Gat ta a hat á mbàd’id’a 15
15
Biza d’a kid’iziya d’a hulong ahlena akulo peta
1Moise mi de kua ala: Dabid’a hi biza d’a kid’iziya d’a lara ge pet, agi hulongôgi ahle suma suma a dengêgizina akulo. 2Wana ni gat ta agi mba hulongôgi ahlena akulo mi simiyêzid’a: Le a tchi wa wala akulo yam biza d’a a hulong ahlena akulo mi simiyêzi á subur Ma didinid’a ni, suma pet suma a he balâ mi ndrozinina, a djobom mbi. Ar a tes ndrozina ki b’oziyozina akulo ala a wuragaziziya d’uo mi. 3Agi ndak á tezegi angeina á wuragagiziya. Wani agi djobogi bal ma b’oziyogina á ndum abogina d’i.
4-5Le agi gagi yagi kä ad’u zlad’a hi Ma didina Alo maginid’a gagazi, le agi ngomogi vun ma he ma an hagizi inina ni, a mba fe sama hou adigagi d’i, kayam Ma didina Alo magina mba mi b’e vunam yam ambas sa mam nga mi hagizi d’a agi hlat á tat djona wanda. 6Ma didina Alo magina mba mi b’e vunam kagi d’igi mam hle vunam na. Andjaf suma a mba ndahlena abogi ngola, wani agi mba ndagi va abozi d’i. Agi mba tagi yam andjaf suma ablaud’a, wani azi mba te kagi d’i.
7Le ma houd’a mi nga aduk b’oziyogina ki sed’egi kur ambas sa Ma didina Alo magina nga mi hagizid’a ni, agi b’alagi hurugi kiki djinigi abogi ad’enga á hum va d’uo d’a d’i. 8Wani agi malagi abogi woi agi hum balâ yam vama mi kid’agama. 9Agi gologi tagi djiviya, ar agi djib’eregi djib’er ra tchod’a kurugi ba, agi dagi ala: Biza d’a kid’iziya d’a hulong ahlena akulod’a ar go, agi gologi wiyegi ma houd’a is á wum hohowom á hum va d’uo d’a d’i. Mam mba mi tchi avok Ma didina kagiya, tcho ndata mba d’i arî kagiya. 10Ar agi hum he d’a hawad’a bei gigrita. Ni kayam ndata ba, Ma didina Alo magina mba mi b’e vunam kagi kur sun nda lara ge pet ta agi mba lata. 11Suma houd’a a mba ba bei kak adigagi kur ambas magid’a d’i. Ni kayam ndata ba, an hagi vun ma he ma wana: Agi malagi abogi woi á he va mi wiyegina, mi ma houd’a ki ma kid’ak ma nga kur ambas magid’ina mi.
Tchuk ka akulod’a hi magumeinid’a
12Moise mi de kua ala: Le wiyegi ma Hebre-na, le natchad’a d’oze mandjufâ, mi gus tam mbei abogi d’igi magoma na ni, ar mi lagi sunda bizad’a karagaya, wani kur biza d’a kid’iziyad’a agi gum akulo. 13Ata yima agi gum akulona, ar agi gum akulo abom hawa d’i. 14Agi hum he d’a hawa d’a aduk d’uwar magi ma gureinid’a, aduk awu magina kä avun ambid’a’â, aduk süm guguzlu magid’a ata yima mired’et kuana. Agi hum ahle magi suma djivi suma Ma didina Alo magina mba mi b’e vunam kagi ki sed’ezina. 15Agi djib’eregi ala adjeu agi ei ni magomba kur ambas sa Ezipte d’a Ma didina Alo magina mi tchugugï woi akulo kura. Ni kayam ndata ba, an hagi ini vun ma he ma wana wana.
16Wani le magom magina mi dagi ala: An min nde woi avo hatagi d’uo, kayam mam hurum vagi ki sum magina, mi kak avo hatagi ki halasa mi ni, 17ata yi máma agi hlagi leleuna, agi tchom humam ata agu ma avun agre’îna. Mam mba mi arî magom magina ki iram fafat; agi lagi ki magom mba atchad’a ni hina mi. 18Agi lagi gigrit á gum akulo d’i, kayam mi lagi sun nda bizad’a karagaya, mi zlap sunda hi sama le sun nda beged’ina yam mbà. Ma didina Alo magina mba mi b’e vunam kagi kur sunda pet ta agi mba lata.
Gro d’uwar ma vut avo’â
19Moise mi de kua ala: Agi tinigi gro d’uwar magi ma andjof ma mi vut avok aduk d’uwar magi ma nglona ki ma gureinina irazi vazi mi Ma didina Alo magina. Ar agi lagi sunda ki gor amuhl ma mi vut avo’â d’i, ar agi tchawagi gor timi ma mi vut avo’â woi d’uo mi. 20Agi ki sum magina agi mud’ugizi avok Ma didina Alo magina bizad’a ki bizad’a ata yima mam mba mi manama. 21Le mi daka nala dileîd’a d’oze duka d’oze ma b’lak tama ni, ar agi ngad’am buzuna mi Ma didina Alo magina d’i. 22Agi mud’umî ata yima agi mba kagagi kuana; sama ndjendjed’a ki ma yed’etna djak a mba mud’um d’igi sana mi mut du’â kazar ma a yum ala serfena na. 23Wani agi tagi buzuna d’i, agi vom kä woi andaga d’igi mbina na.
Obecnie wybrane:
Gat ta a hat á mbàd’id’a 15: BA
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Azumeina Bible © Alliance Biblique du Tchad, 1999.