A-pûn Awang 26
26
Isak Eq Abimelek É Hkyô
1Hau htâng, haú mau má, Abraham é i-pyàt má mùtmó gyó é su, mùtmó dum gyó é nghut mù, Isak gi, Hpilisiti byu pê é hkóhkâm Abimelek nyi é Gerara jowò má e ri. 2Haú hkûn, haû Yhûmsîng Garai gi, Isak chyáng htoq shit mù, “Egutuq ming má hkâgyó ê; Ngò, nang lé nyì nhang é mau má nyì àq. 3Shi mau má rayòq rabun zo nyì àq; Ngò gi, nàng eq rahá nghut nyî mù, nang lé shimân byi râ nghut lhê. Ngò gi, nàng eq náng é awùt ashîn pé lé, maumyî shî bànshoq byi râ; Ngò gi, náng wa Abraham lé dâkam tô é dang lé lhoqdìk râ nghut lhê. 4Ngò gi, náng é awùt ashîn pé lé, mauhkûng mâ é kyî su myo nhâng mù, maumyî shî bànshoq yhángmòq lé byi râ nghut lhê; myìdàm htoq mâ é byù myû lhúnglháng gi, náng é awùt ashín#26:4 Awùt ashín gâ é lé, náng é a-myui le wó nghu lhê. dông mai shimân jeju wó yû kôrâ nghut lhê. 5Hkâsu mù gâ le, Abraham gi, Ngá é jì-no gyo mù, Ngò shit tô é hkyô, Ngá é hkunmó, Ngò hkyô tô é danglù mó eq Ngò tô tô é târâ pé lé châng é yánmai nghut lhê.” ga taî ri. 6Haû mù, Isak gi, Gerara jowò má nyi nyi ri.
7Haú jowò mâ é byu pé mai yhâng é yhûmsîng myhí eq séng luî, yhang lé myi kôjáng, Isak gi, “Yhang gi, ngá é yhûmsîng myhí nghut lhê.” ga taí râ lé gyùq é yánmai, “Yhang gi, ngá nhammó nghut lhê.” ga taî ri. “Rebeka gi, yúng sû nghut mù, yhâng é yánmai, shí jowò mâ é yùqgè wuì ngo lé sat pyám âbe.” ga yhang myìt yu ri.
8Isak haú má nyi é buìnyì tsómra myáng jáng, Hpilisiti hkóhkâm Abimelek gi, hkohot mai wú hkyô kat é hkûn, Isak eq yhâng é yhûmsîng myhí Rebeka hkye lhûm nyi é lé myang ri. 9Haû mù, Abimelek gi, Isak lé ji yù luî, “Yhang gi, náng é yhûmsîng myhí yhang nghut ri myhî-nhung! Nàng gi, haî mù luî, ‘Yhang gi, ngá é nhammó nghut lhê.’ nghû taî é lhú?” ga taî ri.
Haú hkûn, Isak gi, “Yhâng é yánmai, ngá kâng gyó âbe nghû wó myìt luî nghut lhê.” ga tû taî ri.
10Haû jáng, Abimelek gi, “Nàng, haî mù, ngá-mòq é ahtoq má shî su kut é lhú? Shî mâ é yùqgè rayùq yùq, náng é yhûmsîng myhí eq záng yhup é ru nghut le gi, nàng, ngá-mòq é ahtoq má yubàk ihkyùp lhoqháng byi berâ nghut lhê.” ga taî ri.
11Haû mù, Abimelek gi, yhâng é mingbyû wuì bànshoq bang lé, “Shí yùq lé le, yhâng é yhûmsîng myhí lé le, shut é sû ó yùq nghut kôlhang, hkyak shî ra râ nghut lhê.” ga dangmó hkyô ri.
12Isak gi, haú mau má kyô hkyó gàn hkân é nghut mù, haú zân yhang rashô tú myang shû yu ri; haû gi, yhang lé, Yhûmsîng Garai shimân byî é yánmai nghut ri. 13Yhang gi, sùtzè wó sû dùt mù, yhâng é sùtzè gi, ru wó jàt nyi é nghut luî, yhang gi, sùtzè wó dik sû dùt bê nghut ri. 14Yhang gi, sau pé eq no myang pé le, duìnhâng zoshâng wuì le, gyai yhang wó é nghut mù, haû Hpilisiti byu pé gi, yhang lé mânon bùm bekô nghut ri. 15Haû mù, Hpilisiti byu pé gi, yhâng wa Abraham é i-pyàt má, yhâng wâ é duìnhâng zoshâng wuì dû é wuìhtúng bànshoq lé, myi-tse dû pyíng mù, nghop pyám byî akô nghut ri.
16Hau htoq agó, Abimelek gi, Isak lé, “Nàng gi, ngá-mòq htoq wum-o bò bê nghut mù, ngá-mòq chyáng mai htoq ló byùq àq.” ga taî ri.
17Haû mù, Isak gi, haû mai htòt luî, Gerara langhkaû má zúm saí mù, haû má nyi nyì bê nghut ri. 18Isak gi, Abraham é i-pyàt má dû é wuìhtúng pé lé, Abraham shi é htâng má, Hpilisiti byu pê èq dû nghop pyâm to byi bê lé, dum dû htông yù mù, yhâng wa myhîng tô é myìng pé lé roq dum myhîng to bê nghut ri.
19Isak é duìnhâng zoshâng wuì gi, langhkaû haû má du kô é hkûn, gyêng yúng é wuìbúm bùq htoq é wuìhtúng myang dû htoq akô nghut ri. 20Nghut kôlhang, Gerara mâ é shigu zúng bang gi, “Wuì shî ngá-mòq é nghut lhê!” ga, Isak é shigu zúng bang eq taî byòq lhûm akô. Yhángmòq haû su taî byòq lhum kô é yánmai, wuìhtúng haû lé, Esek#26:20 Esek gâ é gi, byòq lhum gâ é lichyúm nghut lhê. ga myhîng akô nghut ri. 21Hau htâng, yhángmòq gi, gótû wuìhtúng rahtúng dum dû akô; nghut kôlhang, wuìhtúng haû eq le dum byòq lhûm akô; haû mù, Isak gi, wuìhtúng haú lé, Sitna#26:21 Sitna gâ é gi, gyè dut lhum gâ é lichyúm nghut lhê. ga myhîng ri. 22Yhang gi, haû mai htòt mù, gótû wuìhtúng dum dû ri; wuìhtúng haû lé gi, ó eq le a byòq lhum lo nghut ri. Haû mù, yhang gi, “Ahkuî, haû Yhûmsîng Garai gi, ngá-mòq lé nyì jowò byi bê nghut mù, ngá-mòq gi, maumyî shî má myô htam e ló berâ nghut lhê.” ga taí mù, wuìhtúng haú lé, Rehobot#26:22 Rehobot gâ é gi, nyì jowò gâ é nghut lhê. ga myhîng ri.
23Isak gi, haú jowò mai Berasheba má dòq ló ri. 24Haú myîn, haû Yhûmsîng Garai gi, yhang lé htoq shit mù, “Ngò gi, náng wa Abraham é Garai Gasang nghut lhê. Hkâgyùq, hkâsu mù gâ le, Ngò gi, nàng eq rahá nghut nyi lhê; Ngò gi, nang lé shimân byi râ nghut é htoq agó, Ngá é duìnhâng zoshâng Abraham é yánmai, náng é awùt ashîn pé lé, byù du lhoqmyo byi râ nghut lhê.” ga taî ri.
25Isak gi, haú má hkungga gyàp ralhum saí mù, haû Yhûmsîng Garaî é myìng lé lâng ri. Yhang gi, haú jowò má yhâng é zúm lé le saî ri; yhâng é duìnhâng zoshâng wuì gi, haú jowò má wuìhtúng dû akô nghut ri.
26Haú u lé, Abimelek gi, yhang lé hpàqchyî byi sû Ahuzat eq yhâng é gyèzau Hpihkola lé shuî chûng mù, Gerara mai Isak chyáng lé jé ri. 27Haû mù, Isak gi, yhángmòq lé, “Núngmòq gi, ngo lé a nguì mù, núngmòq chyáng mai hkat htoq pyám kôluî nhîng, haî mù, ngá chyáng lé jé akô lhú?” ga lhom myî ri.
28Yhángmòq gi, “Haû Yhûmsîng Garai, nàng eq rahá nghut nyi é lé, ngá-mòq san za yhang myàng bê nghut lhê; haû mù, ngá-mòq gi, ‘Nàng eq ngá-mòq é gyoro má, myìt hui danghtum htûm to ra bê.’ nghû taî é nghut lhê. Nàng eq ngá-mòq myìt hui hkyô yu to sháng nghû lé é nghut lhê. 29Haú hkûn, ngá-mòq gi, nang lé a rhoî zô é za rago kut luî, ngón za nhang kat é su, nàng le, ngá-mòq lé a ge é haî le a kut sháng gàq. Ahkuî, nàng gi, haû Yhûmsîng Garaî èq shimân byî é hui sû nghut ri.” ga tû taî akô nghut ri.
30Hau htâng, Isak gi, yhángmòq lé zoshuq poî kut byî é nghut mù, yhángmòq gi, chôm zo chôm shuq bekô nghut ri. 31Htang nàpkyó noq le, yhángmòq toq mù, rayùq eq rayùq dangshikaq to bekô nghut ri. Hau htâng, Isak gi, yhángmòq lé, yhángmòq é hkyôwuì shut nhang kat é nghut luî, yhángmòq gi, yhâng chyáng mai ngón za taû ló byùq bekô nghut ri.
32Haú nyí, Isak é duìnhâng zoshâng wuì gi, “Ngá-mòq wuì myang dû htoq bê.” ga yhángmòq dû é wuìhtúng eq séng luî, yhang lé lé taî kyô akô nghut ri. 33Yhang gi, wuìhtúng haú lé Shiba#26:33 Shiba gâ é lé, dangshikaq to, a nghut jáng, nyhit lhum gâ é lichyúm nghut lhê. ga myhîng ri; haû mù, haú mâ é wà mó lé, hkû-nyí jé shoq Berasheba#26:33 Berasheba gâ é lé, dangshikaq tô é wuìhtúng, a nghut jáng, nyhit wuìhtúng gâ é lichyúm nghut lhê. gâ nyi ri.
34Eso gi, chyungxe zànwut 40 zàn bo é hkûn, Hiti byù Beri é byìzo Yudit eq Hiti byù Elon é byìzo Basemat nhik lé hâng yu ri. 35Myiwe haú nhik gi, Isak eq Rebeka é matú iyon hkyô dùt bekô nghut ri.
Obecnie wybrane:
A-pûn Awang 26: znot
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2025, Wycliffe Bible Translators, Inc.
