Fakahā 19
19
1Na‘e toe ongo mai ha fekālanga‘i ‘a ha kakai tokolahi ‘i hēvani,
“Fakalāngilangi‘i ‘a hotau ‘Otuá!
He ‘oku ‘a‘ana ‘a e fakamo‘uí, mo e lāngilangí, mo e māfimafí!
2‘Oku ma‘a mo totonu ‘ene fakamāú.
Na‘e hē ‘a māmani
ko e fakalielia ‘a e pa‘umutú.
Ka kuo fakamāu‘i ia ‘e he ‘Otuá.
Kuó ne ‘oange hono tuha
koe‘uhí ko ‘ene fakapoongi
‘a ‘ene kau sevānití.”
3Pea kalanga ai ‘a e fu‘u kakaí,
“Tau fakavīkiviki‘i hotau ‘Otuá!
He ‘e kohutu‘u ai pē ‘o ta‘e ngata
e ‘anga‘anga ‘o e fefiné.
4Pea punou ai e kau mātu‘a ‘e toko uongofulu mā faá mo e ngaahi me‘a mo‘ui ‘e faá ‘o nau lotu ki he ‘Otua, ‘a ia na‘e ‘afio ‘i hono taloní. Pea nau pehē, “‘Ēmeni! Fakafeta‘i ki he ‘Otuá!”
Ko e Ta‘ane ‘a e Lamí
5Na‘e ongo mai mei he taloní ha le‘o ‘oku pehē,
“Mou fakalāngilangi‘i ‘a hotau ‘Otuá
‘a kimoutolu kotoa ko ‘ene kau sevāniti,
‘a kimoutolu kotoa ‘oku ‘apasia kiate iá,
‘a e si‘i mo e lahi.”
6Pea toe ongo mai ha longoa‘a na‘e hangē ha le‘o ‘o ha fu‘u kakai tokolahi, pe hangē ha ‘u‘ulu ‘a ha ngaahi vai lahí, pe ko ha pā ha maná, ‘oku pehē,
“Fakalāngilangi‘i e ‘Otuá!
He kuo pule fakatu‘i
‘a e ‘Eiki ko e ‘Otua māfimafí.
7Ke tau fiefia mo hākailangitau
mo fakavīkiviki‘i e ‘Otuá!
He ko e ‘aho eni e ta‘ane ‘a e Lamí,
pea kuo maau ‘a e fefine malí.
8Te ne vala līneni auiiki mo hinapaki.
(Ko e līnení ko e ngaahi failelei ia e kakai ‘a e ‘Otuá.)
9Pea toki pehē mai leva ‘e he ‘āngeló kiate au, “Tohi eni: ‘E tāpuaki‘i ‘e he ‘Otuá ‘a kinautolu kotoa pē kuo fakaafe‘i ki he ta‘ane ‘a e Lamí.” Pea toe hoko atu ‘a e ‘āngeló, “Ko e folofola tonu eni ‘a e ‘Otuá.”
10Peá u tō tū‘ulutui atu ki he va‘e ‘o e ‘āngeló ‘o lotu kiate ia. Kae pehē mai ‘e ia, “Tuku ia! Ko ho kaungātamaio‘eiki pē au, mo ho kaungālotu, pea mo kinautolu kotoa pē ‘oku nau mateaki‘i e ngaahi mo‘oni na‘e fakahā mai ‘e Sīsuú. Lotu pē ki he ‘Otuá!”
He ko e ngaahi mo‘oni na‘e fakahā mai ‘e Sīsuú, ko ia na‘e fakamānava‘i‘aki e kau palōfitá.
Ko e Hoosi Teá mo e Folofola ‘a e ‘Otuá
11Na‘á ku toe sio kuo ava mai e langí, pea ‘oku ‘asi mai ha hoosi tea. Ko e hingoa ‘o e toko taha na‘e heka aí ko Falala‘anga mo Mo‘oni, he ‘oku faitotonu ‘ene fakamāú mo ‘ene taú. 12Na‘e hangē ‘a hono ongo fofongá ko ha ongo ulo‘i afí, pea lahi e ngaahi kalauni na‘á ne ‘ai. Na‘e tohi ‘i hono sinó ha hingoa, ka ko ia toko taha pē na‘e mahino ki ai ‘a hono ‘uhingá.
13Ko hono teungá na‘e pani toto, pea ko hono hingoá “Ko Folofola ‘a e ‘Otuá.” 14Na‘e kaungāfononga mo ia ha ngaahi konga kau fakalangi ‘oku nau heka ‘i ha ngaahi hoosi tea, pea ko honau teunga taú ko e līneni auiiki mo hinapaki. 15Na‘e ha‘u ha heletā māsila mei hono ngutú ‘o taa‘i e ngaahi pule‘angá. Te ne pule‘i‘aki kinautolu ha tokotoko ukamea, pea te ne tāmoloki ke ‘osi e toenga kālepi e houhau ‘o e ‘Otua māfimafí mei he fale ngaohi‘anga uainé. 16Na‘e tohi ‘i hono alangá mo hono pulupulú e hingoa “Ko e Tu‘i ‘o e ngaahi tu‘i mo e ‘Eiki e ngaahi ‘eiki.”
17Na‘e hā mai leva ha ‘āngelo ‘oku tu‘u mei he la‘aá. Pea kaila ia ki he fanga manupuna ‘oku nau puna holo he vavaá, “Mou omi ki he fu‘u kātoanga ‘a e ‘Otuá! 18Mou omi ‘o kai he kakano ‘o e ngaahi tu‘i, mo e kau ‘eikitau, mo e kau to‘a. Ōmai ‘o kai he kakano ‘o e fanga hoosi, mo e kau tau heka-hoosi, mo e kakano ‘o e kau pōpula mo e kau tau‘atāina, mo e kakano ‘o e kakai ‘iloa mo e kakai ta‘e ‘iloa.”
19Na‘á ku toe sio atu kuo kau fakataha ‘a e ngaahi tu‘i kotoa pē ‘o māmani pea mo e manu fekaí. Pea nau tau mo e toko taha na‘e heka he hoosi teá mo ‘ene kau taú. 20Ka na‘e puke pōpula e manu fekaí pea mo e palōfita loí, ‘a ia na‘á ne fai mana ma‘á e manu fekaí kae lava ke ne lohiaki‘i e kakai kotoa pē kuo ‘ai ‘iate kinautolu e faka‘ilonga ‘o e manu fekaí mo lotu ki hono ‘īmisí. Pea na‘e toki lī mo‘ui pē ‘a e manu fekaí mo e palōfita loí ki he fu‘u ano afi sūlifa kakahá, 21kae tāmate‘i e toenga ‘o ‘ena kau taú ‘aki ‘a e heletā na‘e ha‘u mei he ngutu ‘o e toko taha na‘e heka he hōsí. Pea kai pāpāhia ‘a e fanga manupuná he kakano ‘o honau ‘anga‘angá.
Atualmente Selecionado:
Fakahā 19: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.
