Fakahā 4
4
Ko e Ouau Lotu Fakahēvaní
1Pea hili ia, peá u toe vakai atu, tā ko ha matapā kuo fakaava mai mei langi. Pea toe ongo mai e le‘o na‘á ku tomu‘a fanongo ki aí ‘oku tatangi ‘o hangē ha talupité, “Ha‘u ki ‘olungá ni. Pea te u fakahā kiate koe ‘a e ngaahi me‘a kuo pau ke hoko maí.” 2Na‘e fakafokifā pē kuo fā‘ofale e Laumālié ‘iate au, peá u sio ki ha taloni ‘oku tu‘u ‘i loto langi pea ‘oku nofo ai e toko taha. 3Na‘e fetapaki ‘a e toko taha ko iá, ‘o hangē ko e maka mahu‘inga ko e siasipaá mo e kanelianó. Pea tu‘u e taloní ‘i ha loto ‘umata na‘e hangē hono lanú ko e ‘emalatá.
4Na‘e tu‘u e taloní ‘i loto mālie ‘i ha ngaahi taloni kehe ‘e uofulu mā fā. Pea kuo nofo ai ha kau mātu‘a ‘e toko uofulu mā fā ‘oku teunga hina pea kalauni koula. 5Pea tapa mai mei he taloni na‘e tu‘u ‘i loto mālié ‘a e ‘uhila pea pā mo e mana, pea ulo ‘i mu‘a he taloní ‘a e ngaahi maama ‘e fitu, ‘a ia ko e laumālie ‘e fitu ia ‘o e ‘Otuá. 6Pea na‘e tu‘u ‘i mu‘a he taloní mo ha me‘a na‘e hangē ha tahi sio‘atá. Na‘e tasilo ‘o hangē ko e kilisitalá.
Na‘e tu‘u takai ki he taloni ‘i lotomālié ha me‘a mo‘ui ‘e toko fā na‘e mata ‘ata‘atā pē ‘a mu‘a mo mui. 7Na‘e hangē ha laioné ‘a e ‘uluakí, pea hangē ha pulú ‘a hono uá. Ko hono tolú, na‘e fofonga‘i tangata, pea ko hono faá leva, na‘e hangē ha ‘īkale ‘oku puná. 8Na‘e taki kapakau ‘e ono ‘a e me‘a mo‘ui ‘e faá, pea mata ‘atā pē honau sinó. Pea ko e ‘aho mo e pō ‘enau kalanga,
“‘Oku mā‘oni‘oni, ‘oku mā‘oni‘oni, ‘oku mā‘oni‘oni
‘A e ‘Eiki ko e ‘Otua māfimafí,
Na‘á ne ‘i ai, pea ‘oku ‘i ai,
pea ‘oku lolotonga hā‘ele mai.”
9Na‘e fai ‘e he me‘a mo‘ui ‘e faá ‘enau vīkiviki‘i mo fakalāngilangi‘i mo fakamālō‘ia ‘a e toko taha ‘oku ‘afio he taloní, ‘a ia ‘e mo‘ui ‘o tuputupu‘á. 10Pea lolotonga iá na‘e tō tū‘ulutui ‘a e kau mātu‘a ‘e toko uofulu mā faá ‘i mu‘a ‘iate ia ‘oku ‘afio he taloní, pea nau hu‘i atu honau ngaahi kalauní ki he ve‘e taloní mo nau kalanga,
11“‘E homau ‘Eiki mo homau ‘Otua,
‘oku taau mo e ‘Afió na ‘a e ngeia mo e lāngilangi,
Pea mo e mafai.
He ko koe na‘á ke ngaohi e me‘a kotoa.
Ko ho finangaló na‘e hoko mai ai e me‘a kotoa pē
Peá ke fakatupu e me‘a kotoa pē.”
Atualmente Selecionado:
Fakahā 4: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
