उत्पत्ती 13
13
अब्राम नु लोत ब्राशो
1मिनु अब्राम, आ मीश, आ मारेइ मारेइ नेल्ल नु लोत यो लाइश्शा इजीप्त रे नेगेब रागी लमाक्त। 2अब्राम शुश बी ब्यफ क्यारश भेडा नु सुन चांदी पाइश्शो मुर बाक्माक्त। 3मिनु दक्खिन ङा नेगेब रे लशा, बेथेल सहर जाक्दीम्माक्त। मेकेर बेथेल सहर नु ऐ सहर आस दातेमी ङोंइती आ ताम्बु कीतीकेम जाक्दीम्माक्त। 4मिनु इजीप्त लचा क्येङा ङोंइती मेकेर सेल्शो चढ़ेतीकेमी लेश्शा जाक्दीश्शा, परमप्रभु यावे कली लोव़ पा, ठेयब सेला बाक्त। #उत्पत्ती १२:८
5मिनु लोत के यो क्यारश भेडा, बी ब्यफ नु ताम्बु शुश बाक्माक्त। 6मिनु अब्राम नु लोत आस मारेइ मारेइ शुश दुम्तीके मेको निक्शी काथा बाक्ने मचाप्से बाक्त।
7मिनु अब्राम आ गोठलापुकी लोत आ गोठलापुकी नु जीमे बाक्त। मेना मेको रागीम कनानी नु परिज्जीपुकी बाक्मा बाक्त। 8मिनु अब्राममी लोत कली “गो पोबु नस। जिचा मदुम्ब। इ गोठलापुकी नु आं गोठलापुकी यो जिचा मदुम। 9गे नु गो ब्राचा रिम्शो दुम्ब। एको रागी नेल्ल इ ङोंइती बाक्ब। गे पेरा गे लते हना, गो ग्युरा गे लाइनुङ। गे ग्युरा गे लते हना, गो पेरा गे लाइनुङ” देंमाक्त।
10मिनु लोतमी यर्दन खोला आ नेक्था ब्वाक्कु बाक्शो रिम्शो दिंम तवा बाक्त। मेको परमप्रभु यावे आ रू नु इजीप्त रागी खोदेंशो दारशो तांइसे बाक्त। सोआर सहर सम्म मोदेंशो दारशो तांइसे बाक्त। परमप्रभु यावेम सोदोम नु गोमोररा सहर मीम जेप्पाइक्चा क्येङा ङोंइती मेकेर थाम्पा दारशो बाक्माक्त। #उत्पत्ती २:८-१० 11मिनु लोत यर्दन खोला ङा दिंम योव़शा, पूर्ब गे लमाक्त। मोपा लोत नु अब्राम ब्रासा बाक्त।
12मिनु अब्राम कनान रागीम बाक्शो बाक्माक्त। लोत चहिं यर्दन खोला ङा दिंमम बाक्शो सहर आन नेक्था बाक्शा, आ ताम्बु याक्ना याक्न सोदोम सहर सम्म जाक्दीम्माक्त। 13सोदोम सहर ङा मुरपुकी थम मरिम्शो बाक्मा बाक्त। मेकोपुकीमी परमप्रभु यावे आ ङोंइती शुश मरिम्शो पामे बाक्त। #उत्पत्ती १८:२०; उत्पत्ती १९:४-९
परमप्रभुम अब्राम कली लोव़ गेशो
14लोत नु अब्राम ब्रासा नोले परमप्रभु यावेमी अब्राम कली “इ बाक्तीके रे पूर्ब, पच्छिम, उत्तर, दक्खिन गे कोव़ङो। 15गे तेको तेको रागी ताइनेवे, मेकोन इ कली नु इ चच युइ आन कली गेना हना यो कली गेनुङ। #उत्पत्ती १२:७ 16गो इ चच युइ खप ङा फुरक खोदेंशो पा शुश सेल्नुङ। मुरुम फुरक हिक्ने चाप्तेक्म हना ला, इ चच युइ आन कली यो हिक्ने चाप्नीम। तन्न मचाप्नीम। #उत्पत्ती २८:१४; गन्ती २३:१०; १ राजा ४:२० 17बोक्को, रागी नेल्ल हिरशा लावो। मेको नेल्ल इ कली गेनन” दे परमप्रभु यावेमी लोव़ गेवा बाक्त।
18मिनु अब्राममी आ ताम्बु याक्शा, हेब्रोन रागी ङा माम्रे माइश्शो ब्वाकीम कीङा बाक्त। मिनु मेकेर परमप्रभु यावे कली चढ़ेतीक का सेला बाक्त। #उत्पत्ती १४:१३-२४
Obecnie wybrane:
उत्पत्ती 13: SUSZ
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 1992, 2011 Wycliffe Bible Translators Inc.
