(Evangelio según San Mateo) 19

Jesús nuwak idaimaitsui tibau

(Mr. 10.1-12; Lc. 16.18)

1Jesús nuna tusa ashimak, Galilean ukuak Judea nugkanum jegaa Jordagka amain katigkui. 2Nunikmatai kuashat aents aidau pataetukaju, dutikam nui jau aidaunash kuashat etsagakui.

3Nuniai ujumak fariseo aidau Jesusan jegaantaju, nunikag pegkegchau anentaiyai iniinak:

—¿Nuwennush utugchat atsaish nuwenash idaimainkaih?, tuidau.

4Tama Jesús ayaak:

—¿Atumek ausachukaitjum Agagbaunum, Apajuí yama nagkamchakug aishmagkun nuwajai najanauwai, 5dutika chichajak: “Aishmag nuwenkug apajin, dukujin ukuak niina nuwejaig ijunmainai, nuniak nuwejai makichik iyash wegawai” tawa duka? 6Nunin asag jimagchauwai, makichik iyash weawai. Nuadui aatus Apajuí dutikamua nunak aentsuk datupaumainchau ainawai, tiuwai.

7Tutai dita iniinak:

—¿Wagka tujash Moisesash papí nuwa idaiku najantain umiká nuwá susa idaisati tiuwaita?

8Tiagtai Jesús ayaak:

—Nunak atum antumtikmainchau ainajum dui, Moisesak nuwemik idaimainaitjume tujabiajui, tujash nagkamtinig Apajuik nunak tichauwai. 9Wi tajime, makichkikesh nuwe tsanijinachu aig tikichjai nuwenkug ekagmawai, nunisag nuwa idaisamujai nuwenushkam ekagmawai, tiuwai.

10Tutai ni jintintaiji aidau:

—Aatus aishmag nuwejai nunimainaitkuig, nuwenmaitsujama, tuidau.

11Tiagtai ni ayaak:

—Nunak ashí aentsuk nunimain ainatsui, ya nunin atí tibauwaita duke nunimain ainawai. 12Awai aents tuke nuwenmainchau akiinau aidaush; nuniai tikichik aents kagamtikamush ainawai, tuja aents nigki Apajuí inama nuna etsegtin atajai tabaunum nuwenmainchaush ainawai. Ni nunimain dekapmamuk; nunikti, tiuwai.

Jesús uchi ikautkamu

(Mr. 10.13-16; Lc. 18.15-17)

13Ujumak uchi aidaun Jesusan ikautuawajui achiká Apajuin aujtusti tusag; dutikiagtai ni jintintaiji aidau uchin ikaunmaina nuna jiyaidau. 14Nudiagtai Jesús chichaak:

—Idaisatajum uchi aidauk minai minitnume, utujiakaigpajum, wagki Apajuí inama duka jujú uchi aina junin aina nudauwai, tiuwai.

15Nuna tusa uchi aidaun makí makichik buuknum uwejin achiká pegkegnum yumigkis ukuak weuwai.

Datsauch wiyakuch Jesusan iniasbau

(Mr. 10.17-27; Lc. 18.18-27)

16Makichik aents Jesusan jegantun iniak:

—Maestroh, ¿wají pegkegna takamainaitja pujut nagkanchaun jukitasanush?, tau.

17Tutai Jesús ayaak:

—¿Wagka pegkeg pachismesh ininme? Imá makichki pegkeja duka. Tujash ame pujutnum wayatasam wakegakmek, chicham umiktina nu umiktá, tau.

18Tama ni ayaak:

—¿Tu ainawa?, tau.

Tutai Jesús ayaak:

—Magkagtuawaipa, tsanijinawaipa, kasamkaipa, wainkamek tsanumkagtujaipa, 19amina apa dukujai eme anentsam diistá, nuniakum tikich aidaush amek anenmamsam aneeta, tiu.

20Tama datsauch ayaak:

—Wika nunak datsauch asanuk ashí umikuitjai. ¿Nuigtush wajina dutikmainaitja?, tau.

21Tutai Jesús ayaak:

—Ame pegkeg atasam wakegakmek, weme amina wajiijum ajutjamaina duka sujukam, ujunauch aina nu susata, dutikam nayaimpinum wajiigmik ajutjamtatui; nunika taam mina nemagtukta, tiuwai.

22Nu tama datsauchik wake beseká weuwai, wagki shiig wiyakuch asa.

23Nunikmatai Jesús jintintaiji aidaun chichajak:

—Dekas tajime, wiyakuch aidauk kakajus Apajuí inama nuig wayashtin ainawai. 24Awentsanuk tajime: Camellok aujá jiinish waigkag yupichu nagkaemamainai, tujash wiyakuch Apajuí inamtaijin wayata tabauk utugchatai.

25Nu tabaun jintintaiji aidau antukag shiig anentai jegagchag:

—¿Yaki tujash uwemjaush amainaita? tudayinau.

26Tiagtai Jesús ditan diis chichajak:

—Aents diismak dutikmaitsui, tujash Apajuik ashí dutikmainai, tiuwai.

Mina nemagtuidauk ditanu ukukbaujin nagkaesau jukiagtinai tibau

(Mr. 10.28-31; Lc. 18.28-30)

27Tutai Pedro ayaak:

—Nijah, jutii ashí iina ajutjamaina duka ukuinaku ame nemagkabiajim nuutish, ¿wajig jukitnaitji?, tau.

28Tutai Jesús ayaak:

—Dekas tajime, ashí najankamu aidau yamagmitkamu jegatna nunú tsawantin, Aentsmaga akiinauwa nu ni ekeemsa inamtaiji imana nui ekeemsamtai, atum mina nemagtuku aidautigmek doce ekeemtainum ekeemsajum, Israelan uchijí doce aajakajua nunú weantu inagtin ainagme. 29Tuja ashí aents mina nemagtuinak jeen, yachi aidaun, umayí aidaun, apajin, dukujin, nuwen, uchijí aidaun, nugke aidaun ukukiaju aidauk, dita ukukbaujin nagkaesau ciegka imaania jukiagtin ainawai, nuigtushkam pujut tuke atina nunash jukiagtinai. 30Tujash kuashat aents dekatkau atatus wakegaina nu ukunum juwakagtinai. Untsu iman atan anentaimtumachu aina nu dekatkauk agtinai.

Obecnie wybrane:

(Evangelio según San Mateo) 19: AGR

Podkreślenie

Kopiuj

Porównaj

Udostępnij