Rom 3
3
1Heaa te Jiu e taurekareka i aruna naa tama naraa henua? Heaa e taurekareka i te Jiu e hhere? 2Purima mee e taurreka ni hhae mai i naa Jiu. Kaamata, naa hua katoo te Tama Hamataku ku too ake ki tauhia naa Jiu. 3Ai kiiaa roo naraa tama i naa Jiu naa e teeai ki tautari i ana hua, te Tama Hamataku raa ka tauhi ki ana hua ni kavake ki laatou i mua! 4Ai kiiaa naa tama i naa henua katoo e hua kairrehi, te Tama Hamataku raa ka tauhi ki naa hua hamaauri! Te Peepaa e tapu e hua poroo:
“Te Tama Hamataku, koe e tino hua i naa hua hamaauri,
tee hai tama e nani te haka tonutonu i te koe.”
5Kime te tiputipu takahara taatou nei e hakkite mai poro te tiputipu te Tama Hamataku e tonu, taatou e nani te hua poro te Tama Hamataku e hara i te ia e mee hakariaria i taatou? (Anei ni hua koi taatou naa tama te maarama nei.) 6Mee teeai! Kime te tiputipu te Tama Hamataku e teeai ki tonu, aia tee nani te haka tonutonu naa tama te maarama nei.
7E mee pai te tama e maanatu poroo, “Kime naa hua kairrehi aaku e nani te hakahae te hamaauri te Tama Hamataku ku hakanau roo te henua i te ia, ai kuaa roo aia e hua poro anau he tama e mee naa takahara?” 8Naraa tama kunaa huri mai no tau i te nau i naa hua aaku e hua nei. Laatou ni mee poro anau ni hua poroo, “Taatou ki mee roo naa tiputipu hakarria ki hhae roo he tiputipu taurekareka.” E taurekareka naa tama naa raa ka haia hakariaria ina te Tama Hamataku.
Tee hai tama e tonu tana ora
9Koutou e mannatu poro naa tiputipu taatou naa Jiu e ttonu i aruna naa tiputipu naa tama naraa henua? Mee teeai! Anau ku oti te hua atu poro taatou naa Jiu ma naa tama naraa henua e takkoto natahi i laro te haiao naa takahara. 10Te Peepaa e tapu e hua poroo:
“Tee hai tama e tonu tana ora,
11tee hai tama e atamai
ma e lootu i te Tama Hamataku.
12Naa tama katoo e huri tua i te Tama Hamataku;
laatou katoo ku heheau haporroto
tee hai tama e mee heaa e tonu.
13Naa pukua laatou e mee pai ni taaruma e taakoto ka taaraki;
naa hua kairrehi e hhae mai i laatou arero,
naa muaihu laatou e kkaa pai naa niho naa kata kaittama.
14Laatou pukua e pii i naa tau hakarria.
15Laatou e hakavave ki tinai te tama ki mate.
16Laatou e heu naa mee i naa kuana katoo laatou e oo ai.
17Laatou ten'taa ki nnoho taurreka ma naraa tama,
18ma e teeai ki mattaku i te Tama Hamataku.”
19Taatou ku illoa poro naa Loo e kamai ki tautari naa tama e takkoto i laro naa Loo. I te haarena nei, mee tee hai tama raa ka hua poro aia ni teeai ki iloa. Taatou katoo e mee naa takahara i mua te Tama Hamataku. 20#Gal 2.16.Tee hai tama e nani te hakatonu tana ora i mua te Tama Hamataku kime aia e tautari ki naa Loo Moses, e mee i naa Loo e hakkite mai poro taatou ni tama e mee naa takahara.
Te haarena ki hakatonu naa ora
21Anei taatou ku illoa i te haarena te Tama Hamataku e ruu ai ki hakatonu naa ora taatou ki ttonu ma aia. Naa Loo e tee hai taurekareka e kamai ki hakatonu naa ora taatou, ai kiaa te haarena nei e taataa i loto naa Loo Moses ma ni huatia hoki naa profet te Tama Hamataku i te raa raa. 22#Gal 2.16.Te Tama Hamataku e hakatonu naa ora taatou e mee taatou e mannatu haiao i Jisas Krais. Te Tama Hamataku e mee peenei ki naa tama katoo e mannatu haiao i Krais, kiiaa roo laatou ni tama pehee. 23Taatou katoo ni ppena naa takahara ma e mmao i te laoi te Tama Hamataku. 24Koia te Tama Hamataku ni ruu hamataku i taatou ku hakauna iho roo tana tama, Jisas Krais, ki hakataha ina naa takahara taatou ki nani taatou te ahe muri ki te ia. Anei teeai he mee taatou e nani te mee hoko taatou roo. Anei ko te tiputipu te laoi te Tama Hamataku i taatou. 25Te Tama Hamataku ni hakauna Jisas Krais ki au no mate ki huia taatou. Koai e maanatu haiao i te ia, te Tama Hamataku raa ka hakataha ina ana takahara ki te toto Jisas Krais ni rrini iho i tevaa aia ni mate. Te Tama Hamataku ni hakahae te haarena nei ki hakkite taatou i te tiputipu tana manava laoi. I te raa raa, te Tama Hamataku ni tino noho teemuu ka mmata i naa tama ni ppena naa takahara laatou. 26Koia anei te Tama Hamataku ku hakkite mai ki illoa taatou poro aia e ruu i te haarena e tonu. Naa ora naa tama katoo e mannatu haiao i Jisas Krais e mee ki tonu i naa kanomata te Tama Hamataku.
27Taatou ki teeai ki hua hii vaanana i taatou roo hoko taatou. Te ora e tonu nei ni teeai ki kamai te Tama Hamataku e mee i taatou ni tautari i naa Loo, teeai. Te ora nei e kamai i taatou e mannatu haiao i te Tama Hamataku. 28Taatou anei ku illoa katoo roo poro naa ora taatou e ttonu kime taatou e mannatu haiao i te Tama Hamataku. Naa Loo e tee nani te hakatonu naa ora taatou. 29Te Tama Hamataku e teeai koi he Tama Hamataku naa Jiu, aia he Tama Hamataku hoki naa tama i naa henua katoo roo. 30#Gal 3.20.Teelaa he Tama Hamataku hokotahi koai raa ka hakatonu naa Jiu tautari i naa mannatu laatou i te ia, anaa e hakatonu hoki naa tama naraa henua tautari i naa mannatu laatou i te ia. 31Koutou teeai ki mannatu poro naa Loo ku tiake taatou e mee i taatou e mannatu haiao i te Tama Hamataku, teeai. Naa mannatu haiao i te Tama Hamataku e haia taatou ki taakoto hamaauri naa Loo.
© 2025 Wycliffe Bible Translators, Inc.