A-pûn Awang 27
27
Isak Shimân Byî É Jeju Lé Yakup Wó Yu É Hkyô
1Isak gi, mang luî, yhâng é myòqmhop mhop lô mù, myòq a myàng lo dùt byùq é hkûn, yhang zo ko sû yùq Eso lé ji yù luî, yhang lé, “Ngá zo ê.” ga wùt ri.
Haú hkûn, Eso gi, “Ngò, shî má nyi lhê.” ga tû taî ri.
2Isak gi, “Ahkuî, ngò mâng byùq bê; hká nyí ru shî râ làq, ngò a sé. 3-4Haû mù, ngò gi, a shî shi-má, nang lé wó shimân byî to râ matú, ahkuî, náng é sho-kóng zê nghut é myodúng htuq eq lai lé yu chûng mù, yòso mó shut htoq ê luî, ngá é matú sho ê bìk lò àq. Haú mù, ngò zô nau é xun ngham gaí luî, ngò zo râ matú lo htûng byi aq.” ga taî ri.
5Isak gi, yhang zo Eso lé haú hkyô taî nyi é hkûn, Rebeka wó gyô ri. Eso gi, sho ê bìk lò râ ga yòso mó shut e ló byùq é hkûn, 6-7Rebeka gi, yhang zo Yakup lé, “Wú aq, náng wa gi, nungmang Eso lé, ‘Ngò a shî shi lé, haû Yhûmsîng Garaî é hí má, ngò, nang lé wó shimân byi râ matú, yòsô sho yu lò mù, ngo lé xun ngham lo gaí tso aq.’ ga taî é lé, ngò wó gyô ri. 8Ahkuî, ngá zo ê, rago gyô yù mù, ânu taî é dông kut àq; 9bainám hpúng má ê mù, yúng é bainám zo í du ê she lò àq; haú hkûn, ngò gi, náng wa zô nau é dông nghâm é xun gaí râ nghut lhê. 10Haú hkûn, yhang gi, yhang a shî shi-má, nang lé wó shimân byi sháng gàq, nàng gi, haú lé, yhang zo râ matú yu ló byi aq.” ga taî ri.
11Yakup gi, yhâng nu Rebeka lé, “Nghut kôlhang, ngá mang Eso gi, sho-maú yùq é byù nghut ri; ngò gi, showa nú nhâm é byù ru nghut lhê. 12Ngá wa ngo lé lhom sop wú le hkâsu kut râ? Ngò gi, yhâng é hí má byù mhaú dùt byùq mù, shimân jeju a wó é htoq agó, lhom nhîng pyâm é yuq hui zo râ nghut lhê.” ga tû taî ri. 13Yhâng nu gi, yhang zo lé, “Ngá zo ê, nàng hui zo râ nhinghkun gi, ngá chyáng zùq sháng. Ngò taî é dông za kut àq; ngá é matú bainám zo í du ê she lò àq.” ga taî ri.
14Haû mù, Yakup gi, bainám zo í du lé, yhâng nû chyáng ê she lò byî ri; yhâng nu gi, yhâng wa zô nau é dông, shoxun ngham gaí bê nghut ri. 15Hau htâng, Rebeka gi, yhûm má jòq é, yhang zo ko sû yùq Eso é mèbu je réng je yúng é lé yù mù, yhang zo tiq sû yùq Yakup lé hut byî ri. 16Yhang gi, yhâng é lòq má le, yhâng é chyut chyut zâ é lìngzing má le, bainám kuq yùp byî ri. 17Hau htâng, yhang gi, yhang zo Yakup é lòq má, yhang gaí é shoxun ngham eq mùk lé ke byî ri.
18Haú hkûn, Yakup gi, yhâng wâ chyáng wang ló mù, “Âwa.” ga wùt jáng, Isak gi, “Oî, ngá zo ê; nàng gi, ó hká yùq nghut lhê lhú?” ga tû taî ri.
19Yakup gi, yhâng wa lé, “Ngò gi, nungzo zo-mún Eso nghut lhê. Nàng taî é eq rajung za kut bê. Jeju mai toq zûng mù, nàng, ngo lé wó shimân byi râ matú, ngá é shoxun zo aq.” ga taî ri.
20Isak gi, yhang zo lé, “Ngá zo ê, haû í hân shoq gi, nàng hkâsu kut wó ho yu é lhú?” ga myî ri.
Yhang zo gi, “Náng é Garai Gasang nghut é haû Yhûmsîng Garai luì za wó nhang é yánmai nghut lhê.” ga tû taî ri.
21Haú hkûn, Isak gi, Yakup lé, “Ngá zo ê, ngá nâm má huî lé aq, nàng gi, ngá zo Eso teng a têng é hkyô lé wó sé râ matú, ngò, nang lé sop wú bá.” ga taî ri.
22Yakup gi, yhâng wa Isak nàm má huî ê jáng, yhâng wa gi, yhang lé sop luî, “Htê gi, Yakup é htê, nghut kôlhang, lòq gi, Eso é lòq nghut ri.” ga taî ri. 23Yhâng wa gi, Yakup é lòq má yhang mang Eso é lòq su sho-maú yùq tô é yánmai, Yakup lé a dàt sop gyo mù, yhang lé shimân byi bê nghut ri. 24Yhâng wa gi, “Nàng, gè gè ngá zo Eso nghut lhê lhú?” ga myî ri.
Yhang gi, “Nghut lhê.” ga tû taî ri.
25Haú hkûn, yhâng wa gi, “Ngá zo ê, ngò zo mù, nang lé wó shimân byi râ matú, náng é shoxun yu lò àq.” ga taî ri.
Yakup gi, yhâng wa lé shoxun yù byî é nghut mù, yhâng wa gi, zo bê nghut ri. Yakup gi, tsibyiq wing le ra-tsuí yù byi jáng, yhâng wa gi, shuq bê nghut ri. 26Hau htâng, yhâng wa Isak gi, yhang lé, “Ngá zo ê, shî má huî lé mù, ngo lé bo-puq puq byi aq.” ga taî ri.
27Haû mù, yhang gi, huî ê luî, yhâng wa lé bo-puq puq byî ri. Isak gi, yhâng é mèbu shôm lé nam yù mù, shimân byî ri; shimân dang haû gi,
“Wú aq, ngá zô é shôm gi, yò lé,
haû Yhûmsîng Garai shimân byî é hôwa shôm su gâ ri.
28Garai Gasang gi, mauhkûng mâ é nghân eq,
myìdàm htoq mâ é myì xû le,
gùqzò muilhum eq tsibyiq wing asik le, agùn agó shimân byi sháng gàq.
29Byu myû wuì gi, nang lé dójaú mù,
byu pé gi, nang lé ngóm gòp luî, noq kó sháng gàq.
Nàng gi, nunggu nungmâng pê é yhûmsîng dùt mù,
náng nû é yhang zo yùqzô pé gi, nang lé ngóm gòp luî, noq kó sháng gàq.
Nang lé nhîng é bang gi, nhîng pyâm é hui kó sháng gàq;
nang lé shimân byî é bang gi, shimân byî é hui kó sháng gàq.” ga ri.
30Yakup gi, yhang lé yhâng wa Isak ban shimân byî é htâng má, yhâng wâ é hí mai toq htoq ló bê; hau htâng a myáng má, yhang mang Eso gi, sho hô jang mai taû jé lô bê nghut ri. 31Yhang le, xun ngham gaí mù, yhâng wâ chyáng yu wang ló ri. Haû mù, yhang gi, yhâng wa lé, “Âwa ê, toq zûng mù, nàng, ngo lé wó shimân byi râ matú, ngá é shoxun zo aq.” ga taî ri.
32Yhâng wa Isak gi, yhang lé, “Nàng gi, ó yùq nghut lhê lhú?” ga myî ri.
Haú hkûn, yhang gi, “Ngò gi, nungzo zo-mún Eso nghut lhê.” ga tû taî ri.
33Haú hkûn, Isak gi, kòk kòk yhang dan nán luî, “Haû jáng, bìk lo é sho chyoq mù, ngá chyáng yu lo é gi, ó yùq nghut é lhú? Nàng wang lò râ hí má za ngò zo luî, yhang lé shimân byî kat bê; yhang gi, gè gè yhang, shimân byî é hui berâ nghut lhê!” ga taî ri.
34Eso gi, yhâng wâ é dang lé wó gyo jáng, htê mó o mó èq wùt ngau garu luî, yhâng wa lé, “Ngá wa ê, ngo lé le shimân byi aq ô!” ga taî ri.
35Nghut kôlhang, yhâng wa gi, “Nunggu gi, mhaû lhik luî, náng é shimân jeju lé yu pyám byi bê nghut ri.” ga taî ri.
36Eso gi, “Hau é yánmai, yhâng é myìng gi, Yakup gâ lhê, a nghut lhí? Yhang gi, ngo lé, shî eq í dâm mò zo bê nghut ri; sânghî dàm gi, ngá é zo-mún hkô lé yu pyám byi; ahkui dàm gi, ngá é shimân jeju lé dum yu pyám byi bê nghut ri.” ga taí mù, “Nàng gi, ngá é matú, hai shimân jeju le a myhit to byi lo lhú?” ga myî ri.
37Haú hkûn, Isak gi, Eso lé, “Ngò gi, yhang lé, náng é yhûmsîng kut àq nghû bê; yhâng é buìnùm ji-myi wuì lé, yhâng é duìnhâng zoshâng kut keq nghû bê; ngò gi, yhang lé, gùqzò muilhum eq tsibyiq wing asik htuq pôm byi bê nghut lhê. Haû mù, ngá zo ê, ngò gi, nang lé haî wó kut byi lo râ lhú?” ga tû taî ri.
38Eso gi, yhâng wa lé, “Ngá wa ê, shimân jeju gi, ralhum za wó é nghut lhê lhú? Ngá wa ê, ngo lé le shimân byi laq ô!” ga taí mù, htê mó èq wùt ngau ri.
39Yhâng wa Isak gi, yhang lé,
“Nàng nyi é jowò gi,
myìdàm htoq mâ é myìhpún eq le,
mauhkûng htoq mâ é nghân eq le
wê gâng nyì râ nghut lhê.
40Nàng gi, shâm chûng mù chyungxe duì râ nghut lhê;
nàng gi, nunggu lé dójaú râ nghut lhê.
Nghut kôlhang, nàng gi, nyì chyí yàp a chyí dùt lo é hkûn,
yhang hun tô é kyaú lé,
náng é lìngzing mai hkyut dú pyám râ nghut lhê.” ga tû taî ri.
Yakup, Laban Chyáng Hpang Jé É Hkyô
41Eso gi, yhâng wâ èq Yakup lé shimân jeju byî pyám bê nghut é yánmai, Yakup lé a naù a wom kut bê nghut ri. Yhang gi, “Ngá wâ é yánmai, iyon yon râ buìnyì gi, chyâng lò bê nghut ri; haú hkûn, ngo gi, ngá gu Yakup lé sat pyám râ nghut lhê.” ga yhânggùng yhang taî ri.
42Yhang zo ko sû yùq haû su gâ é hkyô, Rebeka lé taî kyo kôjáng, yhang gi, yhang zo tiq sû yùq Yakup lé ê ji lò nhâng mù, yhang lé, “Nungmang Eso gi, yhang nhik shî râ matú, nang lé sat pyám râ ga myìt nyì bê nghut ri. 43Haû mù, ngá zo ê, ahkuî, ngò taî é su kut àq; toq mù, Haran má nyi é ngá mûng Laban chyáng radá dâm hpang ê àq. 44Nungmang nhik-yo bui byùq é hkûn jé shoq, haú má, yhang eq rahá rayòq rabun ê nyi nyi àq. 45Nungmang, nang lé nhik-yo buî byùq mù, yhang lé nàng kut é hkyô tô-myhî pyám jáng, nàng, haû mai dum taû lò râ matú, ngò, nang lé dang kyô kat râ nghut lhê. Ngò gi, haî mù, ra-nyí má za núngnhik í yùq é lé lhoqsûm pyám râ lhú?” ga taî ri.
46Hau htâng, Rebeka gi, Isak lé, “Ngò gi, Hiti a-myû myiwe wuì shí bâng é yánmai, nyì wuî shi ló ri. Yakup gi, Hiti a-myû myiwe wuì shí bang sû é, shí mau mâ é myiwe yu é ru nghut le gi, ngò chyungxe dui nyì kôlhang, hai lichyúm a htoq lo nghut ri.” ga taî ri.
Obecnie wybrane:
A-pûn Awang 27: znot
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2025, Wycliffe Bible Translators, Inc.
