Acts 11
11
1တိုင်းတပါးသားတို့သည်လည်း ဘုရားရှင်၏နှုတ်ကပတ်တော်ကို လက်ခံနာယူကြသည်ကို ယုဒပြည်တခွင်ရှိ တပည့်တော်များနှင့် အခြားသောယုံကြည်သူများသည်လည်း ကြားသိကြလေသည်။ 2ထို့နောက် ပေတရုသည် ဂျေရုဆလင်မြို့သို့သွားသောအခါ အရေဖျားလှီးခြင်းကိုခံယူကြသော တိုင်းတပါးသားတို့က 3"သင်သည် အရေဖျားလှီးခြင်းမင်္ဂလာ ပြုလုပ်မထားကြသူများ၏ နေအိမ်တွင် တည်းခိုပြီး သူတို့နှင့်အတူ စားသောက်နေ၏" ဟုပြစ်တင်ဝေဖန်ကြလေ၏။ 4ထိုအခါ ပေတရုက သူတို့အား ဖြစ်ပျက်ခဲ့သမျှ အကြောင်းအရာတို့ကို အသေးစိတ်ရှင်းလင်း ပြောပြလေ၏။ 5"ငါသည် ယုပ္ပေမြို့၌ ဆုတောင်းနေသည့်အချိန်တွင် ထောင့်လေးထောင့်မှထိန်းထားပြီး ကောင်းကင်မှနေ လျှောကျလာသည့် ပိတ်ချောစကြီးနှင့်တူသည်အရာသည် နိမ့်ဆင်းလာပြီး ငါ့ထံသို့ရောက်လာသည်ကို ရူပါရုံတွင် မြင်ခဲ့ရ၏။ 6ငါသည် ထိုအရာအား စူးစိုက်ကြည့်လိုက်သည့်အခါ မြေပေါ်တွင်ရှိသည့် ခြေလေးချောင်းသတ္တဝါများ၊ သားရဲတိရိစ္ဆာန်များ၊ တွားသွားသတ္တဝါများနှင့် ကောင်းကင်မှငှက်များကို မြင်ခဲ့ရ၏။ 7ထို့နောက် 'ပေတရု၊ ထပြီး သတ်စားလော့' ဟုငါ့အားပြောသည့်အသံကိုလည်း ငါကြားခဲ့ရ၏။ 8သို့သော် ငါက 'မဖြစ်နိုင်ပါအရှင်၊ မစင်ကြယ်သည့်အရာနှင့် ညစ်ညမ်းသည့် မည်သည့်အရာကိုမျှ ကျွန်ုပ်မစားဖူးပါ" ဟုပြောသည့်အခါ 9'ဘုရားရှင်က စင်ကြယ်သည်ဟု သတ်မှတ်ထားသည့် အရာမှန်သမျှကို ညစ်ညမ်းသည်ဟု မပြောဆိုသင့်ပေ' ဟုဆိုသည့် အသံတော်သည် ကောင်းကင်မှနေ ဒုတိယအကြိမ်ထွက်ပေါ်လာခဲ့၏။ 10ထိုကဲ့သို့ သုံးကြိမ်တိုင်တိုင် ဖြစ်ပြီးသည့်အခါ ထိုအရာအားလုံးသည် ကောင်းကင်သို့ ပြန်ပြီးဆွဲယူသွားခြင်းခံခဲ့ရ၏။ 11ထိုအချိန်အတွင်း၌ပင် ဆီဇာရီးယားမြို့မှနေ ငါ့ထံသို့ စေလွှတ်လိုက်သည့် လူသုံးယောက်သည် ငါတည်းခိုနေသည့်အိမ်သို့ ရောက်လာခဲ့ကြ၏။ 12မတုံ့မဆိုင်းဘဲ သူတို့နှင့်အတူ လိုက်ပါသွားရန် ဉာဏ်အလင်းတော်သည် ငါ့အာမိန့်တော်မူသည့်အတွက် ဤယုံကြည်သူခြောက်ယောက်သည်လည်း ငါနှင့်အတူ ဆီဇာရီးယားမြို့သို့ လိုက်လာခဲ့ကြပြီး ငါတို့အားလုံးသည် ကော်နေလိ၏အိမ်သို့ သွားခဲ့ကြ၏။ 13သူကလည်း သူ၏အိမ်တွင် နတ်ဒေဝါတစ်ပါးရပ်နေသည်ကို မြင်ခဲ့ရသည့်အကြောင်းနှင့် ထိုနတ်ဒေဝါက သူ့အား လူအချို့ကို စေလွှတ်၍ ယုပ္ပေမြို့တွင်ရှိသည့် ပေတရုဟုခေါ်သည့် ရှိမုန်အား သွားခေါ်လော့။ 14သူသည် သင်နှင့်သင်၏အိမ်သူအိမ်သားအပေါင်းအား ကယ်တင်ခြင်းရစေမည့် သတင်းစကားကို သင့်အား ပြောပြပါလိမ့်မည်' ဟုမိန့်တော်မူခဲ့သည်ကို ငါတို့ကို ပြောပြလေ၏။ 15ထို့နောက် ငါဟောပြောသည့် အခါတွင်လည်း ဉာဏ်အလင်းတော်သည် ငါတို့အပေါ် ဦးစွာသက်ရောက်တော်မူသကဲ့သို့ သူတို့အပေါ်တွင်လည်း သက်ရောက်တော်မူ၏။ 16ထိုအခါ ကိုယ်တော်မိန့်တော်မူခဲ့သည့် 'ရေနှစ်မင်္ဂလာဆရာယောဟန်သည် သင်တို့အား ရေဖြင့်ရေနှစ်မင်္ဂလာပေးသော်လည်း သင်တို့သည် ဉာဏ်အလင်းတော်နှင့် ရေနှစ်မင်္ဂလာပေးခြင်းခံရမည်' ဆိုသည့်စကားကို ငါသည် အောက်မေ့သတိရမိလေ၏။ 17ထို့ကြောင့် ဘုရားရှင်သည် ယေရှုခရစ်တော်အား ယုံကြည်သည့်ငါတို့ကို ဆုလက်ဆောင်များပေးသကဲ့သို့ သူတို့ကိုလည်း တူညီသည့်ဆုလက်ဆောင်ကို ပေးတော်မူသည် ဖြစ်သည့်အတွက် ငါသည်မည်သူဖြစ်၍ ဘုရားရှင်အား တားဆီးနိုင်မည်နည်း" ဟုဆိုလေ၏။ 18ထိုသူတို့သည်လည်း ဤစကားကိုကြားလျှင် မည်သည့်အရာကိုမျှ တုံ့ပြန်ပြောဆိုခြင်းမရှိဘဲ "ဘုရားရှင်သည် တိုင်းတပါးသားများကိုလည်း အသက်ရှင်ခြင်းအား ရရှိစေမည့် နောင်တသံဝေဂတရားတော်ကို ပေးတော်မူပြီ" ဟူ၍ ဘုရားရှင်၏ဂုဏ်တော်ကို ချီးမွမ်းကြလေ၏။ 19သတေဖန်သေဆုံးပြီးနောက်ဖြစ်ပေါ်လာသော ပဋိပက္ခတို့ကြောင့် တကွဲတပြားစီဖြစ်သွားကြသော ယုံကြည်သူအချို့သည် ဖိုနီးရှားပြည်၊ ဆိုက်ပရပ်ကျွန်းနှင့် အန္တိအုတ်မြို့များအထိတိုင်အောင် ရောက်ရှိသွားကြလေသည်။ သူတို့သည် ဘုရားရှင်၏ နှုတ်ကပတ်တော်အား ဂျူးလူမျိုးများကိုသာ ဟောပြောကြလေသည်။ 20သို့သော် ထိုသူတို့ထဲမှ ဆိုက်ပရပ်ကျွန်းနှင့်ကုရေနေမြို့မှ လူအချို့တို့သည် အန္တိအုတ်မြို့သို့သွားပြီးလျှင် ဂရိစကားပြောသောသူများနှင့် စကားပြောဆိုလျက် ကိုယ်တော်ယေရှုအကြောင်း မင်္ဂလာသတင်းကောင်းကို ဟောပြောကြသည်။ 21ဘုရားရှင်၏တန်ခိုးတော်သည်လည်း ထိုသူတို့နှင့်အတူရှိသဖြင့် များစွာသောသူတို့သည် ယုံကြည်ကြ၍ဘုရားရှင်ထံတော်သို့ လှည့်လာကြ၏။ 22ထိုသူတို့နှင့်ပတ်သက်သည့်သတင်းအား ဂျေရုဆလင်မြို့ရှိ အသင်းတော်သည် ကြားသောအခါ ဗာနဗအား အန္တိအုတ်မြို့သို့သွားရန် စေလွှတ်လေသည်။ 23သူသည်ရောက်ရှိလာပြီး လူတို့အား ပေးအပ်ထားသော ဘုရားရှင်၏ကောင်းချီးမင်္ဂလာကိုမြင်သောအခါ ဝမ်းမြောက်လျက် ထိုသူအပေါင်းတို့အား စိတ်နှလုံးခိုင်မြဲစွာဖြင့် ဘုရားရှင်အား ဆက်လက်၍ ယုံကြည်နေကြရန် တိုက်တွန်းနှိုးဆော်လေသည်။ 24ဗာနဗသည် သူတော်ကောင်းဖြစ်၍ သန့်ရှင်းသောဝိညာဉ်တော်နှင့်လည်းကောင်း၊ ယုံကြည်ခြင်းနှင့်လည်းကောင်း ပြည့်ဝသောသူဖြစ်သောကြောင့် များစွာသောလူတို့သည် ဘုရားရှင်အား ယုံကြည်သက်ဝင်လာကြလေသည်။ 25ထို့နောက် ဗာနဗသည် ရှောလုအားရှာရန် တာရှုမြို့သို့ထွက်သွားလေသည်။ 26သူသည် ရှောလုအားတွေ့သောအခါ အန္တိအုတ်မြို့သို့ ခေါ်လာလေသည်။ ဤသို့ဖြင့် သူတို့သည် တစ်နှစ်ပတ်လုံး အသင်းတော်တွင်စုဝေးလျက် များစွာသောလူတို့ကို သွန်သင်ရန်အကြောင်း ဖြစ်လာလေသည်။ တပည့်တော်များသည် ထိုအန္တိအုတ်မြို့၌ "ခရစ်ယာန်" ဟုပထမဦးဆုံးခေါ်ဝေါ်ခြင်းကို ခံခဲ့ကြရလေသည်။ 27ထိုကာလများ၌ အရိယာသူတော်စင် အချို့သည် ဂျေရုဆလင်မြို့မှ အန္တိအုတ်မြို့သို့ ဆင်းလာကြလေသည်။ 28ထိုသူတို့အထဲမှ အာဂဗုအမည်ရှိသူတစ်ဦးသည် ထ၍ ကမ္ဘာတစ်ဝန်းလုံး၌ ကြီးစွာသောငတ်မွတ်ခေါင်းပါးခြင်းဘေး ကျရောက်တော့မည်ဟု ဉာဏ်အလင်းတော်၏ တန်ခိုးတော်အားဖြင့် ကြိုတင်ဟောပြောလေသည်။ ထိုဘေးသည် ကလောဒိမင်း၏လက်ထက်တွင် ဖြစ်ပေါ်ခဲ့လေသည်။ 29တပည့်တော်တို့သည် သူတို့အသီးသီး တတ်နိုင်ကြသည့်အတိုင်း ယုဒပြည်၌နေထိုင်ကြသောသူတို့၏ ယုံကြည်သူအဖွဲ့ဝင်များအား အကူအညီပေးပို့ရန် ဆုံးဖြတ်ကြလေသည်။ 30သူတို့သည် ထိုအတိုင်းပြုလုပ်ပြီး ဗာနဗနှင့်ရှောလုတို့၏လက်မှတစ်ဆင့် အသင်းတော်ခေါင်းဆောင်များထံသို့ ငွေများပေးပို့ကြလေသည်။
Obecnie wybrane:
Acts 11: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
