Fakahā 5
5
Ko e Takainga Tohi mo e Lami
1Na‘á ku sio ki he toko taha ‘oku ‘afio he taloní ‘okú ne puke ‘i hono to‘omata‘ú ha takainga tohi kuo fakatou tohi ‘i loto mo tu‘a. Pea kuo sila‘i‘aki ha sila ‘e fitu. 2Peá u sio ki ha ‘āngelo kaukaua ‘okú ne kalanga le‘o-lahi, “Ko hai ha taha ‘oku taau ke ne folahi e takainga tohí pea vete hono ngaahi silá?” 3Ka na‘e ‘ikai ha taha ‘i langi, pe ‘i māmani, pe ‘i lolofonua te ne lava ‘o folahi e takainga tohí ‘o lau.
4Peá u tangi lahi ‘aupito, koe‘uhí ko e ‘ikai ha taha ‘e taau ke ne folahi e takainga tohí ‘o sio ki loto. 5Pea toki pehē mai kiate au ‘e he tokotaha he kau mātu‘á, “Tuku ā ho‘o tangí. Sio atu. Ko e toko taha ko ena ‘oku fakatou ui ko e ‘Laione ‘o e Matakali Siutá’ mo e ‘Hako ‘o Tēvitá,’ kuó ne ikuna. Pea ko ia ia te ne folahi e takainga tohí pea vete mo hono ngaahi sila ‘e fitú.”
6Peá u toe sio atu tā ko ha Lami ‘oku tu‘u ‘i loto-mālie he taloní, pea kuo ha‘ofia ia ‘e he me‘a mo‘ui ‘e faá mo e kau mātu‘á. Ko e Lamí, hangē na‘e ‘osi tāmate‘í ka ‘oku mo‘ui pē ia. Na‘e ‘i ai hono me‘atui ‘e fitu mo e mata ‘e fitu. Ko e laumālie ‘e fitu ia ‘o e ‘Otuá, ‘a ia kuo fekau ke ‘alu atu ki he tapa kotoa pē ‘o māmani.
7Pea tu‘u atu ‘a e Lamí ‘o to‘o mai ‘a e takainga tohí mei he nima to‘omata‘u ‘o e toko taha na‘e ‘afio he taloní. 8Pea ko ‘ene to‘o pē ‘a e takainga tohí kuo tō tū‘ulutui kiate ia ‘a e ngaahi me‘a mo‘ui ‘e faá pea mo e kau mātu‘a ‘e toko uofulu mā faá. Na‘a nau taki taha ‘a e ha‘ape mo e ipu koula kuo fonu ‘inisēnisi, ‘a ia ko e ngaahi lotu ia e kakai ‘a e ‘Otuá. 9Pea nau hua leva ‘a e hiva fo‘ou ko eni,
“‘Okú ke taau,
ke tali ‘a e takainga tohí,
mo vete hono ngaahi silá,
he na‘e tāmate‘i koe,
peá ke huhu‘i‘aki ho ta‘ata‘á
ha kakai ma‘á e ‘Otuá
mei he fa‘ahinga kotoa,
mo e lea kotoa,
mo e pule‘anga kotoa,
mo e matakali kotoa.
10Na‘á ke fakahoko kinautolu
ko e pule‘anga fakatu‘i,
mo e kau taula‘eiki,
ma‘á hotau ‘Otuá,
pea te nau hau kinautolu ‘i māmani.”
11Pea lolotonga ‘eku sio atú, na‘e ongo mai ‘a e le‘o ‘o ha kau ‘āngelo tokolahi ‘oku nau haha‘o takai he taloní, pea mo e le‘o ‘o e tu‘unga me‘a mo‘uí mo e kau mātu‘á. Na‘e laui miliona honau tokolahí, 12pea nau kalanga le‘o-lahi,
“‘Oku taau ‘a e Lami na‘e tāmate‘í
ke ‘oange mo‘ona ‘a e mafai
mo e koloa, mo e poto, mo e mālohi,
mo e ngeia, mo e lāngilangi, mo e fakafeta‘i.”
13Peá u toe fanongo atu kuo hanga ‘e he me‘a mo‘ui kotoa pē ‘i langi, mo māmani, mo lolofonua, mo tahi, ‘o hiki ‘enau fakafeta‘i ko eni:
“Ke fakavīkiviki‘i ma‘u ai pē ‘o ta‘e ngata pea ta‘e ngata
‘a e lāngilangi, mo e ngeia, mo e māfimafi
‘o e Toko Taha ‘oku ‘afio ‘i he taloní
pea mo e Lamí!”
14Pea tali mai ‘e he me‘a mo‘ui ‘e faá, “‘Ēmeni,” kae tū‘ulutui ai pē ‘a e kau mātu‘a ‘e toko uofulu mā faá ‘o lotu kiate ia.
Atualmente Selecionado:
Fakahā 5: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
