रोमी 6
6
पापम बेक्शा, ख्रीस्तम सेंसीशो
1मिनु मो हना, मार देंचा? परमप्रभु यावेमी गो इं कली शुश शिशी पवल, दे गोपुकीमी पाप पस ङा पस बाक्चा ङा? #रोमी ३:५-८ 2मो पचा मदुम्ब। बेक्शो मुरपुकीम खांखा दोपा पाप पस ङा पस बाक्ने चाप्नीमी ङा? गो इं के पाप पतीक थुं बेक्त। 3ख्रीस्त येसु कली थमा सुइश्शा, आ नें नु आ बेक्तीकेमी ब्वाक्कुम ख्रुम्शा, ग्रुंइपांइसाक्य, दे गे मतुइक्नीनी? #गलाती ३:२७ 4मिनु ब्वाक्कुम ग्रुम्यानु, गो येसु बेक्शा थिम्शो खोदेंशो दुम्तय। मिनु परमप्रभु यावे आ सक्तिमी ख्रीस्त कली बेक्शो रे सेंपाइश्शो खोदेंशो पा गो यो सेंसीशा, नक लांम गाक्तय। #कलस्सी २:१२; १ पत्रुस ३:२१ 5गो दोपा मेको आ बेक्शो नु कान दुम्या, मोपा आ सेंसीशो नु यो कान दुम्तय। 6येसु ख्रीस्त कली शीम केप्शा कांटी थोक्शा साइक्तीके इं पापम ब्रीशो थुं आ सक्ति जाम्त। मोपतीके मुल गो पाप आ वाइल मबाक्नय। गो मेको लोव़ तुइक्चा माल्नय। #गलाती ५:२४ 7बेक्शो मुर पाप रे ब्रोंइशो बाक्नीम। 8गो येसु ख्रीस्त नु बेक्तय हना, मेको नुन ब्रोंइनय, दे थमा सुइक्नय। 9मारदे हना येसु यो बेक्शो रे सेंसीशा, मुल गेनायो मबेक्चा ङा पा ब्रोंइत। मुल मेको गेनायो मबेक्ब। 10पाप क्याम्चा कली काले बेक्त। नोले सेंसीशा, मुल परमप्रभु यावे नु ब्रोंइशो बाक्ब। #हिब्रू ९:२६-२८ 11मोपतीके गेपुकीमी यो आंम कली पाप आ पर्बम बेक्शो नु ख्रीस्त येसु आ पतीकेमी परमप्रभु यावे कली ब्रोंइनय, दे मिम्तीन। #२ कोरिन्थी ५:१५; १ पत्रुस २:२४
12इन बेक्शा लाइब रां कली पापम हुकुम पचा मगेने। #उत्पत्ती ४:७ 13इन गुइ खोइली, मिक्च, शोव़, रां नेल्ल कली मरिम्शो मपपतीन। तन्न बेक्शो रे सेंसीशो मुर खोदेंशो पा, परमप्रभु यावे कली जिम्मा गेंसीशा, आ रिम्शो गेय पने। #रोमी १२:१ 14पापमी इन कली मारेइ पपाइक्ने मचाप्ब, मारदे हना परमप्रभु यावे आ अरेशो लोव़मी इन कली दोसी मसेल्थु, परमप्रभु यावेमी शिशी पाइक्चा पुंइसाक्नी। #रोमी ७:४-६; १ यूहन्ना ३:६; रोमी ५:१७,२१ 15परमप्रभु यावे आ अरेशो लोव़मी इं कली दोसी मसेल्थु, परमप्रभु यावे आ शिशी ताइतय हना, पाप पचा दुम्ब, दे मिम्चा ङा? मोदेंशो मिम्चा मदुम्ब। 16तेको होव़प आ वाइली दुम्या, मेको होव़प कली टिचा माल्नय, दे मतुइक्नीनी? “पाप पना पन बाक्य” देंतीनी हना, पाप आ वाइली दुम्शा, बेक्नीनी। “परमप्रभु यावे आ देंशो टिय” देंतीनी हना, परमप्रभु यावे आ वाइली दुम्शा, ठीक पाइब दुम्नीनी। #यूहन्ना ८:३४ 17इन पर्बम परमप्रभु यावे कली “मेको आन कली रिम्शो पाइतीनी” दे ठेयब सेल्नुङ। मारदे हना ङोंइती गेपुकी पाप आ वाइल बाक्तीनी। मुल चहिं इन थुं रे पा परमप्रभु यावे आ शेंशो दाक्शा टीतीनी। 18गेपुकी पाप रे ब्रोंइशा, ठीक पतीके आ वाइल दुम्तीनी। #यूहन्ना ८:३२ 19इन कली रुप्पाइक्चा कली चिनु लेंशा शेंनन्नी। दोपा गेपुकीमी इन गुइ खोइल, मिक्च, शोव़, रां नेल्लेमी ग्रांग्रा दिशो गेय पशा, अरेशो लोव़ मटिनी, मोपा मुल इन थुं, रां नेल्ल ठीक पतीक आ वाइल दुम्चा कली परमप्रभु यावे आ गेय पाइब मुर दुमीन। 20ङोंइती पाप आ वाइली बाक्नीनु, ठीक पतीक रे ङोन बाक्तीनी। 21इन पशो मिम्शा, मुल यो मुने पाइनीनी। मारदे हना इन मरिम्शो पशो बेक्पाइक्ब बाक्त, दे तुइक्ताक्नी। #रोमी ८:६,१३ 22मुल गेपुकी मरिम्शो पचा रे प्रोंइचा पुंइसीशा, गे परमप्रभु यावे आ वाइल दुम्तीनी। मुल इन रिम्शो पतीके रे गे परमप्रभु यावे आ मुर दुम्शा, गेना हना यो मेको नु ब्रोंइशा बाक्चा ताइनीनी। 23मरिम्शो पशो आ गाल्च बेक्चा बाक्ब। परमप्रभु यावे आ गेशो शिशी चहिं इं प्रभु येसु ख्रीस्त रे पा गेना हना यो ब्रोंइशा बाक्चा बाक्ब। #रोमी ५:१२; उत्पत्ती २:१७; याकूब १:१५
Obecnie wybrane:
रोमी 6: SUSZ
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 1992, 2011 Wycliffe Bible Translators Inc.
