Romans 2
2
1သို့ဖြစ်၍ မိတ်ဆွေ၊ သင်သည် သူတစ်ပါးအား အပြစ်စီရင်ပါသလော။ သင်သည် မည်သူဖြစ်စေကာမူ သူတစ်ပါး၏ အပြစ်အား စီရင်နိုင်သည့် အခြေအနေတွင်မရှိပေ။ သင်သည် သူတစ်ပါးကဲ့သို့ အပြစ်ကျူးလွန်သူဖြစ်ပါလျက်နှင့် သူတစ်ပါးအား အပြစ်စီရင်လျှင် မိမိကိုယ်တိုင်အားလည်း အပြစ်စီရင်ရာရောက်၏။ 2သို့သော် ထိုသို့သောအကျင့်ဆိုးများကို ပြုကျင့်သူတို့အား ဘုရားရှင်သည် အပြစ်စီရင်တော်မူသည်မှာ လျော်ကန်သင့်မြတ်ကြောင်းကို ငါတို့သိကြ၏။ 3သို့သော်လည်း မိတ်ဆွေ၊ သင်သည် သူတစ်ပါးအား အပြစ်စီရင်သည့် အပြစ်မျိုးအား သင်ကိုယ်တိုင်ပင် ကျူးလွန်နေလျက်ရှိသော်၊ သင်သည် ဘုရားရှင်၏ အပြစ်စီရင်ခြင်းမှ ကင်းလွတ်လိမ့်မည်ဟု ထင်မှတ်နေပါသလော။ 4သို့မဟုတ် သင်သည် ကိုယ်တော်၏ ဂရုဏာထားတော်မူခြင်း၊ စိတ်ရှည်တော်မူခြင်း၊ သည်းခံတော်မူခြင်းတို့ကို မထီမဲ့မြင်ပြုပါသလော။ ဘုရားရှင်သည် သင့်အား နောင်တရစေရန် လမ်းပြပို့ဆောင်လျက်ရှိတော်မူသည်ဖြစ်၍ ကိုယ်တော်သည် ကရုဏာထားကြောင်းကို သင်သည်အမှန်ပင်သိ၏။ 5သို့သော်လည်း သင်သည် ခေါင်းမာလျက် နောင်တမရ။ ထို့ကြောင့် အမျက်တော် ပေါ်လွင်ထင်ရှားရာဖြစ်သည့် ဖြောင့်မှန်စွာ တရားစီရင်သောနေ့ရက်၌ သင်သည် ပို၍ကြီးလေးသော အပြစ်ဒဏ်ကိုခံရလိမ့်မည်။ 6ထိုနေ့ရက်၌ ကိုယ်တော်သည် လူအသီးသီးတို့အား မိမိတို့၏ အကျင့်အလျောက် အကျိုးအပြစ်ကို ပေးဆပ်တော်မူလိမ့်မည်။ 7အကျင့်ကောင်းကို ဆက်လက်ပြုကျင့်လျက် ဘုန်းအသရေကိုလည်းကောင်း၊ သေခြင်းကင်းသောဘဝကို လည်းကောင်း ရှာဖွေကြသောသူတို့အား ဘုရားရှင်သည် နိစ္စထာဝရ အသက်ကိုပေးတော်မူလိမ့်မည်။ 8သို့သော်လည်း တစ်ကိုယ်ကောင်းစိတ်ထား၍ အမှန်တရားကိုပြစ်ပယ်ကာ အမှားဘက်သို့ လိုက်ပါကြသောသူများသည် အမျက်တော်သင့်ခံကြရလိမ့်မည်။ 9ဦးစွာအားဖြင့် အစ္စရေးလူမျိုးများ၊ ထို့နောက်တွင် လူမျိုးခြားများထဲမှ ဒုစရိုက်အမှုကို ပြုကြသူအပေါင်းတို့သည် ဆင်းရဲဒုက္ခနှင့် နာကျင်ခြင်းဝေဒနာကို ခံစားကြရလိမ့်မည်။ 10သို့ရာတွင် ဦးစွာအားဖြင့် အစ္စရေးလူမျိုးများ၊ ထို့နောက် လူမျိုးခြားများထဲမှ ကောင်းသည့်အမှုကို ပြုကြသူတို့အား ဘုရားရှင်သည် ဘုန်းအသရေကိုလည်းကောင်း၊ ငြိမ်သက်ခြင်းကိုလည်းကောင်း ခံစားစေတော်မူလိမ့်မည်။ 11အဘယ်ကြောင့်ဆိုသော် ဘုရားရှင်သည် မျက်နှာကြီးငယ် မလိုက်ပဲ တရားစီရင်တော်မူမည့် အတွက်ကြောင့်ဖြစ်၏။ 12လူမျိုးခြားတို့၌ မောရှေ၏ ပညတ်တရားမရှိ။ သူတို့ အပြစ်ကျူးလွန်ကြသောအခါ ဆုံးရှုံးပျက်စီးကြရမည်သာ ဖြစ်၏။ ပညတ်တရားရှိသော အစ္စရေးလူမျိုးတို့ အပြစ်ကျူးလွန်ကြသည့်အခါ သူတို့သည် ပညတ်တရားတွင် ပြဌာန်းထားသည့် အပြစ်ဒဏ်ကို ခံကြရ၏။ 13လူသည် ပညတ်တရားအား ကြားနာရုံဖြင့် ဘုရားရှင်နှင့် မှန်ကန်စွာ ဆက်သွယ်သူမဖြစ်နိုင်ပေ။ ပညတ်တရားတွင် ပြဌာန်းထားသည့်အတိုင်း ပြုလုပ်ကျင့်ကြံမှသာလျှင် ဘုရားရှင်နှင့် မှန်ကန်စွာ ဆက်သွယ်သူ ဖြစ်နိုင်သည်။ 14လူမျိုးခြားတို့သည် မောရှေ၏ပညတ်တရားတော်တို့ကို ခံယူရရှိခြင်း မရှိကြသော်လည်း ပညတ်တရား၏ ပြဌာန်းချက်များအား မိမိတို့၏အလိုဆန္ဒအလျောက် ပြုလုပ်ကျင့်ကြံကြသောအခါ ထိုအရာများသည် သူတို့အတွက် ပညတ်တရားဖြစ်လာခဲ့၏။ 15ပညတ်တရား၏ ပြဌာန်းချက်များသည် ထိုသူတို့၏ နှလုံးသားတွင် ပြဌာန်းလျက် ရှိကြောင်း သူတို့၏ အပြအမူများက ထောက်ခံနေ၏။ သူတို့၏ ရှက်ကြောက်စိတ်ကလည်း ထောက်ခံနေ၏။ အဘယ်ကြောင့်ဆိုသော် သူတို့၏ စိတ်နှလုံးသည် သူတို့အား တစ်ခါတစ်ရံတွင် အပြစ်တင်၍ တစ်ခါတစ်ရံ၌ သူတို့ကို ထောက်ခံသောကြောင့်ဖြစ်သည်။ 16သို့ဖြစ်၍ ငါဟောပြောကြေညာသည့် သတင်းကောင်းအရ တရားစီရင်တော်မူရာနေ့၌ ဘုရားရှင်သည် ယေရှုခရစ်တော်အားဖြင့် လူခပ်သိမ်းတို့၏ လျှို့ဝှက်သော အကြံအစည်များကို ထိုသို့ စစ်ဆေးစီရင်တော် မူလိမ့်မည်။ 17သို့သော်လည်း မိတ်ဆွေ၊ သင်သည် မိမိကိုယ်မိမိ အစ္စရေးလူမျိုးဖြစ်သည်ဟုဆိုကာ ပညတ်တရားအား အားကိုးလျက် ဘုရားရှင်အကြောင်းကို ကြွားဝါတတ်၏။ 18သင်သည် ဘုရားရှင်၏အလိုတော်ကို သိမြင်သူဖြစ်သည်။ ပညတ်တရား၏ သွန်သင်မှုအားဖြင့် အမှန်ကို သိမြင်လာသူဖြစ်၏။ 19မိမိသည် မျက်မမြင်တို့၏ လမ်းပြ၊ အမှောင်တွင်ရှိသောသူတို့၏ အလင်း၊ လူမိုက်တို့ကို လမ်းမှန်သို့ ခေါ်ဆောင်နိုင်သော နည်းပြ၊ မသိနားမလည်သောသူတို့၏ ဆရာဖြစ်သည်ဟု အမှန်ပင် သင်သည်ယုံကြည်၏။ 20မိုက်မဲသော သူတစ်ပါး၏ ကလေးငယ်တို့အားလည်း သွန်သင်ဆုံးမပေးသော ဆရာဖြစ်၏။ ပညတ်တရားသည် အသိပညာနှင့် သမ္မာတရားအစုံအလင် ကိန်းအောင်းရာဖြစ်သည်ကိုလည်း သေချာစွာသိ၏။ 21သင်သည် သူတစ်ပါးတို့အား သွန်သင်ဆုံးမ သူဖြစ်ပါလျက် အဘယ်ကြောင့် မိမိကိုယ်မိမိ သွန်သင်ဆုံးမခြင်း မရှိပါသနည်း။ သင်သည် သူတစ်ပါးတို့အား မခိုးမဝှက်အောင် သွန်သင်ဆုံးမပါလျက် အဘယ်ကြောင့် သင်ကိုယ်တိုင်က ခိုးဝှက်နေပါသနည်း။ 22သင်သည် တခြားသူတို့အား သူတစ်ပါး၏ သားမယားကိုမပြစ်မှားရန် တားမြစ်ပါလျက် အဘယ်ကြောင့် သင်ကိုယ်တိုင် ပြစ်မှားနေပါသနည်း။ သင်သည် ရုပ်တုကို ရွံရှာပါလျက် အဘယ်ကြောင့် သင်ကိုယ်တိုင် ရုပ်တုတည်ရှိရာဗိမာန်ကို လုယက်ပါသနည်း။ 23သင်သည် ပညတ်တရားကို အမှီပြု၍ ဂုဏ်ယူဝါကြွားနေပါလျက် အဘယ်ကြောင့် ထိုပညတ်တရားကို ချိုးဖောက်ခြင်းအားဖြင့် ဘုရားရှင်၏ ဘုန်းအသရေတော်ကို ဖျက်ဆီးနေပါသနည်း။ 24ကျမ်းစာတော်တွင် "အစ္စရေးလူမျိုးများကြောင့် လူမျိုးခြားတို့သည် ဘုရားရှင်၏ နာမတော်ကို ကဲ့ရဲ့ကြ၏" ဟု ဖော်ပြပါရှိသည်။ 25သင်သည် ပညတ်တရားကို စောင့်ထိန်းသူဖြစ်ပါမူ သင်၏ အရေဖျားလှီးခြင်းမင်္ဂလာသည် အဓိပ္ပာယ်ရှိ၏။ သို့သော် အကယ်၍ ပညတ်တရားအား ချိုးဖောက်သောသူဖြစ်ပါက အရေဖျားလှီးခြင်းမင်္ဂလာ မခံယူခဲ့လျှင် ပို၍ကောင်းလိမ့်မည်ဖြစ်၏။ 26အကယ်၍ အရေဖျားလှီးခြင်းမင်္ဂလာ မခံယူသူ လူမျိုးခြားတစ်ယောက်သည် ပညတ်တရားပြဌာန်းချက်များကို ထိန်းသိမ်း၍ လိုက်နာပါက ထိုသူအား ဘုရားရှင်သည် အရေဖျားလှီးခြင်းမင်္ဂလာ ခံယူထားသူကဲ့သို့ မှတ်ယူမည် မဟုတ်ပါလော။ 27သင်သည် အက္ခရာတင်ထားသော ပညတ်တရားနှင့် အရေဖျားလှီးခြင်းမင်္ဂလာ ခံယူထားသူဖြစ်ပါလျက် ပညတ်တော်ကို ချိုးဖောက်နေပေသည်။ ထို့ကြောင့် လူမျိုးခြားတို့သည် သင်တို့၏ အစ္စရေးလူမျိုးများအားပြစ်ဒဏ် စီရင်ကြလိမ့်မည်။ သူတို့သည် ကိုယ်ကာယနှင့်ဆိုင်သော အရေဖျားလှီးခြင်းမင်္ဂလာကို မခံယူကြသော်လည်း ပညတ်တော်ကို စောင့်ထိန်းကြ၏။ 28နိဂုံးချုပ်ဆိုရသော် အစ္စရေးလူမျိုးဟု ထင်မှတ်ခြင်းခံရတိုင်းသည် အစ္စရေးလူမျိုး အစစ်အမှန်မဟုတ်ပေ။ လူတစ်ဦးတစ်ယောက်သည် အရေဖျားလှီးခြင်းမင်္ဂလာကို ခံယူခြင်းအားဖြင့် အစ္စရေးလူမျိုးဖြစ်မလာနိုင်ပေ။ 29သို့သော်လည်း အစ္စရေးလူမျိုး အစစ်အမှန်သည်ကား စိတ်နှလုံးတွင် အရေဖျားလှီးခြင်းမင်္ဂလာကို ခံယူခြင်းသာလျှင် ဖြစ်ပေသည်။ ထိုသူအား အစ္စရေးလူမျိုးဖြစ်စေသောအရာမှာ အက္ခရာတင်ထားသည့် ပညတ်တရားမဟုတ်ပေ။ ဘုရားရှင်၏ ဝိညာဉ်တော်ကသာ လူတို့အား အတွင်းစိတ်သဘောအားဖြင့် အစ္စရေးလူမျိုး ဖြစ်စေတော်မူ၏။ ထိုသို့သောသူသည် လူတို့ထံမှ ချီးမွမ်းခြင်းကို ခံကြရမည်မဟုတ်သော်လည်း ဘုရားရှင်၏ ထံတော်မှ ချီးမွမ်းခြင်းကို ခံကြရလေသည်။
Obecnie wybrane:
Romans 2: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
