मती 14

यूहना बपतिसमा आलवा वाला ने अतया

(मरकुस 6:14–29; लूका 9:7–9)

1वणा समय मा गलील ने राजाय हेरोदेसे ईसु ने बारामा हबलजू, 2ते वणाय आपड़े दासो हू केजू, “यो बपतिसमा आलवा वालो यूहना मरेलअ माहू पासो जीवतो थाई गियो हे, तणी वणामा समतकार ने काम परगट थय हे।”

3 # लूका 3:19,20 ई विस हेरोदेस हे जणाय यूहनाय बन्दी बणावीनी हाकेल हू बादिनी जेळ मा नाकी दिदो तो। यू वणाय हेरोदियास ने केवा माते किदू तु, जिए पेले विने पाई फिलिपुस ने बयीरी ती। 4केमके यूहनाय वणाहू केजू तु के, “मुसा ने नियम ने वजूनी अणजी राकवी तारे हारू हाऊ नीं हे।” 5नी वी वणाय मारी दड़वा साहतो तो, पण मनका हू बिये तो तो, केमके मनका वणाय परमेसवर ने हाड़े हू बुलवा वालो जाणता त।

6पण जेरे राजा हेरोदेस ने जनम ने दाड़ो आजो ते, हेरोदियास ने सुरजी नासीनी हेरोदेसे कईक राजी किदो ते, 7वणाय होगन खाईनी केजू, “जी तु साहे वु तय आलवा ने वसन आलु हूँ।” 8वणजी आपड़े आई ने वात मानी ने केजू, “मय एक थाळी मा बपतिसमा आलवा वाला यूहना ने मुड़कु आल।”

9राजो कईक दकी थाजो, पण आपड़े होगन नी हाते बेवा वालअ ने वजहू वणाय विने माग पुरी करवा ने हुकम आलजो। 10वणाय जेळ मा यूहना ने मुड़कु कापणा ने हारू आदमी मुकलजा। 11तणी यूहना ने मुड़कु थाळी मा मिलीनी लाजा नी वणजी सुरजी आलजू। नी वे वणाय आपड़े आई कनी लई गई। 12तेरे यूहना ने सेला विय आजा नी वणाने मड़दू लईनी गिया नी गाड़ी दिदू। पसे वणय यो हमिसार ईसुई आलजो।

पास अजार मनकय खावा खवाड़वू

(मरकुस 6:30–44; लूका 9:10–17; यूहना 6:1–14)

13जेरे ईसुई विने बारामा हबलजू ते, वी विय हू नाव मा बेहिनी कणीक हुनी जगा मा जातो रेजो नी मनका यू हबलीनी दरिया ने हिड़े-हिड़े वणा वाहे थाई गिय। 14ईसु जेरे नाव हू बान्णे निकलीनी हिड़ा माते आजो, ते वणाय एक मुटी पीढ़ डिटी। वणाय वणअ माते तरस आजी नी वणाय वणने बिमारी हू हाऊ किदअ।

15जेरे अतमजू थाजू ते विने सेला वणा कनी आवीनी केजू, “ये हुनी जगा हे नी कईक वला बी थाई सुकी हे, तणी पीढ़ ने मुकली दे, ताकि व गाम मा जाईनी पोता ने हारू खावानु विसातु लई लिई।”

16पण ईसुई वणहू केजू, “अणय किय जावा ने जरूरत नीं हे। तमोस अणय थुडुक खावानु आलो।”

17वणय वणाहू केजू, “अमारे कनी पास रूटा ने बे मातली सुड़ीनी बिजू कईस ते नीं हे।”

18ईसुई केजू, “वणय मय कनी लावो।” 19वणाय पीढ़ ने मनका हू केजू के, व सार माते बेहीं जय। पसे वणाय वा पास रूटा नी बे मातली लईनी हरग ने हाड़े जुईनी परमेसवर ने दन्यवाद किदू। पसे रूटा ने बटकअ किदा नी वणय आपड़े सेला आलजा। सेला व बटकअ मनका मा वाटी दिदा। 20नी हेतय तराईन खादु नी सेलय वसेला थकण रूटा हू परजा थकण बारा हुल्ला उटाड़जा। 21नी खावा वालअ बयीरी नी सुरअ सुड़ीनी पास अजार आदमी ता।

ईसु ने पाणी माते हिड़वू

(मरकुस 6:45–52; यूहना 6:15–21)

22अणा वाहे तरत ईसुई आपड़े सेला नाव माते सडावजा, ताकि वा वणाहू पेले गलील ने पीली हाड़े जाता रय, तेरे मुँ पीढ़ ने मुकली दियू। 23पीढ़ ने मुकलीनी वी अलग परातना करवा ने हारू मगरा माते सड़ी गियो नी आतमजे वी विय एकलो तो। 24वणी वला नाव दरिया ने वेसु वेस अळकारो हू डगमगाई रेजी ती, केमके हामे हू वायरू आवतु तु।

25ईसु रात ने सोती पेहर दरिया माते हिड़तो थकण वणअ कनी आजो। 26जेरे सेला ईसु डिटो ते वा बियेता थकण केवा लागा, “ई ते भूत हे,” वा बिक ने मारजे डाडी करवा लागा।

27ईसुई तरत वणहू वाती करतो थकण केजू, “हिमत राको। यो मुँ हूँ। एवअ बियो नकी।”

28पतरसे उतर आलतो थकण ईसु हू केजू, “परबू, अगर यो तु हे ते, मय पाणी माते हिड़ीनी तय कनी आवणा ने हुकम आल।”

29ईसुई केजू, “आव।”

पतरस नाव माहू उतरीनी पाणी माते ईसु ने हाड़े हिड़वा लागो। 30जेरे वणाय तेज वायरू जुजू ते वी बयी गियो नी डुबणा लागो ते डाडी करीनी केजू, “हे परबू, मय वसाव।”

31ईसुई तरत वणा कनी आजो नी विने आत हाईनी वणा हू केजू, “हे थुड़ोक विसवास करवा वाला, तय हय वेम किदो?”

32नी वा नाव माते सढ़ी गिया ते कुरेण रूकाई गियो। 33नाव माते जतरा बी मनका त वणय ईसु ने दणवत किदी नी केजू, “तु हासा परमेसवर ने सुरो हे।”

गन्नेसरत मा बिमार मनका होज किदा

(मरकुस 6:53–56)

34तणी वो दरियो पार करीनी गन्नेसरत नगर ने हेड़ा माते पुगो। 35जेरे विय रेवा वालय ईसुई ओळकिनी आहे पाहे ने हेता नगर मा इने खबर आलजी नी हेता बिमार मनका वणा कनी लाजअ। 36नी मनका वणाहू विनती करवा लागअ के, वी वणय आपड़े लबरअ ने कनारजी अडवा दिए नी जतरअ वणाय अड़जअ व हेता होज थाई गिय।

Obecnie wybrane:

मती 14: WBR

Podkreślenie

Udostępnij

Porównaj

Kopiuj