फिलिप्पियो 1
1
1 #
प्रेरि 16:12
ओ कागद यीसु मसीह रा दास पौलुस अर तिमुथियुस री और ऊं फिलिपीअन में रैवण वाळा पिता परमेसर अर यीसु मसीह रा सगळा पवितर लोगां रै, परधानो रै अर सेवकों रै नाम है। 2अपांरा पिता परमेसर अर परभु यीसु मसीह थांनै दया अर सानति हमेसां देता रैवै।
पौलुस री पराथना
3म्हैं जद जद थांनै याद करूं, तो अपांरा परमेसर नै थौरे वास्तै धन्यवाद दूं हूं। 4अर जद कदै भी थौरे वास्तै पराथना करूं हूं, तो घणै आंणंद ऊं करूं, 5क्यूंकै थै सरुआत ऊं लेन आज तांई सुभ संदेस रा परचार में म्हारै साथै रिया हो। 6म्हनै इण बात रौ पूरौ भरोसौ है के, जिकौ सुभ कांम परमेसर थांरा बीच में सरु करयौ, यीसु मसीह रा पाछा आवणा रा दिन तांई परमेसर ही इण कांम नै पूरौ करैला।
7थौरे बारै में म्हैं ओ विचार करूं के थै म्हारै काळजै में बचयोड़ा हो। चाहे में जेळ में हूं या चाहे में बारै सुभ संदेस री हाचाई रा सबूत देन हाच नै पको करणा में लागोड़ो हूं तो, थै भी परमेसर री दियोड़ी करपा रा भागी हो। 8परमेसर गवाई है के, म्हैं यीसु मसीह रा परैम में थौरे लोगां नै कीता चावूं हूं।
9परमेसर ऊं आ विणती करूं हूं के, थौरो परैम, ग्यांन अर बुद्धि बढ़ती जावै। 10ताकी थै बड़िया ऊं बड़िया बातां नै जांणौ अर मसीह रा पाछा आवणा दिन तांई, पवितर अर निरदोस रैवौ। 11यीसु मसीह रै कारण मिळण वाळा सगळा बड़िया गुणो ऊं भर जाओ। जिण ऊं परमेसर री मेमा अर बड़ाई होती रैवै।
मसीह में जीवणौ मरणौ
12हे भाइयो, म्हैं थांनै ओ बता दैणौ चावूं के, म्हारै साथै जिकौ बीती उण ऊं सुभ संदेस रुकियो कोनीं पर, हलो परचार होयौ। 13#प्रेरि 28:30इण ऊं रोम रै राजा रा मेहल रा सगळा लोगां नै अर फौज नै ओ पतौ लागौ के, म्हैं यीसु मसीह रै वास्तै जेळ में बंद हूं। 14परभु में जिकौ म्हारै भाई है, उणौनै म्हारै जेळ में रेवणा ऊं हीमत मिळी है अर वे भरोसा रै साथै बिना डर ऊं परमेसर रौ वचन सुणावै है।
15कीं तो रीयो बळन अर झगड़ै रै कारण मसीह रौ वचन सुणावै है अर कीं लोग भला मन ऊं मसीह रौ वचन सुणावै है। 16भला मन ऊं परचार करणै वाळा लोग परैम रै कारण यूं करै क्यूंकै, वे जांणै है के, परमेसर म्हनै सुभ संदेस नै बचावण वास्तै चुणयौ है। 17कीं लोग इण मतलब ऊं वचन रौ परचार करै के, इण ऊं जेळ में म्हारी सजा बढ़ जावै। 18इण बातां ऊं म्हनै फरक कोनीं पड़ै। भलै ही हाचा मन ऊं या भलै ही बहाना ऊं या चाहे किणी तरैह ऊं, पर मसीह रै सुभ संदेस रौ परचार हो रियौ है। म्हैं इण बात ऊं राजी हूं।
में राजी रैवूंला क्यूंकै, 19म्हैं जांणूं हूं के, थौरी पराथना अर यीसु मसीह री पवितर आतमा री मदद ऊं म्हैं छूट जाऊंला। 20म्हारी तो आहीज मोटी इछा अर आस है के, म्हैं जीवतौ रैवूं के मरु, म्हनै किणी बात ऊं नीचो नीं देखणौ पड़ै। पर म्हारी काया ऊं यीसु मसीह री बड़ाई हमेसां होती रैवै। 21क्यूंकै म्हारै वास्तै जीवतौ रैवणौ मसीह है अर मरुला, तो उणरै खनै पूग जाऊंला। 22म्हैं जीवतौ रियौ तो घणा जणा नै मसीह खनै ला सकूं ला। इण वास्तै समझ में कोनीं आवै के किणनै चुणू। 23क्यूंकै म्हैं दोनो रै बीच में अदर झुल में हूं। मन तो करै इण काया नै छोड़ नै मसीह खनै जातौ रैवूं! क्यूंकै ओ सबां ऊं बड़िया है। 24पर म्हारौ जीवतौ रैवणौ थौरे वास्तै घणौ जरुरी है। 25इण वास्तै म्हनै विसवास है के, म्हैं जीवतौ रैवूंला, थौरे साथै रैवूंला ताकी थै विसवास में मजबुत रेन आंणंद में बढ़ौ। 26जद म्हैं थौरे खनै पाछौ आऊंला तो यीसु मसीह में थौरो घमण्ड भळै बढ़ जावैला।
27थै इण बात रौ ध्यांन राखजौ के, थौरो चाल-चलण मसीह रा सुभ संदेस जैड़ौ रैवणौ चाहीजै। भलै ई म्हैं थौरे खनै आऊं या आगौ रैवूं। म्हैं थौरे बारै में ओहीज सुणणौ चावूं के, थै पवितर आतमा में मजबुत अर एक चित रेन सुभ संदेस रै वास्तै भरोसा ऊं कांम करौ। 28अर थै थौरे बैरियो ऊं थोड़ाई डरौ कोनीं। ओ इण बात रौ सबूत है के, थौरो तो छुटकारो हो जावैला पर बैरियो रौ नास हो जावैला। ओ परमेसर करैला। 29थौरे माथै आ दया इण वास्तै होई क्यूंकै थै मसीह माथै विसवास भी करयौ अर दुख भी झेलो हो। 30#प्रेरि 16:19–40अबै थांनै म्हारै जैड़ी लड़ाई लड़नी है। जैड़ी लड़ाई करता म्हनै देखिया अर अबै भी करता सुणौ हो और म्हैं अबै तांई वोहीज लड़ाई लड़ू हूं।
Obecnie wybrane:
फिलिप्पियो 1: RWR
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© NLCI CC BY-NC-ND 4.0