Acts 1
1
1သော်ဖိလုခင်ဗျား၊ ကျွန်ုပ်၏ပထမစာအုပ်တွင် သာသနာအမှုတော် စတင်ဆောင်ရွက်ချိန်မှစ၍ ရွှေမြို့တော်သို့ ခေါ်ဆောင်ခြင်းခံရသည့်နေ့အထိ 2ကိုယ်တော်ယေရှု လုပ်ဆောင်ခဲ့သည့်အရာများ အားလုံးနှင့် ဟောပြောသွန်သင်ပေးခဲ့သမျှသော အကြောင်းအရာများအားလုံးကို ရေးသားခဲ့ပြီး ဖြစ်ပါသည်။ ရွှေမြို့တော်သို့ ပြန်လည်ခေါ်ဆောင်ခြင်းမခံရမီတွင် ကိုယ်တော်ယေရှုသည် တပည့်သာဝကများအဖြစ် ရွေးချယ်ထားသောသူတို့အား ညဏ်အလင်းတော်၏ တန်ခိုးအားဖြင့် မိန့်မှာချက်များ ပေးထားခဲ့၏။ 3ကိုယ်တော်သည် ဒုက္ခဆင်းရဲအပေါင်းတို့ဖြင့် လက်ဝါးကပ်တိုင်ပေါ်တွင် သူ၏အသက်အား ဇီဝိတဒါနပြုတော်မူပြီးနောက် မိမိသည် သေရာမှ အသက်ပြန်ရှင်မည့်ကြောင်းကို ခိုင်လုံသောနည်းလမ်းများစွာဖြင့် ရက်လေးဆယ်တိုင်တိုင် ကိုယ်ထင်ပြကာ တပည့်တော်များအား ဘုရားရှင်၏ သာသနာတော်အကြောင်းကို ဟောပြောသွန်သင်တော်မူခဲ့၏။ 4ထိုသို့ တပည့်သာဝကများနှင့် စုဝေး၍တွေ့ဆုံကြစဉ် ကိုယ်တော်က သူတို့အား "ဂျေရုဆလင်မြို့မှနေ ထွက်ခွာမသွားကြနှင့်။ သင်တို့ကို ငါဟောပြောခဲ့သည့်အတိုင်း အဖဘုရားရှင်ကတိတော်ထားခဲ့သော ဆုလက်ဆောင်အား ဤအရပ်၌ပင် စောင့်နေကြလော့။ 5ယောဟန်သည် ရေဖြင့်သာ ရေနှစ်မင်္ဂလာပေးခဲ့သော်လည်း သင်တို့မူကား ရက်အနည်းငယ်အတွင်း၌ပင် ဉာဏ်အလင်းတော်အားဖြင့် ရေနှစ်မင်္ဂလာပေးခြင်းကို ခံယူကြရလိမ့်မည်" ဟုမိန့်မှာတော်မူ၏။ 6ကိုယ်တော်ယေရှုနှင့် အတူရှိနေစဉ်တွင် သာဝကတို့သည် ကိုယ်တော်အား "ကိုယ်တော်၊ ကိုယ်တော်သည် အစ္စရေးလူမျိုးများအတွက် နိုင်ငံကိုပြန်လည်၍ တည်ထောင်ပေးမည် ဖြစ်ပါသလော" ဟု မေးလျှောက်ကြ၏။ 7ကိုယ်တော်ကလည်း "အချိန်အခါများနှင့် အဖြစ်အပျက်များသည် ဖခမည်းတော်၏ တန်ခိုးအာဏာနှင့် စီစဉ်ထားသည်ဖြစ်သောကြောင့် ဤအရာတို့အား သင်တို့သိရှိရန် မလိုအပ်ပေ။ 8သို့သော် ညဏ်အလင်းတော်သည် သင်တို့အပေါ်၌ သက်ရောက်အုပ်စိုးသည့်အခါတွင် သင်တို့သည် တန်ခိုးတော်အား ရရှိကြမည်ဖြစ်ပြီး ဂျေရုဆလင်မြို့၊ ယုဒပြည်နှင့် ရှမာရိနယ်တစ်ခုလုံးတွင်သာမက ကမ္ဘာမြေကြီး၏ အစွန်းထိတိုင်အောင် ငါ၏သက်သေများ ဖြစ်ကြလိမ့်မည်" ဟုမိန့်တော်မူလေ၏။ 9ထိုသို့မိန့်တော်မူပြီးနောက် သူတို့ကြည့်ရှုလျက် ရှိနေစဉ်တွင်ပင် ကိုယ်တော်ယေရှုသည် ရွှေမြို့တော်သို့ ခေါ်ဆောင်ခြင်းကို ခံယူတော်မူ၍ မိုးတိမ်တိုက်များကြားတွင် ကွယ်ပျောက်သွားလေတော့၏။ 10ထိုသို့ ကိုယ်တော်ကြွချီတော်မူသည်ကို တပည့်တော်တို့က ဆက်လက်၍ ကောင်းကင်သို့ စူးစိုက်၍ ကြည့်နေကြစဉ်တွင် ဖြူစင်သောအဝတ်ကို ဝတ်ဆင်ထားသည့် လူနှစ်ဦးသည် တပည့်တော်တို့၏ အနီးတွင် ရုတ်တရက်ရပ်၍ 11"ဂါလိလဲပြည်သားတို့၊ မည်သည့်အတွက်ကြောင့် ဤနေရာတွင်ရပ်ပြီး ကောင်းကင်သို့ စူးစိုက်ကြည့်နေကြသနည်း။ ကိုယ်တော်ယေရှုသည် သင်တို့ထံမှနေ၍ ရွှေမြို့တော်သို့ ခေါ်ဆောင်ခံရသည့်အတိုင်း ရွှေမြို့တော်မှနေ၍ သင်တို့ထံသို့ တစ်ဖန်ပြန်လည်၍ ကြွလာတော်မူလိမ့်မည်" ဟုပြောဆိုလေ၏။ 12ထို့နောက် တပည့်တော်တို့သည် သံလွင်တောင်မှ မိုင်ဝက်ခန့်ဝေးကွာသော ဂျေရုဆလင်မြို့သို့ ပြန်သွားကြလေ၏။ 13မြို့ထဲသို့ရောက်ကြလျှင် ပေတရု၊ ယာကုပ်၊ ယောဟန်၊ အန္ဒြေ၊ ဖိလိပ္ပု၊ သောမ၊ ဗာသောလမဲ၊ မဿဲ၊ အာလဖဲ၏သားယာကုပ်၊ မျိုးချစ်ပုဂ္ဂိုလ်ဟုခေါ်သော ရှိမုန်နှင့် ယာကုပ်၏သား ယုဒတို့သည် သူတို့တည်းခိုရာနေရာ၏ အပေါ်ထပ်သို့ တက်သွားကြလေ၏။ 14သူတို့အားလုံးသည် ကိုယ်တော်၏မိခင် မာရိအပါအဝင် အချို့သောအမျိုးသမီးများa၊ ညီတော်များနှင့် အတူတကွစုရုံး၍ ဝတ်ပြုဆုတောင်းခြင်းအမှုကို မကြာခဏပြုလုပ်လျက်နေကြ၏။ 15တစ်နေ့၌ အရေအတွက်အားဖြင့် တစ်ရာ့နှစ်ဆယ်ခန့်ရှိသော နောက်လိုက်တပည့်တော်များ စုဝေးနေကြစဉ် ပေတရုသည် သူတို့အလယ်၌ ထ၍ 16"ညီနောင်အပေါင်းတို့၊ ကိုယ်တော်ယေရှုအား ဖမ်းဆီးခဲ့ကြသည့်သူများအတွက် လမ်းပြပေးခဲ့သည့် ယုဒဣရှကာရုတ်နှင့် ပတ်သက်ပြီး ဉာဏ်အလင်းတော်က ဒါဝိဒ်ရဲ့နှုတ်မှတဆင့် ကြိုတင် ဟောပြောထားသည့် ကျမ်းချက်သည် ပြည့်စုံမှန်ကန်ခဲ့ပြီဖြစ်၏။ 17အဘယ်ကြောင့်ဆိုသော် ယုဒဣရှကာရုတ်သည် ဤသာသနာအမှုတော်တွင် ပါဝင်ထမ်းရွက်ရန် ငါတို့နှင့်အတူ ရွေးချယ်ခြင်းခံရသူ တစ်ယောက်ဖြစ်ခဲ့၏။ 18သို့သော် သူသည် သူ၏မတရားမှုကြောင့် ရရှိလာသည့်ငွေနှင့် လယ်မြေတစ်ကွက်အားဝယ်ယူ၍ ထိုလယ်၌ပင် ဝမ်းဗိုက်ပေါက်၊ အူများထွက်ကျကာ သေဆုံးခဲ့ရ၏။ 19ဂျေရုဆလင်မြို့ရှိ လူတို့သည်လည်း ထိုအဖြစ်အပျက်အား ကြားသိက်သည့်အခါ ထိုမြေကို 'သွေးမြေ' ဟုအဓိပ္ပါယ်ရသော သူတို့၏ဘာသာစကားဖြင့် 'အကေလဒမ' လို့ခေါ်ခဲ့ကြ၏။ 20ဆာလံကျမ်းတွင် ‘သူနေထိုင်သည့်အရပ်သည် လူသူကင်းမဲ့သည့် အရပ်ဖြစ်ပါစေ။ ထိုအရပ်တွင် နေထိုင်ကြသောမူများ မရှိပါစေနှင့်။ ထို့နောက်တွင် သူ၏အလုပ်တာဝန်ကိုလည်း အခြားသူမှထမ်းဆောင်ပါစေ’ ဟု ရေးသားထားသည်ဖြစ်၏။ 21ထို့ကြောင့် ကိုယ်တော်ယေရှု အသက်ပြန်ရှင်လာကြောင်း မင်္ဂလာသတင်းကောင်းကို လူအပေါင်းတို့ထံ သက်သေခံပြောပြရန်အတွက် လူတစ်ယောက် လိုအပ်လျက်ရှိ၏။ 22ထိုသူသည် ယောဟန် ရေနှစ်မင်္ဂလာပေးသည့် အချိန်မှစတင်၍ ကိုယ်တော်ယေရှု ရွှေမြို့တော်သို့ ခေါ်ဆောင်သွားခြင်းခံရသည့်နေ့အထိ ငါတို့နှင့်အတူ ရှိခဲ့ဖူးသူဖြစ်ရမည်" ဟုဆိုလေ၏။ 23ထိုအခါ သူတို့သည် ယုစတုဟုလည်းခေါ်၍ ဗာရှဗဟုလည်းခေါ်သော ယောသပ်နှင့် မဿိဆိုသူတို့ နှစ်ဦးကို လျာထားကြပြီး သူတို့သည် 24"လူအပေါင်းတို့၏ စိတ်နှလုံးအား သိမြင်တော်မူသည့်ကိုယ်တော်၊ 25ထမ်းဆောင်ရမည့်ဓမ္မအမှုကို အပြစ်ပြု၍ ရှောင်လွှဲသွားသည့် ယုဒဣရှကာရုတ်အား အစားထိုးရန် ဤလူနှစ်ယောက်ထဲမှ ကိုယ်တော်ရွေးချယ်သည့်သူအား ပြသပေးတော်မူပါ" ဟုဆုတောင်းကြပြီး 26ထိုသူနှစ်ဦးအား မဲနှိုက်ရွေးချယ်ရာ မဿိသည်မဲကျသဖြင့် သူသည် တပည့်တော် တစ်ဆယ့်တစ်ပါးတို့နှင့်အတူ သာဝကစာရင်းဝင်လေ၏။
Obecnie wybrane:
Acts 1: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
