Bikoluwa ndia Bhakwenda 27
27
Paulo nakidhaya meli̱ yaki ka Loma
1Gavuna Fesito ndia atinaku̱ eti kidhaye meli̱ yasu̱ ka nsi ndia ka Itale, Paulo na bhanyankomo daki bhabhu̱bi̱sa ka kibhokoa ngbekua bhasilikale ki̱ku̱mi̱, i̱naki nandiye Yu̱li̱asi mindia abhi̱ moti̱ kowa bhangbekua bhasilikale ndibha ka Loma. 2Kidhaya meli̱ ka mwalo ndia ka Adu̱lami̱ti̱ kolilia ka mwalo mesi̱yo ka kyalo ndia ka Asi̱ya du̱mbi̱ ni̱ki̱ki̱ya. Alisitako, Mumakedoni̱ya natu̱ki̱ ka Sesalonika abha nali na bhesu̱.
3Tolo ndia adhabhiabe, kiduwa ka mwalo ndia ka Si̱doni̱, Yu̱li̱asi nakimbali̱sana Paulo eti ai̱ye kindia bhabhotuaki ndibha yali̱kaga ka Si̱doni̱ andu̱lu̱ bhampesi̱e ndia akikabha. 4Ndie kituka ka Si̱doni̱, kidhaya meli̱ toli̱ nikikolilia naseke sa kizinga ndia ka Ki̱pu̱lo kindia wewelia kabhi̱ kikiduabe. 5Ndie kizaba tu̱li̱ bi̱ya na mwalo manyeta ndia ka kyalo ndia ka Ki̱li̱ki̱ya na Panfi̱li̱ya, kiduwa ka tau̱ni̱ manyeta ndia ka Mi̱la ka kyalo ndia ka Li̱ki̱ya. 6Menjo ka Mi̱la, ngbekua bhasilikale ki̱ku̱mi̱ atakanabe meli̱ ndia ka Mi̱si̱li̱ ndia abhi̱ katukai̱ ka Alekizandu̱li̱ya kayai̱ ka Itale du̱mbi̱ nikikituka ka meli̱ ndie ki̱bhi̱ku̱, nikikidhaya meli̱ injo. 7Meli̱ ndiasu̱ ai̱ya bhuke-bhuke nanga wewelia mamadha bhai̱ namusa toli̱ nakidhuwa nikikidhakia tolo mamadha duwasu̱ bi̱ya na tau̱ni̱ ndia ka Ku̱ni̱do. Du̱mbi̱ nikikiduwa ka kizinga ndia ka Kulete kindia wewelia kabhi̱ kikiduabe ndia azi̱bani̱ na Salomone. 8Kikolilia ka mwalo mesi̱yo no meli̱ kindie ki̱bhi̱o atalibana si̱ni̱ nanga wewelia doi̱sa ndie kiduwa ka kyalo ndia bhabhi̱kigiagaku̱ Mwalo Mabhonga, bi̱ya na tau̱ni̱ ndia ka Laseya.
9Kidhakiaku̱ bwile mamadha doi̱sa ndia akimotikiliana i̱ya namusa na gendo nanga Tolo sa Si̱ba abha nalakoli̱. Paulo nakibhuhabhula bhakpa ndibha bhabhi̱ naye ka meli̱ bhiyo; 10“Bhadami, ki̱ki̱ya tunga kizibu ka gendo ndiasu̱ yoho toli̱ meli̱ na nku̱mba ndia aliku̱ aki̱lu̱zu̱kana na bhesu̱ ki̱ku̱we.” 11No ngbekua bhasilikale ki̱ku̱mi̱ kamuokiana Paulo bhuai̱be aokiana ndia mu̱lu̱ki̱ na nkuma meli̱ bhaonga. 12Nesi̱ mwalo yoho abha ndia kabhongi̱ li̱kai̱be ka bwile sa dekaga, kibhaliana eti kidhaye meli̱ ki̱ye ka mwalo ndia ka Foni̱ke dhakiliaku̱ bwile injo nanga wewelia kabhi̱ kiduagabe. Foni̱ke abhi̱ mwalo mabhonga ka Kulete nazi̱bani̱ na tu̱li̱ ka kulegu̱ na ka kuluku kindia mani aki̱hu̱eli̱aga.
Wewelia sa mani̱ ke tu̱li̱
13Wewelia ndia kali na mani̱ ndia abhi̱nda tukiliai̱ yasi, bheli̱li̱kana eti bhakitoka yabho nesi̱ yabhategeki̱o, bhakudha nanga ndia akitelemi̱saga meli̱ nibhakikolilia ka mwalo ndia ka Kulete. 14No wewelia sa mani̱ ndia bhakigiagaku̱ “Ndia aki̱bhi̱ndaga nakituka kindia mani aki̱hu̱eli̱aga” abhi̱nda tukiliai̱ ka kizinga. 15Wewelia abhi̱nda meli̱ nikikisagwa li̱ka ni̱ki̱ki̱lu̱ka du̱mbi̱ nikikidhuwa wewelia na ki̱sa meli̱ kindia akabhi̱o. 16Kikolilia yasi sa kizinga ndia yabhagiagaku̱ Kahu̱da kindia wewelia sa mani̱ kabhi̱ kikiduabe. Menjo ka Kahu̱da, nikilia kitalibana si̱ni̱, kitoka zunilia bhwati̱#27:16 bhwati̱ yabhuzunaga bhakpa ndibhali ka meli̱ ka bwile sa wewelia sa mani̱ ke tu̱li̱ i̱sabho ka mwalo. ndia bhakibhuwaga nambu̱sa sa meli̱ andu̱lu̱ bhikilikifelua. 17Bhaluku bhai̱dha bhwati̱ nibhaki̱bi̱sa guwa meli̱ du̱mbi̱ nibhakikpangba na muguwo. Bhaluku bhatiya meli̱ yai̱ ka ki̱si̱yo sa mbu̱me ndia ka Li̱bbi̱ya, bhamu̱gi̱sa nanga ke tu̱li̱ toli̱ nibhakidhuwa meli̱ nakyei̱sa kindia akabhi̱o. 18Wewelia sa mani̱ ai̱ya namusa na bhi̱nda meli̱. Tolo ndia adhabhiabe, bhabhuwa nku̱mba ka meli̱ nibhakimakaga ke tu̱li̱. 19Ka tolo ndiake salo, bhatinaku̱ makaga kima ndietolo ndia abhi̱ ka meli̱ ke tu̱li̱ andu̱lu̱ meli̱ awawane. 20Ndie kidhakia tolo mamadha ndie bhikikitangia mani na bhatanga-tanga toli̱ wewelia sa mani̱ nalia ki̱ya namusa, kadhakililia nihila sa lama nakikisiaku̱.
21Ndia bhadhakia tolo mamadha ndia bhakali na liaga, Paulo atelema kei̱soabho na kigia bhiyo; “Bhadami, ambe nibhuoka ndie nibhutolia eti bhikilikimei̱sa tukasu̱ ka Kulete, yoho kizibu sa felua kima ndiasu̱ na meli̱ lu̱zu̱kanai̱ kabhi̱ kienikana. 22No endindi nikibhukunga eti mani̱ abhu̱si̱ki̱eku̱ nanga kalibe mindia aki̱ku̱wa, no meli̱ andu̱lu̱ ndiaki lu̱zu̱kana. 23Yoho ni̱hi̱bi̱a nanga bhugo ki̱li̱a malai̱ka mindia Mambombi̱ mindie nikimuhelezaga anienikiliania” 24nakinigia bhiyo; “Kolo kutiya Paulo nanga okwetonganabe kei̱soa Kai̱sali̱ toli̱ Mambombi̱ akuani̱si̱ kobhu̱ ndiaki nanga bhakpa ndibholi nabho ka meli̱ kalibe mindia akiku̱wa.” 25“Mani̱ abhu̱si̱ki̱eku̱ nanga nili na hi̱ki̱li̱za eti ndia Mambombi̱ anitoli̱o akibhabhu. 26No wewelia akikimakia ka mwalo ka kizinga.”
Wewelia sa mani̱ nakibbumaga meli̱
27Abha nali ki̱li̱a nalakoli̱be wi̱ki̱ bhali wewelia sa mani̱ nalia ki̱ki̱bhi̱nda, wewelia ali̱ka nalia ki̱hi̱sa meli̱ ke tu̱li̱ Mediteleniani.#27:27 tu̱li̱ Mediteleniani Bbai̱bbu̱li̱ ndietolo ali na tu̱li̱ Adulia. Ki̱li̱a saha nkaga bhalu̱ki̱ bheli̱li̱kana eti kili bi̱ya duwasu̱ ka mwalo. 28Bhabhuwa kima mati̱edha ka muguwo nibhakimugisa ke tu̱li̱ kapima dwela si̱ nibhakidwana eti tu̱li̱ yoho adweli̱ kingianana na fu̱ti̱ ki̱ku̱mi̱ na abili. Nalakoli̱be tolo nke bhatodha nibhaki̱pi̱ma nibhakidwana nadweli̱ kingianana na fu̱ti̱ kienda. 29Bhalu̱ki̱ bhatiya eti wewelia sa mani̱ yoho aki̱du̱li̱sa meli̱ tali manyeta, du̱mbi̱ bhabhuwa nanga i̱ni̱ mati̱edha nambu̱sa sa meli̱ nibhakitandika saba eti kyalo asiye. 30Bhalu̱ki̱ kakingabe tetiabho tukabho ka meli̱, bhabi̱sa bhwati̱ ka li̱bho nibhakyei̱sa eti bhali kaya bhuwa nanga mati̱edha muhua meli̱. 31Du̱mbi̱ Paulo nakibhugia bhasilikale imamoti̱ na ngbekuabho bhiyo; “Bhalu̱ki̱ ndia bhakali̱ki̱ ka meli̱, bhukuli na nihila sa lama.” 32Du̱mbi̱ bhasilikale nibhakizomba muguwo ndia abha nagbei̱ bhwati̱ naki̱mu̱ga ka li̱bho.
33Kyalo nali̱bi̱ya siyai̱, Paulo ankunga nkpa poni eti aliage. Nakibhugia bhiyo; “Bhu̱bhi̱ nibhutuntuli si̱ni̱ toli̱ bhuludhaki wi̱ki̱ bhali ndio bhukuliagi̱. 34Nili kakunganu̱ eti bhuliage nanga kalibe nkpa mindia aki̱ku̱wa. No bhukwetaga liaga andu̱lu̱ bhubhe bhomezi̱.” 35Ndia adhakia onga yoho, agba mugati̱ nakinsaba Mambombi̱ kei̱soabho bhoponi. Du̱mbi̱ naki̱u̱dha mugati̱ nakitandika liyai̱. 36Bhoponi abhu̱si̱ki̱saku̱ mani̱ nibhakitandika liaga. 37Bhesu̱ poni kibha nikili bhakpa bibili nsanju̱ na nkaga ka meli̱. 38Ndia bhadhakia liaga nibhaki̱ku̱ta, bhamaka ngano ndia atigabe ka li̱bho andu̱lu̱ meli̱ awawane. 39Kyalo ndia asiya, bhalu̱ki̱ bhakai̱bi̱li̱a kindia mwalo aliyo, no bhatangia mbu̱me ka ki̱si̱yo nibhakitinaku̱ teti̱sa meli̱ ka ki̱si̱yo. 40Bhazomba muguwo ndia abha nagbei̱ nanga mati̱edha ka li̱bho, nibhakidhuwaku̱ du̱mbi̱ nibhakikudha muguwo ndia abhi̱ ka kodha nali nambu̱sa sa meli̱, nibhaki̱mei̱sa kitambala du̱mbi̱ meli̱ naki̱bhu̱i̱sa ka mwalo. 41No meli̱ adula ki̱si̱yo sa mbu̱me ndie kumesi̱ ka li̱bho. Muhua meli̱ agodha ka mbu̱me nakikomiliaku̱ du̱mbi̱ ngala li̱bho nakitandika bbumaga meli̱ nambu̱sa.
42Bhasilikale nibhakitegeka eti bhabhuole bhanyankomo andu̱lu̱ bhakalaki hala li̱bho na tetiabho. 43No ngbekua bhasilikale akabha lami̱sa Paulo du̱mbi̱ naki̱bhu̱komi̱sa bhasilikale ola bhanyankomo. Nakibhulagilia bhenjo ndibha bhai̱bi̱ hala li̱bho eti bhatekete ndibho tuka ka meli̱ bhebhi̱nde ka li̱bho toli̱ bhahale bhai̱ye ka mwalo. 44Ndibhetolo bhayelia ka hala-hala sa mbau̱ sa meli̱ mabbukaga du̱mbi̱ nkpa poni naki̱ki̱dha ka mwalo kulungi.
Obecnie wybrane:
Bikoluwa ndia Bhakwenda 27: KWAMBA
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© Wycliffe Bible Translators, Inc., 2025
