-ralma rior samomuou nhar lirni.
2Ntutrier lia wo'or-kawru, loi-talla aratni,
me la'a loi liawna-talan lawna nhiakarni.
3Tatlin lirni la'a gen miak riy rawoka, de la' puohra leta gaini,
la'a loi-talan maka kler la letlawna ralamni.
4Niwra: “Rimormior miy re! Mitlin a li'ru!
La'pa rimormior miaka kmori-kdar lia noha wawannu miy mtia'wa tlinmi la a lir kalwie'du di!
5La'pa miy miak kakleha ma'ta wniarora-wnialai kirkira-ralma rior samomuou, mpiatutu-mpiaye'ela totpena mliernana kirkira-ralma riora plahwa.
Makpodku-kpadku mpiatutu-mpiaye'a totpena miatu mpiarora-mpialai samomuou.
6Mtia'wa tlinmi re, yoma lira-tun muaka ukota ri,
ha raplola me rperkun la miy.
7Mak a'ukota re raplol momuou,
yoma a' di oliet a lia putra-palka ohpa-lahara.
8A li'ru-tu'nu honona raplollol momuou.
La' id mana edonna nwotra-ntal tiaru.
9La' riy mak katu kwarora-kwalai samomuou, de a li'ru-tu'nu rla' nan o'tani yoma raplola,
me la'pa riy maka o'tani kriahlanu etla de riwra a li'ru re raplol toto' memna.
10Mitota-miwawa a lira-nnio'a wawa-nia'tu, yoma hare welli narehia maha wawahra.
Me kirkira-ralma rior de welli narehia lel korkora-mah marmara welli,
11me welli narehelia watu-watu mak welli werweratni,
me edonna nora hya'-hya' to'a maka rimormiori ralamni nala re rtutur wutu.
12A' muaka ha rweta la kirkira-ralma rior samomuou, de wuaror samomuou pleini nampena ghi' hadoma,
agatu wualiria ha samomuounu, me nhi'inde a li'ru-ya'tu na'ititar rer lia.
13La'pa he'a natota-nawawa na'unni-namta'ata Orgahi Orha'a de riy de sukni tia'ala yatyatni-halalli.
A' muaka ha rweta la kirkira-ralma rior samomuou, de a su'ku tia'ala riy maka khi' inonni pa katulu-kapetna.
A ralmu edonna napal niana ilu-wniehwa yatyata-halala me kdiori-kdieha ohpa-lahara.
14A'g ed mak kwatutu-kwaye'a, me a' wal pia ed mak ktutu talan samomuou.
He' mak klernohor a'u de natu liawanni me nodi plolli.
15-16A'g ed mak khima ray-ray re totpena tulanni-kniarni rla' ga'a.
De a'g ed maka ktulan la o'ta-mata la'a hairi re honona,
totpena plolli-mneheni re rewre'wa pa raplola.
La a hihi'u pede marna-wuhura o'ta-mata rawerta-ratailla rira lirni-tunnu de edonna npa'ei-npahal la watghudi-lokarni.
17A ralmu napal niana la he' maka sukni la mai a'u.
He' ed maka kwahakhak a'u hota rlernan a'u.
18A' di de re'a-tniaru yatota-yawawa etla a'u.
He' ed maka klernohora a lira nnio'u-wawa nia'tu re rlernana pripanni-fa'anni pa nodi liarni.
19Maka ha mliernana la a' die
narehelia leli mah marmara welli.
20He' mak klernohor a'u, de nlola loi-talan mak kaplola
yoma a'ula'ala la loi talla mak kaplele'era.
21La'pa he' ed mak ralamni nal nan a'u de agala pa nre'a-ntaru.
Me a'upenga romni la hya'a-hya' to'a.”
Orgahi-Orha'a Nnairi kirkirni-ralma riorni pa Na'ohi-na'ara nohkerna-rai miaran di
22Kirkira-ralma rior samomuou die emeknekama mak khar lirni niwra:
“Orgahi-Orha'a ed mak khi' nan ulga a'u.
E limni enni mulaliaini de a'u la' ululu memna.
23Nohmarna nek de, a'ula' ulga.
Noha gergera-tatiah'i ma'ta de Nhi' nan olek a wua.
24Rmori a' die gera tah'i edonna nden ma'ta,
me la' meni-meni ho'mana gera ormatni mak kopli-kopli edonan ma'ta.
25Rmori a' die
wo'ora-kawru mana edonna rawniau ma'ta.
26Nohkerna nora rai mtatanni mana Orgahi-Orha'a edonna Nhi' ma'ta,
me la'pa tan wiok yanulnullu mana Orgahi-Orha'a edon Nhi' ma'ta.
27Adien wal pia Nwerna lyanti
me umkek nan walia Nhi' tiema-lianu la gera-tah'i nora darta letgarni.
28La'pa Orgahi-Orha'a Nkenia kakma la darta,
ne Nhari wialia gera matni mak kopli-kha'a la'a hletan lawna-yoiri kdieldelamni.
29La'pa Nhopan pa gera-tah'i yana nlergot lola tiema-lianu de a'g ed wal lia,
ne a'umkek nan memna Nwahoiya nohkerna la watu liari wawannu.
30Lera-ler nekpa atiutrier niohora ha Nhi'a hare honona de
emeknekama Orgahi-Orha'a a'na sniayanni#8:30 a'na sniayanni Riy dom de rwarora kata di nnia'eratni de “riy mak katu kakoki-kayapi.” a'u mak khi' E ralamni pa nahepru.
A'g ed maka uhe'i-uhepur nande neniehu-tierter a lia E gaini ralamni.
31Uhe'i-uhepur wal lia noha wawannu maka Ena'ohi-na'ara
nor wutga rimormiori mak ha Nakoki-nayap niana totpena rdella noha wawannu de.
32La' hade pede mitlin la mai a'u tuwari-lawermi re!
Yoma la'pa mliernohora a wniatu'tu-wniaye'u de hota miy mlier la samomuounu.
33La'pa mia' nana lira nnio'a-wawa niatu ri, totpena mpialia la riy mak ktaru kirkira-ralma rior samomuou,
ne yana mpuarwah'a!
34La'pa he' natlina-natailla mai a' die hota nlernana unut lawna.
Lera-ler nekpa nwewiei-nnarnar a lia a nhia'ru gaini
yoma niwra nor a lia roma ida.
35La'pa he'a nlernan a'u, de hota nlernana mormiori,
ne Orgahi-Orha'a ralamni Nala e'a.
36Mere he' edon nlernan a' die, hota nhi' arukia inon wamueheni.
La'pa he' ed maka sukni tia'ala mai a'u, de riy de sukni la matmiati-molmuolu.”
Atualmente Selecionado:
Rano'a 8: LEX
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
© 2025, Wycliffe Bible Translators, Inc. All rights reserved.