Fakahā 20
20
Ko e Ta‘u ‘e Taha Afé
1Na‘e toe hā mai ha ‘āngelo ‘oku ‘alu hifo mei he langí, pea ‘okú ne to‘o ‘a e fo‘i kī ki he fu‘u luo ta‘e ‘i ai hano takele, mo ha fu‘u sēini. 2Peá ne puke ‘a e manu fekaí, ‘a e fu‘u ngata tupu‘á, ‘a ē ‘oku ‘iloa ko e Tēvoló, pe ko Sētane, ‘o ne ha‘i seini ke ‘osi mai ha ta‘u ‘e taha afe, 3peá ne lī ia ki he fu‘u luo ‘oku ‘ikai hano takelé, peá ne tāpuni‘i mo sila‘i ‘a e luó ke ‘oua te ne toe lava ‘o kākaa‘i e ngaahi pule‘angá ke ‘osi mai ha ta‘u ‘e taha afe. Pea ka lava ia, pea ‘e toe tuku ange mai ke fuofuoloa si‘i.
4Na‘e hā mai mo ha ngaahi taloni ‘oku heka ai ‘a e fa‘ahinga ne tuku ange kiate kinautolu ke fai e fakamāú. Pea toe hā mai mo e ngaahi laumālie ‘o e kakai na‘e tu‘usi honau ‘ulú koe‘uhí ko ‘enau fakamo’oni kia Sīsū mo e folofola ‘a e ‘Otuá. Ko kinautolu pē ‘a e fa‘ahinga na‘e ‘ikai ke nau lotu ki he manu fekaí, pe ko hono ‘īmisí, pe tali ke ‘ai hono faka‘ilongá ‘i honau nimá, pe ko honau la‘é. ‘E toe mo‘ui pē ‘a e fa‘ahinga ko iá ‘o kaungāpule fakatu‘i mo Kalaisi ke ‘osi ha ta‘u ‘e taha afe.
5(Ko e toenga ‘o e kau maté, ‘e ‘ikai toe mo‘ui kae ‘oua leva kuo ‘osi e ta‘u e taha afe ko iá.) Ko e fuofua toe tu‘u eni ‘a e maté.
6Ko e kakai monū‘ia mo‘oni mo haohaoa ‘a kinautolu ‘e kau ‘i he fuofua toe tu‘u ‘a e maté. ‘E ‘ikai ke ‘i ai ha ivi ‘o e mate ‘anga uá kiate kinautolu. Ka te nau hoko ko e kau faifekau ‘a e ‘Otuá mo Kalaisi, ‘o pule fakataha mo ia ke ‘osi ha ta‘u ‘e taha afe.
Ko e ‘Ulungia ‘a Sētane
7Ka hili e ta‘u ‘e taha afé, pea ‘e tuku ange ‘a Sētane mei hono pilīsoné. 8Pea te ne ‘alu ke fakahala‘i e ngaahi pule‘anga ‘i he tuliki ‘e fā ‘o māmani, ‘a ia ko Koki mo Makoki ia, ke uki mai kinautolu ki he tau. ‘E hangē ko e ‘one‘one ‘o e matātahí ‘a honau tokolahí. 9Te nau laka fakakautau ki he tapa kotoa pē ‘o māmani ‘o ‘ākilotoa ‘a e ‘apitanga tau e kakai ‘a e ‘Otuá, mo e kolo ‘ofeiná. Pea ‘e ‘uha afi mei he langí ‘o faka‘auha kinautolu. 10Ko e Tēvoló, ‘a ia na‘á ne fakahala’i kinautolú, na‘e fakapuna ki he fu‘u ano afi mo e sūlifa, ‘a ia na‘e tomu‘a lī ki ai ‘a e manu fekaí pea mo e palōfita loí. Pea ‘e fakamamahi‘i ai pē kinautolu he ‘aho mo e pō ‘o tuputupu‘a.
Ko e Fakamaau Tukú
11Na‘e hā mai kiate au ha fu‘u taloni hinehina mo ha toko taha ‘oku heka ai. Pea feholaki ‘a langi mo māmani meiate ia, ka na‘a nau fiu kumi ha feitu‘u ke toi ai. 12Peá u sio ki he kakai kuo maté, ‘a e lahi mo e si‘i, ‘oku nau tu‘u ‘o hanga ki he taloní, pea kuo fakaava hake ha ngaahi tohi. Pea toki fakaava leva mo e tohi ‘o e mo‘uí, kae fakamāu‘i e kakai maté ‘o fakatatau ki he fakamatala ‘a e ngaahi tohí ki he‘enau tō‘onga mo‘uí.
13Na‘e tuku ange mai ‘e he tahí ‘a e fa‘ahinga na‘e mate aí, pea toe tuku ange mai ‘e Mate mo e pule‘anga ‘o e maté ‘a ‘ena kakai maté. Pea fakamāu‘i kinautolu kotoa pē ‘o fakatatau ki he‘enau tō‘onga mo‘uí. 14Pea toki fakapuna atu ‘a Mate mo hono pule‘angá ki he fu‘u ano afí. Ko e mate ‘anga uá ia. 15Pea ‘ilonga ha taha na‘e ‘ikai tohi hono hingoá ‘i he tohi ‘o e mo‘uí, na‘e fakapuna atu mo ia ki he fu‘u ano afí.
Atualmente Selecionado:
Fakahā 20: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
