Ephesians 4
4
1အရှင့်၏အမှုတော်ကို ထမ်းရွက်သောကြောင့် အကျဉ်းချခံရသော အကျွန်ုပ်သည် သင်တို့ကို တိုက်တွန်းနှိုးဆော်လိုသည်မှာ ရွေးချယ်တော်မူခြင်းခံရသည်နှင့်အညီ ထိုရွေးချယ်တော်မူခြင်းနှင့် သင့်လျော်စွာ ပြုမူနေထိုင်ကြရန်ဖြစ်သည်။ 2အရာရာ၌ စိတ်နှိမ့်ချခြင်းနှင့်နူးညံ့သိမ်မွေ့ခြင်းအပြည့်အဝရှိလျက် စိတ်ရှည်စွာဖြင့်အချင်းချင်းမေတ္တာထားကြ လော့။ 3ငြိမ်းချမ်းခြင်းတည်းဟူသော နှောင်ကြိုးဖြင့် ဉာဏ်အလင်းတော်မှပေးသော စည်းလုံးညီညွှတ်ခြင်းကို ကြိုးစား၍ ထိန်းသိမ်းကြလော့။ 4သင်တို့အားဘုရားရှင်ရွေးကောက်တော်မူသောအခါ တစ်ခုတည်းသောမျှော်လင့်ချက်ဖြင့် ရွေးကောက်တော်မူ သကဲ့သို့ ကိုယ်ခန္ဓာတော်တစ်ပါးတည်း၊ ဉာဏ်အလင်းတော်တစ်ပါးတည်းရှိတော်မူသည်။ 5အရှင်တစ်ပါးတည်း၊ ယုံကြည်ခြင်းတစ်ပါးတည်း၊ ရေနှစ်မင်္ဂလာတစ်ပါးတည်းသာရှိကြသည်။ 6အရာခပ်သိမ်းတို့၏အပေါ်၌ရှိသော အရာခပ်သိမ်းတို့အားအုပ်စိုးတော်မူသော အရာခပ်သိမ်းတို့၏ အဖဘုရားရှင်မှာ တစ်ပါးတည်းသာရှိသည်။ 7သို့သော် ယေရှုခရစ်တော်ခွဲဝေပေးတော်မူသည့်အတိုင်း အကျွန်ုပ်တို့တစ်ဦးချင်းစီသည် ကောင်းချီမင်္ဂလာ လက်ဆောင်များရရှိထားပြီဖြစ်သည်။ 8ထို့ကြောင့်ကျမ်းစာတွင် “ကိုယ်တော်သည်မြင့်သောအရပ်သို့တက်တော်မူသောအခါ မိမိနှင့်အတူသုံ့ပန်းများ ကိုခေါ်ဆောင်တော်မူ၍ လူတို့အားဆုလာဒ်များကိုပေးတော်မူသည်” ဟုရေးသားထားသည်။ 9(အထက်အရပ်သို့တက်သွားတော်မူသောအခါဟုဆိုရာတွင် မြေကြီးအောက်အရပ်များသို့လည်း ကြွဆင်းတော်မူခဲ့ကြောင်းကို ဆိုလိုခြင်းမဟုတ်လျှင် မည်သည့်အရာကိုဆိုလိုချင်းဖြစ်ဦးမည်နည်း။ 10သို့ဖြစ်၍ ဆင်းသက်တော်မူသောအရှင်သည်ကား အရာခပ်သိမ်းကိုပြည့်စုံစေရန်ကောင်းကင်ထက်မြင့်ရာ သို့တက်ကြွတော်မူ၏။ 11ယေရှုခရစ်တော်သည် တစ်ချို့ကိုသာဝကများအဖြစ်လည်းကောင်း၊ တစ်ချို့ကိုပညာရှိပရောဖက် များအဖြစ်လည်းကောင်း၊ တစ်ချို့ကိုမင်္ဂလာသတင်းဟောပြောသူများအဖြစ်လည်းကောင်၊ တစ်ချို့ကို သင်းအုပ်ဆရာနှင့် ဓမ္မဆရာများအဖြစ်လည်းကောင်း ရွေးကောက်ခန့်အပ်တော်မူသည်။ 12ဤသို့ ခန့်အပ်ရခြင်းမှာ ခရစ်တော်၏ကိုယ်ခန္ဓာနှင့်တူသောအသင်းတော်ကို တည်ဆောက်ခြင်းအတွက်၊ ဘုရားရှင်၏လူတို့အားအမှုတော်ထမ်းဆောင်ရန်အဆင်သင့်ပြင်ဆင်စေလိုခြင်းအတွက်ဖြစ်သည်။ 13အကျွန်ုပ်တို့အားလုံးသည် ယုံကြည်ခြင်းနှင့် ဘုရားရှင်၏ သားတော်ကိုသိကျွမ်းခြင်းတို့၌ တညီတညွတ်တည်း ဖြစ်သည့်တိုင်အောင် လည်းကောင်း၊ ရင့်ကျက်သည်ထိတိုင်အောင်လည်းကောင်း၊ ယေရှုခရစ်တော်၏ ပြည့်စုံခြင်းစံနှုန်းကိုမီသည်ထိတိုင်အောင်လည်းကောင်း ဤတာဝန်မှာ ဆက်လက်၍တည်ရှိနေဦးမည်ဖြစ်သည်။ 14ထိုအခါအကျွန်ုပ်တို့သည်ပရိယာယ်ဖြင့်လူတို့ကိုလမ်းလွှဲအောင်လိမ်လည်ပြောဆိုတတ်သူတို့၏ သြဝါဒလေလှိုင်းများထဲ၌ လေကြောင်းပြောင်းတိုင်းလွှင့်ပါသွားသောကလေ်သူငယ်များကဲ့သို့ဖြစ်ကြတော့မည် မဟုတ်ပေ။ 15ထိုအစား ချစ်ခြင်းမေတ္တာဖြင့် သမ္မာတရားကိုဟောပြောလျက် ဦးခေါင်းဖြစ်တော်မူသော ယေရှုခရစ်တော်၌ အစစအရာရာကြီးပွားတိုးတတ်မှုရှိကြရမည်ဖြစ်သည်။ 16ကိုယ်တော်၏စီမံအုပ်ချုပ်မှုအောက်တွင်ကိုယ်အင်္ဂါ ရှိသမျှတို့သည်တစ်ခုနှင့်တစ်ခုအဆစ်အပိုင်း များဖြင့်ဆက်စပ်လျက်နေကြ၏။ သို့ဖြစ်၍ကိုယ် အင်္ဂါအသီးသီးတို့သည် မိမိတို့သက်ဆိုင်ရာ အလုပ်တာဝန်ကိုဆောင်ရွက်ကြသောအခါ ကိုယ်ခန္ဓာတစ်ခုလုံးကိုမေတ္တာတရားအား ဖြင့်တည်ဆောက်၍ကြီးပွားစေလေသည်။ 17ထို့ကြောင့် ဘုရားရှင်ကို မသိသောလူမျိုးခြားများကဲ့သို့ မနေထိုင်ကြရန် ဘုရားရှင်၏ အခွင့်အာဏာဖြင့် သင်တို့ကို အကျွန်ုပ်သတိပေးလိုသည်။ ထိုသူတို့၏ တွေးခေါ်ကြံဆမှုသည် အကျိုးမရှိပေ။ 18သူတို့သည် အသိဉာဏ်အမှောင်ဖုံးလျက်ရှိပြီး အသိတရားလုံးဝကင်းမဲ့လျက်ခေါင်းမာကြသဖြင့် ဘုရားရှင်ပေးတော်မူသောအသက်နှင့် ကင်းကွာလျက်ရှိကြသည်။ 19ရှက်ကြောက်စိတ်လုံးဝမရှိတော့သဖြင့်သူတို့ သည်ကာမဂုဏ်လိုက်စားကာ ညစ်ညမ်းသောအကျင့် အမျိုးမျိုးတို့ကိုချုပ်တည်းမှုမရှိပြုမူကြပေသည်။ 20သို့သော် သင်တို့သင်ယူခဲ့ရသော ယေရှုခရစ်တော်၏လမ်းစဉ်မှာထိုသို့မဟုတ်ပေ။ 21သင်တို့သည်ယေရှုခရစ်တော်၏အကြောင်းကိုအမှန်ပင်သင်တို့ကြားနာကြရပြီး ကိုယ်တော်၏သမ္မာတရားတော်အကြောင်းကိုသင်ယူခဲ့ကြပြီဖြစ်သည်။ 22သင်တို့သည် လှည့်ဖြားတတ်သောတပ်မက်ခြင်းများကြောင့် ပျက်စီးခြင်းသို့ရောက်မည့် သင်တို့၏လူဟောင်းတည်းဟူသော ယခင်က အသက်ရှင်နေထိုင်မှုကိုစွန့်လွှတ်ကြလော့။ 23သင်တို့၏စိတ်နှလုံးအား အသစ်ပြုပြင်မှုကိုခံယူကြလော့။ 24ဘုရားရှင်၏ပုံသဏ္ဌာန်တော်နှင့်အညီဖန်ဆင်း ခြင်းကိုခံရ၍ သမ္မာတရားဆိုင်ရာဖြောင့်မတ် သန့်ရှင်းသူလူသစ်ဖြစ်ကြရမည်။ 25ထို့ကြောင့် လိမ်လည်၍မပြောကြနှင့်။ အကျွန်ုပ်တို့သည် ယေရှုခရစ်တော်၏ ကိုယ်ခန္ဓာအစိတ်အပိုင်းများ ဖြစ်ကြသောကြောင့် တစ်ဦးကိုတစ်ဦးမှန်ကန်သောစကားကိုသာပြောကြလော့။ 26စိတ်ဆိုးသော်လည်း အပြစ်မကျူးလွန်ကြနှင့်။ နေမဝင်ခင်အချိန်တွင် စိတ်ဆိုးပြေကြလော့။ 27မာရ်နတ်ကိုအခွင့်အရေးမပေးကြနှင့်။ 28ခိုးတတ်သောသူသည် နောက်ထပ်မခိုးတော့ဘဲ လိုအပ်သောသူတို့အား ပေးကမ်းဝေမျှနိုင်ရန် မိမိလက်ဖြင့် ကောင်းသောအမှုကို ကြိုးစားလုပ်ဆောင်ကြရမည်ဖြစ်သည်။ 29သင်တို့၏ နှုတ်ဆိုးညစ်သောစကားတစ်ခွန်းကိုမျှ မထွက်စေနှင့်။ နားထောင်သူတို့အတွက် အကျိုးရှိစေရန် အချိန်အခါကိုကြည့်၍ ကောင်းသောစကားကို အပြုသဘောဆောင်၍ပြောကြလော့။ 30ဘုရားရှင်၏ဉာဏ်အလင်းတော်ကို ဝမ်းမနည်းစေကြနှင့်။ သင်တို့သည် နောက်ဆုံးသောနေ့ရက်တွင် ထိုဉာဏ်အလင်းတော်ဖြင့် တံဆိပ်ခတ်နှိပ်ခြင်းကိုခံရကြမည်ဖြစ်သည်။ 31ထို့ကြောင့်နာကြည်းခြင်း၊ စိတ်ဆိုးခြင်း၊ အမျက် ထွက်ခြင်း၊ အော်ဟစ်ငေါက်ငမ်းခြင်း၊ သူတစ်ပါး အသရေဖျက်ခြင်း၊ ခပ်သိမ်းသောမုန်းတီးခြင်း တို့ကိုဖယ်ရှားကြလော့။ 32သင်တို့သည်တစ်ဦးကိုတစ်ဦးချစ်ခင်ကြင်နာကြလော့။ ဘုရားရှင်သည်ယေရှုခရစ်တော်ကြောင့် သင်တို့အားခွင့်လွှတ်တော်မူသကဲ့သို့ သင်တို့သည်လည်းတစ်ဦးနှင့်တစ်ဦးခွင့်လွှတ်ကြလော့။
Obecnie wybrane:
Ephesians 4: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.