Fakahā 21
21
Ko e Langi Fo‘oú mo e Fonua Fo‘oú
1Na‘e hā mai kiate au ha langi fo‘ou mo ha fonua fo‘ou. Ko e langi motu‘á mo e fonua motu‘á, kuó na pulia, pea mole mo e tahí. 2Peá u sio atu ‘oku ‘alu hifo mei langi mei he ‘Otuá ‘a e Kolo Tapú, ‘a Selusalema fo‘ou, ‘o hangē ha fefine mali kuo mateuteu mo maau ke fe‘iloaki mo hono husepānití.
3Pea ongo mai ha kaila mei he taloní, “Vakai, kuo ‘afio e ‘Otuá ‘i he lotolotonga ‘o e fa‘ahinga e tangatá. Te ne ‘afio ‘iate kinautolu, pea te nau hoko ko hono kakaí, pea ne hoko ia ko honau ‘Otuá. 4Te ne holoholo kotoa honau lo‘imatá, pea he ‘ikai ke toe mate ha taha, pe toe fai ha tauanga‘a, pe ko ha fetāngihi mo ha mamahi. Kuo ngata e ngaahi me‘a ‘o e kuo hilí.”
5Pea toe pehē mai ‘a e toko taha na‘e heka he taloní, “Vakai, ko au eni ‘oku ou fakafo‘ou e me‘a kotoa pē. Tohi leva, he ko ‘eku ngaahi leá ‘oku mo‘oni mo falala‘anga.”
6Peá ne toe pehē mai kiate au, “Kuo lava! Ko aú ko e ‘uluaki mo e faka‘osi, ko e kamata‘anga mo e iku‘anga. Pea ko ia ‘oku fieinuá te u ‘oange ke inu ta‘e totongi mei he matavai ‘o e mo‘uí. 7Ko e pale eni ‘o kinautolu ‘e ikuná, te u hoko ko honau ‘Otua, pea nau hoko ko ‘eku fānau.
8Ka ko e kakai mamió, mo e kakai kotoa pē ‘oku ta‘e tui, pe anga-fakalielia, pe tāmate, pe fe‘auaki, mo kinautolu ‘oku fakalou‘akau, pe lotu ki he tamapua, pe ngutu loi, ‘e laku kinautolu ki he ano afi mo e sūlifa, ‘a ia ko e mate ‘anga uá ia.”
Ko Selusalema Fo‘ou
9Na‘e hā mai kiate au ha taha he kau ‘āngelo ‘e toko fitu na‘e ‘i ai ‘a e ipu ‘e fitu kuo fonu he ngaahi faingata‘a fakalilifu faka‘osí. Pea ha‘u ia kiate au ‘o pehē mai, “Ha‘u angé, ka u fakahā atu ‘a e Ta‘ahine Ta‘ané, ‘a e hoa e Lamí.” 10‘I he nofo’ia au ‘e he Laumālié, na’e ‘ave au ‘e he ‘āngeló ki he tumu‘aki ‘o ha mo‘unga mā‘olunga. Peá ne fakahā mai kiate au ‘a Selusalema, ‘a e Kolo Tapú, ‘oku ‘alu hifo mei langi mei he ‘Otuá, 11pea ‘oku huhulu ai e lāngilangi ‘o e ‘Otuá. Na‘e fetapaki ‘o hangē ha ngaahi maka mahu‘ingá ‘o hangē ha siasipá, pea ma‘a ‘o hangē ha kilisitalá. 12Ko hono ‘aá na‘e mā‘olunga mo matolu, pea na‘e ‘i ai mo hono ngaahi matapā ‘e hongofulu mā ua na‘e le‘ohi taki taha ‘e ha ‘āngelo. Na‘e tohi he funga matapā taki taha ‘a e hingoa ‘o e taha ‘i he ngaahi matakali ‘e hongofulu mā ua ‘o ‘Isilelí. 13Na‘e hanga ‘a e ngaahi matapā ‘e tolu ki he hahaké, pea tolu ki he tokelaú, tolu ki he tongá pea tolu ki he hihifó. 14Na‘e langa e ‘ā ‘o e koló ki ha makatu‘unga ‘e hongofulu mā ua na‘e tohi ai e hingoa e kau ‘apōsitolo ‘e hongofulu mā ua ‘a e Lamí.
15Pea ko e ‘āngelo na‘e lea mai kiate aú, na‘e ‘i ai ‘ene me‘afua koula ke fua‘aki e koló, mo hono ngaahi matapaá mo hono ‘aá. 16Na‘e tapafā ‘a e koló ‘i hono māukupú mo hono lōloá. Pea fua ‘e he ‘āngeló ‘a e koló tā ko e kilomita ‘e ua afe nimangeau hono māukupú pea kilomita ‘e ua afe nimangeau hono mā‘olungá. 17Na‘e toe fua ‘e he ‘āngeló ‘a e ‘aá, tā ko e mita ‘e onongofulu mā nima ‘a hono mā‘olungá, ‘o fakatatau ki he he‘etau fua lōloa ‘atautolú.
18Na‘e ngaohi‘aki e ‘aá ‘a e siasipa, kae ngaohi‘aki e koló ‘a e koula haohaoa na‘e ma‘a ‘o hangē ha kilisitalá. 19Na‘e fakasanisani‘aki ‘a e ngaahi maka fakava‘e e ‘aá ‘a e ngaahi maka mahu‘inga kehekehe. Ko e ‘uluakí ko e siasipa, ko hono uá ko e sāfaia, ko hono tolú ko e kalisitone, ko hono faá ko e ‘emalata, 20ko hono nimá ko e satoniki, ko hono onó ko e sātio, ko hono fitú ko e kalisolaite, ko hono valú ko e pelili, ko hono hivá ko e tōpasi, ko hono hongofulú ko e kelaisapaso, ko hono hongofulu mā tahá ko e sāsini pea ko hono hongofulu mā uá ko e ‘ametisi. 21Ko e ngaahi matapā ‘e hongofulu mā uá, ko e fo‘i mata‘i tofe ia ‘e hongofulu mā ua. Pea ko e ngaahi hala ‘o e koló na‘e tanu ‘aki e koula mo‘oni na‘e ma‘a ‘o hangē ha sio‘atá.
22Na‘e ‘ikai te u sio ki ha temipale ‘i he koló, he ko hono Temipalé pē ‘a e ‘Otua Māfimafí tonu, mo e Lamí. 23Pea na‘e ‘ikai ke toe ‘aonga ‘a e la‘aá, pe ko e māhiná, ki he koló. He na‘e hulungia ia ‘i he lāngilangi ‘o e ‘Otuá, pea ko e Lamí pē ‘a hono māma‘angá.
24‘E fononga ‘a e kakai ‘o māmani ‘i hono māmá, pea ‘e luva mai ki ai ‘e he ngaahi tu‘i ‘o māmaní honau ngeiá. 25Na‘e fakaava ai pē e ngaahi matapā ‘o e koló he ‘ahó, pea ‘e ‘ikai ke toe tāpuni, he ‘e ‘ikai pē ke toe po‘uli ia ai. 26‘E luva mai ‘e he ngaahi tu‘i ‘o māmaní ki he koló ‘a e ngeia mo e lāngilangi ‘o e ngaahi kakaí. 27Ka ‘e ‘ikai ke hū mai ki he koló ha ‘uli, pe ko ha taha ‘okú ne fai e ngaahi tō‘onga fakalielia, pe ‘oku ngutu-loi. Ngata pē ‘iate kinautolu ‘oku tu‘u honau hingoá ‘i he tohi ‘o e mo‘uí te nau hū ki he koló.
Atualmente Selecionado:
Fakahā 21: TCNT
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Tongan Contemporary New Testament © Bible Society of the South Pacific, 2011.