Gat ta a hat á mbàd’id’a 9
9
Israel-lâ a kal nga suma dingâ d’i
1Moise mi de kua ala: Agi Israel-lâ, agi humugiya! Ini agi nga djagagi alum ma Jurdê-na á hlagi andjaf ma kalagi kablaud’a ki sib’ikina, kazì ma nglo ma a minim ad’enga ngungu gak mi i akulona. 2Azi ni Anak grom suma fuyogei suma agi wagizina. Ni suma agi humugi a nga de kazi ala: Ni nge ba, mba mi tchol avok Anak groma ge na. 3Agi wagi ini ala ni Ma didina Alo magina ba, mba mi tit avorogi d’igi aku d’a ngal yinid’a na; ni mam ba, mba mi b’lagazi woyo; ni mam ba, mba mi hulongôzi yazi kä avorogiya. Agi mba hlagiziya, agi mba dabazi woi atogo zak d’igi mi de na mi. 4Fata Ma didina Alo magina mi digiziya woi avorogi da ni, ar agi dagi kurugi ala: Ni yam d’ingêr mamid’a ba, Ma didina mi kalami kur ambas ndata wa na d’i! Ni kayam asa’ata handjaf sum ndazinid’a ba, Ma didina mba mi digizi woi avorogi ni na. 5Nga ni kayam d’ingêr magid’a ki hur magi ma tuna ba, agi mba hlagi ambas mazid’a d’i, wani ni kayam asa’ata handjaf sum ndazinid’a ba, Ma didina Alo magina mba mi digizi woi avorogi ni na, ná ndak vun vun ma hle ma mi hlum mabuyogi ngolo, Abraham, Isak ki Jakob-ma. 6Ar agi wagi woi ala ni yam d’ingêr magid’a ba, Ma didina Alo magina mba mi hagi ambas sa djivi ndata á tagizi djona ni na d’i, kayam agi nandjaf ma yam mba ad’enga!
Gor amuhl ma lora: Tchilad’a hi Israel-lîd’a
7Moise mi de kua ala: Agi djib’eregiya, agi maragi yam zal la agi zalagi hur Ma didina Alo magina abagei hur fulâ adjeud’a d’i. Tinï ad’ud’a kur bur ma agi buzugugï woi Ezipte-na dei gak mba magid’a ini ata yima wanid’a, agi ni suma so vun Ma didina.
8Käd’u ahina d’a Horep-pa agi zalagi hur Ma didina. Ma didina hurum zal kagi gak mi min dabagi woyo. 9Kid’a an djak akulo yam ahinad’a á veï ahina d’a bebed’e d’a tchet ta Ma didina mi djin vunam ki sed’egi kura, an le burâ akulo yam ahinad’a dok fid’i falei kandjege bei ni te tena, bei ni tche mbina ba mi. 10Ma didina mi han ahina d’a bebed’e d’a tchet ta mam tamba Alona mi b’ir zlad’a pet ta mi dagizi yam ahinad’a aduk akud’a kur bur ma agi togogina ki tchitchid’amba.
11Kur dabid’a hi burâ akulo dok fid’i falei kandjeged’a, Ma didina mi han ahina d’a bebed’e d’a tchet ta mbà d’a vun ma djinda mi nga kuad’a. 12Ata yi máma Ma didina mi dan ala: Ang tchuk aseng kä atogo, kayam suma ang buzuguzï woi avo Ezipte-na a b’lak wa taziya. Ki tchetchemba, a d’es wa woi yam lovot ta an tagazizid’a, a yor wa angus vana á kud’uromu. 13Ma didina mi dan kua ala: An we sum ndazina ni suma yam mba ad’enga! 14Aran an i ni dabazi woyo, ni tchazi simiyêzi woi yam andagad’a, an mba ni lang andjaf ma kalazi ki sib’ika, ma kalazi kablaud’ina mi. 15An hulong ni tchugï asen kä yam ahina d’a vakud’id’a kahina d’a bebed’e d’a tchet ta mbà d’a vun ma djinda mi nga kuad’a abonu. 16An gol wani, agi lagi wa tchod’a avok Ma didina Alo magina, agi yorogiya wa gor amuhlâ, agi d’ezegi woi atogo hina zak kur lovot ta Ma didina mi tagagizid’a. 17An yo ahina d’a bebed’e d’a tchet ta mbà d’a nga abon ma mbànid’a, an tchugut kä woyo, an tot kä woi iragiya.
Gor amuhl ma lora: Moise mi tchen Ma didina yam Israel-lâ
18Moise mi de kua ala: Bugol ahle ndazina, an grif kä avok Ma didina, an le burâ dok fid’i falei kandjege d’igi an ladjeu na bei ni te tena, bei ni tche mbina ba, kayam tcho d’a pet ta agi lata, kahle suma tcho suma agi lazi avok Ma didina á zalam huruma. 19Kayam an le mandarâ yam hur ma zal ma guguluk ma Ma didina zalam kagi gak mi min dabagi woi na. Wani Ma didina mi hum tchen manda kua. 20Ma didina hurum zal ngola yam Aron kur bur máma gak mi min á tchum mbeyo, wani an tchen yam Aron kur bur máma mi. 21An hle gor amuhl ma lor mala ni sun nda tcho d’a agi lat kabogid’a na, an ngalam mbei kakud’a, an lud’um mbei gak ni mbud’um butna, ni tchugum mbei aduk mbiyo ma nga mi djangî kä yam ahinad’ina.
22Adjeu d’a ei mbei Tabera, Masa ki Kibrot-Hatava-d’a, agi zalagi hur Ma didina. 23Kid’a ei nga kur Kades-Barneya-d’a, Ma didina mi suni mi dagi ala: Agi i hlagi ambas sa an nga ni hagizid’a. Ata yi máma, agi gagi nga yagi kä ad’u vun ma hed’a hi Ma didina Alo maginina d’i. Agi hagi nga gagazid’a kam mbi, agi gagi nga yagi kä ad’u zla mamba d’uo mi. 24Dedeid’a an wagi d’a, agi ni suma bei hum vun Ma didina ba na.
25Ata yima an hum Ma didina mi dala mam min mi dabagi woyo na, an grif kä avoromu, an le burâ dok fid’i falei kandjege. 26An tchen Ma didina ala: Salad’a Ma didina, ang b’lak mang suma ang tazi djona suma ang tchuguzi akulo kad’eng manga suma ang buzuguzï woi avo Ezipte kabong ma sib’ikina woi d’i. 27Ar ang djib’er yam azungeî mangâ Abraham, Isak ki Jakob! Ar ang djib’er yam zlad’a hi sum ndazinid’a kasa’at mazid’a ki tcho mazid’a d’i. 28Ar suma kur ambas sa ang buzugumï kura a dala: Ma didina ad’engêm ndak nga á kalazi kur ambas sa mam hlazi vunam kata d’uo d’i. Ar a dala: Ni kayamba hurum vazi nga d’uo d’a ba, mi buzuguzï woi á tchazi woi abagei hur fulâ wana d’uo mi. 29Hina pet pî, azi ni mang suma ang tazi djonina, ni suma ang buzuguzï woi avo Ezipte ki sib’ik mang nga kal teglesa ki bigang nga nga zid’a kang akulo zid’ina.
Obecnie wybrane:
Gat ta a hat á mbàd’id’a 9: BA
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Azumeina Bible © Alliance Biblique du Tchad, 1999.