1 Timothy 3
3
1“တစ်စုံတစ်ယောက်သည် ကြီးကြပ်သူဖြစ်ရန် ဆန္ဒပြင်းပြလျှင် ထိုသူသည် မွန်မြတ်သည့်အမှုကို တောင့်တသူဖြစ်၏” ဟူသော စကားသည် မှန်ကန်၏။ 2ကြီးကြပ်သူသည် အပြစ်ဆိုဖွယ်မရှိသူ၊ မယားတစ်ယောက်တည်းရှိသူ၊ ကိုယ်ကျင့်တရားစောင့်ထိန်းသူ၊ မိမိကိုယ်ကိုယ် ချုပ်တည်းသူ၊ လေးစားထိုက်သူ၊ ဧည့်ဝတ်ကျေသူ၊ သွန်သင်တတ်သူ ဖြစ်ရမည်။ 3သူသည် သေရက်အရက်ယစ်မူးခြင်းမရှိသူ၊ ခက်ထန်ကြမ်းကြုတ်သူမဟုတ်ဘဲ နူးညံ့သိမ်မွေ့သူ၊ ခိုက်ရန်ဖြစ်ပွားခြင်းမရှိသောသူ၊ ငွေမမက်သောသူ ဖြစ်ရမည်။ 4သူသည် မိမိအိမ်ထောင်ကို ကောင်းစွာ ဦးဆောင်စီမံနိုင်ပြီး သားသမီးများတို့၏ နာခံလေးစားမှုကို ခံရသောသူဖြစ်ရမည်။ 5မိမိအိမ်ထောင်ကို မည်သို့ဦးဆောင်ရမည်ကိုမသိလျှင် ဘုရားရှင်၏ အသင်းတော်ကို မည်သို့ ပြုစုစောင့်ရှောက်နိုင်မည်နည်း။ 6သူသည် မကြာမီကမှ ယုံကြည်သူဖြစ်လာသူမဖြစ်ရ။ ထိုသို့မဟုတ်ပါက သူသည် ဘဝင်မြင့်လျက် မာရ်နတ်နှင့်တူညီသောပြစ်ဒဏ်စီရင်ခြင်းထဲသို့ကျရောက်လိမ့်မည်။ 7ကဲ့ရဲ့ရှုတ်ချခြင်းမခံရစေရန်နှင့် မာရ်နတ်၏ထောက်ချောက်ထဲသို့ မကျရောက်စေရန် သူသည် အသင်းတော်ပြင်ပတွင် ဂုဏ်သတင်းကောင်းသူဖြစ်ရမည်။ 8ထိုနည်းတူ သင်းထောက်တို့သည် တည်ကြည်၍ လေးစားထိုက်သောသူ ဖြစ်ရမည်။ လျှာနှစ်ခွဖြင့် ပြောဆိုတတ်သူ၊ သေရည်အရက်သောက်စားသူ၊ မသမာသောနည်းဖြင့် ငွေရှာသူမဖြစ်ရ။ 9သူတို့သည် ယုံကြည်ခြင်းတရား၏ လျှို့ဝှက်နက်နဲသောအမှန်တရားကို လိပ်ပြာသန့်သန့်ဖြင့် ဆက်လက်ယုံကြည်သူများဖြစ်ရမည်။ 10ထိုသူတို့သည် ဦးစွာ စစ်ဆေးခံရပြီး သူတို့၌ အပြစ်ဆိုဖွယ်မရှိလျှင် သင်းထောက်အဖြစ် အမှုတော်ဆောင်ခွင့်ကြလော့။ 11ထိုနည်းတူ သူတို့၏ ဇနီးမယားတို့သည်လည်း လေးစားထိုက်သူဖြစ်ရမည်။ ကုန်းချောစကားမပြောသူ၊ ကိုယ်ကျင့်တရားစောင့်ထိန်းသူ၊ အရာရာ၌ ယုံကြည်စိတ်ချရသူ ဖြစ်ရမည်။ 12သင်းထောက်သည် မယားတစ်ယောက်တည်းရှိသူ၊ သားသမီးများနှင့် အိမ်သူအိမ်သားများကို ကောင်းစွာ ဦးဆောင်စီမံနိုင်သူ ဖြစ်ရမည်။ 13မိမိတာဝန်ကို ကောင်းစွာ အမှုတော်ဆောင်နိုင်သော သင်းထောက်သည် ရိုသေလေးစားခြင်းကိုခံရ၍ ယေရှုခရစ်တော်ကို ယုံကြည်သည့်အကြောင်းကို ရဲဝံ့စွာ ပြောနိုင်၏။ 14သင့်ထံသို့ မကြာမီလာနိုင်ရန် မျှော်လင့်သော်လည်း ဤအရာများကို ဦးစွာ ရေးပို့လိုက်ပါ၏။ 15ကျွန်ုပ်ကြန့်ကြာနေခဲ့လျှင်လည်း ဘုရားရှင်၏ အိမ်တော်တွင်နေထိုင်ကြသူတို့ မည်သို့ ပြုမူရမည်ကို သင်သိစေရန်ဖြစ်၏။ ဤသည်ကား အသက်ရှင်သောဘုရားရှင်၏ အသင်းတော်ဖြစ်ပြီး သမ္မာတရား၏ မဏ္ဍိုင်နှင့် အုတ်မြစ်လည်း ဖြစ်၏။ 16ဘုရားရှင်အားယုံကြည်ခြင်း၏လျှို့ဝှက်နက်နဲသောအရာသည် ကြီးမြတ်ကြောင်းကို မေးခွန်းထုတ်ရန်မရှိ။ အရှင်သည် လူသားခန္ဓာကိုယ်ဖြင့်ပေါ်ထွန်းလာပြီး ဘုရားရှင်၏ သားတော် စစ်မှန်ကြောင်း ဉာဏ်အလင်းတော်အားဖြင့် အသိအမှတ်ပြုခံရတော်မူ၏။ ကိုယ်တော်ကို နတ်ဒေဝါတို့ မြင်ကြပြီး ကိုယ်တော်အကြောင်းကို လူမျိုးခြားတို့ထံ ဟောပြောကြ၏။ ကိုယ်တော်ကို ကမ္ဘာလောကသားတို့ ယုံကြည်ကြ၏။ ကိုယ်တော်ကို ဘုန်းတန်ခိုးတော်နှင့်တကွ ရွှေမြို့တော်သို့ ဘုရားရှင်ခေါ်ယူတော်မူ၏။
Obecnie wybrane:
1 Timothy 3: TPV-RV
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.