Fakahā 6
6
Ko Hono To‘o ‘o e Fitu‘i Silá
1Pea lolotonga ‘eku sio atu ki he Lamí ‘okú ne to‘o ‘a e ‘uluaki sila ‘i he ngaahi sila ‘e fitú, na‘á ku fanongo ki he toko taha he me‘a mo‘ui ‘e faá ‘oku kalanga le‘o-lahi ‘o hangē ko e ‘u‘ulu ‘a e maná, ‘o ne pehē mai, “Ha‘u!” 2Pea ‘asi mai leva ha hoosi tea. Na‘e to‘o kaufana ‘a e toko taha na‘e heka aí, pea na‘e ‘oange hono kalauni. Kuo ‘osi lava ‘ene ngaahi ikuna, peá ne toe ‘alu atu ke ikuna.
3Pea to‘o ‘e he Lamí ‘a e sila hono uá, peá u fanongo ki he pehē mai ‘e he me‘a mo‘ui hono uá, “Ha‘u!” 4Pea toe tu‘u mai mo ha hoosi lanu kulokula momoho. Pea ko e toko taha na‘e heka he hoosi ko iá, na‘e ‘oange mo‘ona ‘a e mafai ke fakangata ‘a e melino ‘a māmaní kae fetāmate‘aki ‘a e kakaí. Pea na‘e ‘oange kiate ia ha fu‘u heletā.
5Pea to‘o ‘e he Lamí ‘a e sila hono tolú, peá u fanongo atu ‘oku pehē mai ‘e he me‘a mo‘ui hono tolú, “Ha‘u!” Pea ‘asi mai ha hoosi ‘uli‘uli ‘oku heka mai ai e toko taha ‘okú ne to‘o ha me‘a fua mamafa. 6Peá u fanongo atu ‘oku hangē ‘oku ongo mai mei he me‘a mo‘ui ‘e faá ha le‘o ‘oku pehē mai, “Ko e kilo uité ‘e fe‘unga hono mahu‘ingá mo ho‘o ngāue totongi ‘aho kakato. Pea pehē pē mo e kilo pa‘ale ‘e tolú, ‘e fe‘unga hono mahu‘ingá mo ho‘o ngāue totongi ‘aho kakato. Pea vakai na‘a mou maumau‘i e lolo ‘ōlivé mo e uain.”
7Pea to‘o ‘e he Lamí ‘a e sila hono faá, peá u fanongo atu ki he le‘o ‘o e me‘a mo‘ui hono faá ‘oku pehē mai, “Ha‘u!” 8Pea ‘asi mai ai ha hoosi tea. Pea ko e hingoa ‘o e toko taha na‘e heka aí ko Mate, pea na‘e muimui mai ai ‘a e Pule‘anga ‘o Maté. Na‘e tuku ange ke nau pule ki he vahe fā ‘e taha ‘o māmani, pea fakangofua ke nau tāmate‘i hono kakaí ‘aki e heletā, mo e honge, mo e mahaki faka‘auha, mo e fanga manu fekai.
9Pea to‘o ‘e he Lamí ‘a e sila hono nimá, peá u sio atu ki he lalo ‘ōlitá ‘oku fonu ai e ngaahi laumālie ‘o e kakai kuo fakapoongi koe‘uhi ko ‘enau mo‘ui‘aki e Folofola ‘a e ‘Otuá mo fakahaa‘i ‘enau tuí. 10Pea nau kalanga, “‘Eiki, ko e toko taha mā‘oni‘oni mo falala‘anga koe. Te ke fakamāu‘i ‘afē nai mo tautea ‘a e kakai na‘a nau tāmate‘i kimautolu ‘i māmaní?”
11Na‘e ‘oange leva ha teunga hina ‘o kinautolu kotoa na‘e tāmate‘í, pea fekau ke nau ki‘i tali si‘i atu pē, kae ‘oua ke kakato ‘a e tokolahi ‘o honau kaungāngāue mo kaungāfononga na‘e pau ke tāmate‘í.
12Peá u sio atu ‘oku to‘o ‘e he Lamí ‘a e sila hono onó, pea na‘e hoko leva ha fu‘u mofuike. Pea fakapo‘uli tu‘u e la‘aá, ‘o hangē kuo ‘ai tauanga‘á, pea totototo e māhiná. 13Pea ngangana mo e fetu‘ú mei he vavaá, ‘o hangē ha fu‘u fiki kaulo‘a kuo fepālekina ‘i ha matangí. 14Pea takatakai ‘a e langí ‘o puli ‘o hangē ko hono takai ha takainga tohí, pea mata‘aki e ngaahi mo‘ungá mo e ‘otu motú mei honau ngaahi tu‘u‘angá.
15Ko e ngaahi tu‘i ‘o māmaní, mo hono kakai ‘iloá, mo e kau ‘eikitaú, na‘a nau toi he ngaahi ‘ana mo e maka he mo‘ungá, ko ‘enau toi fakataha mo e kakai tu‘umālié, mo e kau ma‘u mafaí, mo e kau pōpulá, mo e kau tau‘atāiná. 16Pea nau toki tautapa ki he mo‘ungá mo e maká, “Holo mai ‘o fufū kimautolu mei he fofonga ‘o e toko taha ‘oku ‘afio he taloní pea mo e houhau ‘o e Lamí. 17He kuo hoko mai ‘a e ‘aho fakalilifu ‘o ‘ena houhau na‘e tala mai mei mu‘á. Pea ko hai te ne fa‘a matu‘uaki hono ha‘aha‘á?”
Atualmente Selecionado:
Fakahā 6: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
