Fakahā 7
7
Ko e toko 144,000 kuo Faka‘ilonga‘i ma‘á e ‘Otuá
1-2Na‘e toki hā mai ha kau ‘āngelo ‘e toko fā ‘oku nau taki taha tu‘u ‘i hono tuliki ‘i he ngaahi tuliki ‘e fā ‘o māmaní. Pea hanga ‘e he kau ‘āngeló ‘o ta‘ofi tu‘u e matangi ‘e fā ‘o māmaní ke ‘oua na‘a angi ki he fonuá, pe ko e tahí, pe ko ha fu‘u ‘akau. Ko e kau ‘āngelo ‘e toko fā ko iá, na‘e ‘osi fakamafai‘i ke nau maumau‘i e fonuá mo e tahí. Pea na‘e toe hā mai mo ha ‘āngelo kehe na‘e ‘alu hake mei he hopo‘anga ‘o e la‘aá ‘i he hahaké, pea kuó ne mateuteu ke paaki e faka‘ilonga ‘o e ‘Otua mo‘uí ‘i he kakaí. Peá ne kaila ki he kau ‘āngelo ‘e toko faá, 3“Vakai na‘a mou maumau‘i e fonuá, pe ko e tahí, pe ko ha fu‘u ‘akau. Mou tatali pē kae‘oua kuó u paaki ha faka‘ilonga he la‘e ‘o e kau sevāniti ‘a hotau ‘Otuá.”
4Peá u toki fanongo ‘oku lau e tokolahi ‘o e kakai kuo faka‘ilonga‘i honau la‘é, tā ko e toko 144,000 mei he ngaahi matakali kotoa ‘o ‘Isilelí:
5Ko e toko 12,000 mei he matakali Siutá,
ko e toko 12,000 mei he matakali Lūpení,
ko e toko 12,000 mei he matakali Katá,
6ko e toko 12,000 mei he matakali ‘Āselí,
ko e toko 12,000 mei he matakali Nafitalaí,
ko e toko 12,000 mei he matakali Manasé,
7ko e toko 12,000 mei he matakali Simioné,
ko e toko 12,000 mei he matakali Līvaí,
ko e toko 12,000 mei he matakali ‘Isaká,
8ko e toko 12,000 mei he matakali Sepuloní,
ko e toko 12,000 mei he matakali Siosifá, pea
ko e toko 12,000 mei he matakali Penisimaní.
Ko e Kakai mei he Fonua Kotoa pē
9Pea hili iá na‘á ku sio ki ha fu’u kakai na‘e ta‘e ma fa‘a laua hono tokolahí. Ko e kakai mei he matakali kotoa, mo e ha‘a kotoa, mo e fonua kotoa, mo e lea kotoa, ‘oku nau tutu‘u ‘o hanga ki he taloní mo e Lamí. Kuo nau teunga hina kotoa mo to‘o taki taha ha va‘a paame, mo kaila,
10“Ko e ‘Eiki ko homau ‘Otuá
‘a ia ‘oku ‘afio ‘i he taloní,
‘okú ne mafeia ke fakahaofi hono kakaí,
pea pehē pē mo e Lamí.”
11Ko e kau ‘āngelo na‘e haha‘o takai he taloní, na‘a nau tō tū‘ulutui ‘o punou ki he kelekelé ‘i mu‘a ‘i he taloní. Pea tū‘ulutui fakataha mo kinautolu mo e kau mātu‘á mo e me‘a mo‘ui ‘e faá, ‘o nau fakahīkihiki‘i kotoa ‘a e ‘Otuá, ‘o pehē,
12“‘Ēmeni! Ko hotau ‘Otuá,
‘oku ‘o‘ona ‘a e fakavīkivikí mo e fakalāngilangí,
mo e potó, mo e fakafeta‘í,
mo e mālohí, mo e mafaí,
‘o ta‘e ngata pea ta‘e ngata.
‘Ēmeni!”
13Pea fehu‘i mai kiate au e tangata‘eiki ‘e taha, “‘Oku ke ‘ilo nai ‘a e kakai teunga hina ko ení? ‘Oku ke ‘ilo nai honau tupu‘angá?”
14Peá u tali atu, “Tangata‘eiki, ‘okú ke mea‘i pē ‘e koe.”
Peá ne pehe mai,
“Ko e kakai eni
na‘a nau fou mai he faingata‘a lahi.
Kuo nau fō honau valá
‘o hina ekiaki
‘i he ta‘ata‘a ‘o e Lamí.
15Pea nau tutu‘u ai ‘i mu‘a he taloni ‘o e ‘Otuá
‘o lotu kiate ia ‘i hono Temipalé,
‘i he ‘aho mo e pō.
Pea ko ia ‘oku ‘afio ‘i he taloní,
te ne fokotu‘u hono tēniti
‘o fakamalumalu kinautolu.
16‘E ‘ikai te nau toe fiekaia
pe fieinua,
Pea he‘ikai ke toe taa‘i ‘e he la‘aá,
pe te nau velahia.
17Ko e Lami ‘i loto taloní,
te ne hoko ko honau tauhi.
Te ne taki kinautolu ki ha ngaahi matavai fakamo‘ui,
Pea ‘e toki holoholo kotoa ‘e he ‘Otuá ‘a honau lo‘imatá.
Atualmente Selecionado:
Fakahā 7: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
